തന്റെ പിറന്നാൾ ആഘോഷിക്കാനായി വിദ്യാർത്ഥികളെ ക്ഷണിച്ച് അവർക്ക് സ്നേഹത്തോടെ ഭക്ഷണം വിളമ്പിക്കൊടുക്കുന്ന ഒരു പ്രൊഫസറാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്. ഐഐടി ഖരഗ്‌പൂരിലെ പ്രൊഫസർ അരവിന്ദ റൗത്രേയാണ് പിറന്നാൾ ആഘോഷത്തിന് തന്റെ വിദ്യാർത്ഥികളെ കൂടി ക്ഷണിച്ചത്. പ്രൊഫസർ വിദ്യാർത്ഥികൾക്കൊപ്പം കേക്ക് മുറിക്കുന്നതും ഭക്ഷണം നൽകുന്നതുമായ വീഡിയോ ഇൻസ്റ്റഗ്രാമിൽ വൈറലായി.
വീഡിയോ ഷെയർ ചെയ്തിരിക്കുന്നത് @unseen_iit എന്ന ഇൻസ്റ്റഗ്രാം അക്കൗണ്ടിലാണ്. വീഡിയോയുടെ ആദ്യം പ്രൊഫസർ കേക്ക് മുറിക്കുന്നതോടൊപ്പം വിദ്യാർത്ഥികൾ കയ്യടിക്കുന്നത് കാണാം. തുടർന്ന് ഒരു വലിയ ഗാർഡനിൽ വെച്ചായിരുന്നു ഇവർക്ക് വിരുന്നു സൽക്കാരം. പാസ്ത, ഐസ്ക്രീം, ചോറ്, പൂരി, വിവിധ തരം കറികൾ, ദാൽ എന്നിങ്ങനെ നിരവധി വിഭവങ്ങളാണ് അദ്ദേഹം വിദ്യാർത്ഥികൾക്കായി ഒരുക്കിയിരുന്നത്. വിദ്യാർത്ഥികൾക്ക് ഭക്ഷണം വിളമ്പിക്കൊടുക്കുക മാത്രമല്ല അവർക്ക് ആവശ്യമായ സ്പൂണുകളും മറ്റും നൽകാനും പ്രൊഫസറായിരുന്നു മുന്നിൽ.
ഈ മനോഹരമായ വീഡിയോ ഒരു ലക്ഷത്തിലധികം പേരാണ് കണ്ടത്. വീഡിയോയ്‌ക്ക് അനേകം കമന്റുകളും നൽകിയിട്ടുണ്ട്. ‘ഞാൻ തെറ്റായ ഡിപ്പാർട്ട്‌മെന്റിലാണ് എത്തിയത് എന്ന് തോന്നുന്നു’ എന്നാണ് ഒരാൾ കുറിച്ചത്. ‘അദ്ദേഹത്തിന് കീഴിൽ ഇന്റേൺഷിപ്പ് ചെയ്തിട്ടുണ്ട്, വളരെ സൗഹൃദപരമായി പെരുമാറുന്ന വ്യക്തിയാണ് അദ്ദേഹം’ എന്നായിരുന്നു മറ്റൊരാൾക്ക് പറയാനുണ്ടായിരുന്നത്. തങ്ങളുടെ കോളേജുകളിൽ ടീച്ചേഴ്സ് ഡേയ്‌ക്ക് പോലും ഇങ്ങനെയൊന്നും നടക്കാറില്ല എന്നും ആളുകൾ അഭിപ്രായപ്പെട്ടു. ഇത്തരത്തിൽ അധ്യാപകൻ വിദ്യാർത്ഥി ബന്ധത്തിനുപരിയായുളള ഈ ആത്മബന്ധത്തെ എല്ലാവരും പ്രശംസിച്ചു.
