ദോഹ: നീണ്ട ഇടവേളയ്‌ക്ക് ശേഷം ഖത്തര്‍ തങ്ങളുടെ ആകാശം വിദേശ വിമാനക്കമ്പനികള്‍ക്കായി വീണ്ടും തുറന്നു നല്‍കുന്നു. ഫെബ്രുവരി അവസാനം മേഖലയില്‍ ഉടലെടുത്ത അസ്വാസ്ഥ്യങ്ങളെത്തുടര്‍ന്ന് ഏര്‍പ്പെടുത്തിയ കടുത്ത നിയന്ത്രണങ്ങളാണ് ഖത്തര്‍ സിവില്‍ ഏവിയേഷന്‍ അതോറിറ്റി പിന്‍വലിച്ചത്. സുരക്ഷാ ക്രമീകരണങ്ങള്‍ കര്‍ശനമായി പാലിച്ചുകൊണ്ട് ഘട്ടം ഘട്ടമായാണ് അന്താരാഷ്ട്ര വിമാനങ്ങള്‍ക്ക് അനുമതി നല്‍കുന്നത്.
ഫെബ്രുവരി 28-ന് ശേഷം ആദ്യമായാണ് വിദേശ വിമാനക്കമ്പനികള്‍ക്ക് ഹമദ് അന്താരാഷ്ട്ര വിമാനത്താവളത്തിലേക്ക് സര്‍വീസ് നടത്താന്‍ പൂര്‍ണ്ണ അനുമതി ലഭിക്കുന്നത്. അന്താരാഷ്ട്ര മാനദണ്ഡങ്ങള്‍ പാലിച്ച് വ്യോമപാത സുരക്ഷിതമാണെന്ന് ഉറപ്പുവരുത്തിയ ശേഷമാണ് നടപടി. ദേശീയ വിമാനക്കമ്പനിയായ ഖത്തര്‍ എയര്‍വേയ്‌സ് നിലവില്‍ ലോകത്തെ വിവിധ നഗരങ്ങളിലേക്ക് സര്‍വീസുകള്‍ വ്യാപിപ്പിക്കുകയാണ്. ജൂണ്‍ പകുതിയോടെ 150-ഓളം ലക്ഷ്യസ്ഥാനങ്ങളിലേക്ക് പറക്കാനാണ് കമ്പനിയുടെ തീരുമാനം.
യാത്ര മുടങ്ങിയവര്‍ക്കായി ആകര്‍ഷകമായ ആനുകൂല്യങ്ങളും അധികൃതര്‍ പ്രഖ്യാപിച്ചിട്ടുണ്ട്. ഒക്ടോബര്‍ 31 വരെ ടിക്കറ്റുകള്‍ സൗജന്യമായി പുതുക്കാനോ പണം തിരികെ വാങ്ങാനോ ഖത്തര്‍ എയര്‍വേയ്‌സ് സൗകര്യം നല്‍കുന്നു. എങ്കിലും യാത്രയ്‌ക്ക് മുന്‍പായി വിമാനക്കമ്പനികളുമായി ബന്ധപ്പെട്ട് സമയക്രമം ഉറപ്പുവരുത്തണമെന്ന് അധികൃതര്‍ കര്‍ശന നിര്‍ദ്ദേശം നല്‍കി.
അമേരിക്കയും ഇറാനും തമ്മിലുള്ള താല്‍ക്കാലിക വെടിനിര്‍ത്തലാണ് വ്യോമഗതാഗതം പുനഃസ്ഥാപിക്കാന്‍ സഹായകമായത്. എന്നാല്‍ ഈ കരാറിന്റെ കാലാവധി നാളെ അവസാനിക്കാനിരിക്കെ, മേഖലയിലെ രാഷ്‌ട്രീയ സാഹചര്യം വരും ദിവസങ്ങളിലും നിര്‍ണ്ണായകമാകും. സമാധാന ചര്‍ച്ചകള്‍ പൂര്‍ണ്ണ ഫലപ്രാപ്തിയിലെത്താത്തത് വ്യോമയാന മേഖലയില്‍ നേരിയ ആശങ്ക നിലനിര്‍ത്തുന്നുണ്ട്.
