തിരുവനന്തപുരം: സംസ്ഥാനത്ത് വേനൽ മഴ സജീവമാകുന്നുണ്ടെങ്കിലും അൾട്രാവയലറ്റ് വികിരണത്തിന്റെ അളവ് ആശങ്കാജനകമായി ഉയരുന്നു. സൂര്യപ്രകാശത്തിലെ അൾട്രാവയലറ്റ് രശ്മികളുടെ തീവ്രത അളക്കുന്ന യുവി ഇൻഡക്സ് ഉയർന്ന നിലയിൽ രേഖപ്പെടുത്തിയതിനെത്തുടർന്ന് ഇന്ന് നാല് ജില്ലകളിൽ കേന്ദ്ര കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ചു. കൊല്ലം, പത്തനംതിട്ട, ആലപ്പുഴ, മലപ്പുറം എന്നീ ജില്ലകളിലാണ് അതീവ ജാഗ്രതാ നിർദ്ദേശം നൽകിയിരിക്കുന്നത്. കടുത്ത ചൂടിനും യുവി വികിരണത്തിനുമൊപ്പം പെട്ടെന്നുള്ള കാറ്റും മഴയും പ്രതീക്ഷിക്കാവുന്ന കാലാവസ്ഥയാണ് സംസ്ഥാനത്ത് നിലവിലുള്ളത്.
ലഭ്യമായ വിവരങ്ങൾ പ്രകാരം പത്തനംതിട്ട ജില്ലയിലെ കോന്നിയിലാണ് ഏറ്റവും ഉയർന്ന യുവി ഇൻഡക്സ് (10) രേഖപ്പെടുത്തിയിരിക്കുന്നത്. കൊല്ലം ജില്ലയിലെ കൊട്ടാരക്കരയിൽ ഇത് 9 ആണ്. ആലപ്പുഴ ചെങ്ങന്നൂരിലും മലപ്പുറം പൊന്നാനിയിലും ഇൻഡക്സ് 8 ആയി തുടരുന്നു. സാധാരണ നിലയേക്കാൾ ഉയർന്ന ഈ സൂചിക ഗുരുതരമായ ആരോഗ്യപ്രശ്നങ്ങൾക്ക് കാരണമായേക്കാം. 9 ജില്ലകളിൽ നിലവിൽ യെല്ലോ അലർട്ടും നിലവിലുണ്ട്.
അൾട്രാവയലറ്റ് രശ്മികൾ നേരിട്ട് ശരീരത്തിൽ ഏൽക്കുന്നത് നേത്രരോഗങ്ങൾക്കും വിവിധതരം ചർമ്മരോഗങ്ങൾക്കും കാരണമാകുമെന്ന് വിദഗ്ധർ മുന്നറിയിപ്പ് നൽകുന്നു. പകൽ 11 മണി മുതൽ 3 മണി വരെയുള്ള സമയങ്ങളിൽ നേരിട്ട് വെയിൽ ഏൽക്കുന്നത് ഒഴിവാക്കണമെന്നും പുറത്തിറങ്ങുന്നവർ കുടയോ മറ്റ് പ്രതിരോധ മാർഗങ്ങളോ സ്വീകരിക്കണമെന്നും ദുരന്തനിവാരണ അതോറിറ്റി അറിയിച്ചു.
