കാണാനും ഭംഗി, കഴിക്കാനും രുചി; എന്നാൽ മാമ്പഴം വാങ്ങുമ്പോൾ ശ്രദ്ധവേണം: കൃത്രിമമായി പഴുപ്പിച്ചവ തിരിച്ചറിയാനുള്ള  നിർദ്ദേശങ്ങളും എളുപ്പവഴികളും അറിയാം

ഹൈദരാബാ​ദ്: ഹൈദരാബാ​ദിൽ 200 കിലോ കൃത്രിമമായി പഴുപ്പിച്ച മാമ്പഴങ്ങൾ പിടിച്ചെടുത്ത പശ്ചാത്തലത്തിൽ മാമ്പഴത്തി​ന്റെ ​ഗുണനിലവാരം വീട്ടിൽ തന്നെ എങ്ങനെ പരിശോധിക്കാം എന്ന് വിശദമായി അറിയാം…

മാമ്പഴക്കാലം സജീവമായതോടെ വിപണിയിൽ രാസവസ്തുക്കൾ ഉപയോഗിച്ച് പഴുപ്പിച്ച മാമ്പഴങ്ങൾ വ്യാപകമാകുന്നത് ഉപഭോക്താക്കൾക്കിടയിൽ ആശങ്ക വർദ്ധിപ്പിക്കുന്നുണ്ട്. ലാഭക്കൊതി മൂലം പല കച്ചവടക്കാരും നിയമവിരുദ്ധമായ മാർഗ്ഗങ്ങളിലൂടെ പഴങ്ങൾ പഴുപ്പിക്കുന്നത് പതിവാകുകയാണ്. ഈ സാഹചര്യത്തിൽ, നാം വാങ്ങുന്ന മാമ്പഴം സുരക്ഷിതമാണോ എന്ന് തിരിച്ചറിയേണ്ടത് ആരോഗ്യ സംരക്ഷണത്തിന് അത്യാവശ്യമാണ്. ​

ഭാരതീയ ഭക്ഷ്യസുരക്ഷാ ഗുണനിലവാര അതോറിറ്റിയുടെ (എഫ്.എസ്.എസ്.എ.ഐ) കർശനമായ നിർദ്ദേശപ്രകാരം പഴങ്ങൾ പഴുപ്പിക്കുന്നതിനായി കാൽസ്യം കാർബൈഡ് ഉപയോഗിക്കുന്നത് പൂർണ്ണമായും നിരോധിച്ചിട്ടുണ്ട്. ഈ രാസവസ്തുവിൽ ആർസെനിക്, ഫോസ്ഫറസ് തുടങ്ങിയ വിഷാംശങ്ങൾ അടങ്ങിയിട്ടുണ്ട്. ഇത് ഉപയോഗിക്കുന്നത് ഉപഭോക്താക്കളുടെ ആരോഗ്യത്തിന് ഗുരുതരമായ ഭീഷണിയാണ്.

എന്നാൽ സുരക്ഷിതമായ രീതിയിൽ എഥിലിൻ ഗ്യാസ് ഉപയോഗിച്ച് പഴങ്ങൾ പഴുപ്പിക്കാൻ നിശ്ചിത മാനദണ്ഡങ്ങളോടെ അനുമതിയുണ്ട്. ​മാമ്പഴത്തിന്റെ ഗുണനിലവാരം വീട്ടിൽ പരിശോധിക്കാനുള്ള 8 മാർഗ്ഗങ്ങൾ ​എഫ്.എസ്.എസ്.എ.ഐ നിർദ്ദേശിച്ചു.

​1. മാമ്പഴം ഒരു പാത്രം വെള്ളത്തിൽ ഇടുക. താഴേക്ക് മുങ്ങിപ്പോകുന്ന മാമ്പഴങ്ങൾ പ്രകൃതിദത്തമായി പഴുത്തവയാണ്. മുകളിൽ പൊങ്ങിക്കിടക്കുന്നവ രാസവസ്തുക്കൾ ഉപയോഗിച്ച് പഴുപ്പിച്ചതാകാൻ സാധ്യതയുണ്ട്.

2.കൃത്രിമമായി പഴുപ്പിച്ച മാമ്പഴങ്ങൾ കാണാൻ നല്ല ഭംഗിയുള്ള മഞ്ഞനിറത്തിലായിരിക്കും. എന്നാൽ പ്രകൃതിദത്തമായി പഴുത്തവയിൽ അവിടെവിടെയായി പച്ച നിറവും മഞ്ഞ നിറവും കലർന്നു കാണപ്പെടും.

3.നല്ലപോലെ പഴുത്ത മാമ്പഴത്തിന് പ്രത്യേക സുഗന്ധമുണ്ടാകും. എന്നാൽ രാസവസ്തുക്കൾ ഉപയോഗിച്ചവയ്‌ക്ക് ഒട്ടും മണം ഉണ്ടാകില്ലെന്ന് മാത്രമല്ല, ചിലപ്പോൾ മരുന്നിന്റെ ചുവയുള്ള ഗന്ധം അനുഭവപ്പെടുകയും ചെയ്യും.

4.മാമ്പഴത്തിൽ അസ്വാഭാവികമായ രീതിയിൽ കറുത്ത പാടുകളോ മരുന്നിന്റെ അടയാളങ്ങളോ ഉണ്ടെങ്കിൽ അവ ഒഴിവാക്കുന്നതാണ് നല്ലത്.

5.കൃത്രിമമായി പഴുപ്പിച്ച മാമ്പഴങ്ങൾ അമിതമായി മൃദുവായതോ അല്ലെങ്കിൽ ഉൾഭാഗം കുഴഞ്ഞതോ ആയിരിക്കും. രാസവസ്തുക്കൾ പഴത്തിന്റെ കോശങ്ങളെ നശിപ്പിക്കുന്നത് കൊണ്ടാണിത്.

6.വെള്ളത്തിൽ അല്പം ബേക്കിംഗ് സോഡ കലർത്തി മാമ്പഴം 15-20 മിനിറ്റ് മുക്കിവയ്‌ക്കുക. കഴുകിക്കഴിയുമ്പോൾ മാമ്പഴത്തിന്റെ നിറം മാറുന്നുണ്ടെങ്കിൽ അത് രാസവസ്തുക്കൾ ചേർത്തതാകാൻ സാധ്യതയുണ്ട്.

7.സ്വാഭാവികമായ മധുരത്തിന് പകരം മാമ്പഴത്തിന് രുചി കുറവാണെന്നോ അല്ലെങ്കിൽ ഒരു പ്രത്യേക തരം രാസഗന്ധമോ അനുഭവപ്പെടുന്നുണ്ടെങ്കിൽ അത് കൃത്രിമമായി പഴുപ്പിച്ചതാകാം. ​

8.തീപ്പെട്ടി പരിശോധന-മാമ്പഴം വെച്ചിരിക്കുന്ന ബോക്സിന് അരികിൽ തീപ്പെട്ടി ഉരച്ചു കാണിച്ചാൽ തീപ്പൊരികൾ ഉണ്ടാവുകയോ തീ പിടിക്കുകയോ ചെയ്യുന്നത് രാസവസ്തുക്കളുടെ സാന്നിധ്യം മൂലമാണ്.