പഞ്ച്കുല: പ്രതിരോധ ഗവേഷണ വികസന സംഘടന നാളെ ഹരിയാനയിലെ പഞ്ച്കുലയില് വെച്ച് അത്യാധുനിക ബോംബ് പരീക്ഷണം നടത്തും. ടി.ബി.ആര്.എല് ടെക്നോളജി ഡയറക്ടര് സി. സര്ക്കാറാണ് ഇക്കാര്യം അറിയിച്ചത്. സ്ഫോടന പരീക്ഷണത്തിന്റെ പശ്ചാത്തലത്തില് സുരക്ഷാ മുന്കരുതലുകളുടെ ഭാഗമായി പഞ്ച്കുല ജില്ലയിലെ ഭാനു, ബില്ല എന്നീ ഗ്രാമങ്ങളിലുള്ളവര് നാളെ വീടുകളില് തന്നെ കഴിയണമെന്ന് അധികൃതര് കര്ശന നിര്ദ്ദേശം നല്കിയിട്ടുണ്ട്.
സുരക്ഷാ മാനദണ്ഡങ്ങള് പൂര്ണ്ണമായും പാലിച്ചുകൊണ്ടായിരിക്കും പ്രതിരോധ വകുപ്പിന്റെ ഈ പതിവ് പരീക്ഷണം നടക്കുക. ആശങ്കപ്പെടേണ്ട സാഹചര്യമില്ലെന്നും പൊതുജനങ്ങളുടെ സുരക്ഷ മുന്നിര്ത്തിയാണ് നിയന്ത്രണങ്ങള് ഏര്പ്പെടുത്തിയിട്ടുള്ളതെന്നും ഭരണകൂടം വ്യക്തമാക്കി. അസ്രേവാലി, നാഗല്, മോഗിനന്ദ്, കിഷന്ഗഡ്, ടി.എം.വി കോളനി, രാംഗഡ് മുന്സിപ്പല് കൗണ്സിലിന് കീഴിലുള്ള പ്രദേശങ്ങള്ക്കും ജാഗ്രതാ നിര്ദ്ദേശം നല്കിയിട്ടുണ്ട്.
സ്ഫോടനം നടക്കുന്ന സ്ഥലത്തിന് ചുറ്റുമുള്ള രണ്ട് കിലോമീറ്റര് പ്രദേശം അപകട മേഖലയായി പ്രഖ്യാപിച്ചിട്ടുണ്ട്. സ്ഫോടനത്തിന്റെ ഫലമായി ഉണ്ടാകുന്ന അവശിഷ്ടങ്ങളും സ്പ്ലിന്ററുകളും വായുവിലൂടെ 1.5 കിലോമീറ്റര് ദൂരം വരെ തെറിച്ചുവീഴാന് സാധ്യതയുണ്ടെന്ന് ഡി.ആര്.ഡി.ഓ ശാസ്ത്രജ്ഞര് മുന്നറിയിപ്പ് നല്കുന്നു. അതിനാല് പരീക്ഷണ സമയത്ത് ആരും തുറസ്സായ സ്ഥലങ്ങളില് ഇറങ്ങരുതെന്ന് അധികൃതര് അഭ്യര്ത്ഥിച്ചു.
പരിശോധന നടക്കുന്ന സമയത്ത് ഈ മേഖലകളിലേക്കുള്ള പ്രവേശനം പൂര്ണ്ണമായി നിരീക്ഷിക്കാനും നിയന്ത്രിക്കാനും തദ്ദേശ സ്വയംഭരണ സ്ഥാപനങ്ങള്ക്ക് നിര്ദ്ദേശം നല്കിയിട്ടുണ്ട്. പ്രദേശവാസികള്ക്കിടയില് അനാവശ്യമായ ഭീതി പടര്ത്തുന്ന കിംവദന്തികള് വിശ്വസിക്കരുതെന്നും ഔദ്യോഗിക സുരക്ഷാ നിര്ദ്ദേശങ്ങള് കര്ശനമായി പാലിക്കണമെന്നും ഭരണകൂടം അറിയിച്ചു.
