ഹരിപ്പാട്: പ്ലസ് വണ്‍ ആദ്യ അലോട്‌മെന്റില്‍ ഉള്‍പ്പെട്ട വിദ്യാര്‍ത്ഥികള്‍ക്ക് ഇന്ന് വൈകിട്ട് 5 മണിവരെ സ്‌കൂളുകളില്‍ പ്രവേശനം നേടാം. അലോട്‌മെന്റ് ലഭിച്ചവര്‍ നിര്‍ബന്ധമായും പ്രവേശന നടപടികള്‍ പൂര്‍ത്തിയാക്കണമെന്ന് ഹയര്‍സെക്കന്‍ഡറി വകുപ്പ് അറിയിച്ചു. ആദ്യ ഓപ്ഷന്‍ ലഭിച്ച വിദ്യാര്‍ത്ഥികള്‍ സ്ഥിരം പ്രവേശനം നേടേണ്ടതാണ്. എന്നാല്‍ ഉയര്‍ന്ന ഓപ്ഷനുകളിലേക്ക് പരിഗണിക്കപ്പെടാന്‍ ആഗ്രഹിക്കുന്നവര്‍ക്ക് ഫീസ് അടയ്‌ക്കാതെ താത്കാലിക പ്രവേശനം നേടാനും അവസരമുണ്ട്.
അലോട്‌മെന്റ് ലഭിച്ചിട്ടും നിശ്ചിത സമയത്തിനുള്ളില്‍ പ്രവേശനം നേടാത്ത വിദ്യാര്‍ത്ഥികളെ തുടര്‍ അലോട്‌മെന്റുകളില്‍ പരിഗണിക്കില്ല. അതിനാല്‍ വിദ്യാര്‍ത്ഥികളും രക്ഷിതാക്കളും സമയപരിധി കൃത്യമായി പാലിക്കണമെന്ന് അധികൃതര്‍ നിര്‍ദേശിച്ചു. ഒന്നിലധികം ജില്ലകളിലേക്ക് അപേക്ഷ നല്‍കിയ വിദ്യാര്‍ത്ഥികള്‍ക്ക് ഏതെങ്കിലും ജില്ലയില്‍ അലോട്‌മെന്റ് ലഭിച്ചാല്‍ താല്‍പര്യമുള്ള ജില്ലയില്‍ പ്രവേശനം നേടാം. എന്നാല്‍ ഒരു ജില്ലയില്‍ പ്രവേശനം നേടിയാല്‍ മറ്റ് ജില്ലകളിലെ അലോട്‌മെന്റുകള്‍ സ്വമേധയാ റദ്ദാകും.
ചേരുന്ന ജില്ലയിലെ ആദ്യ ഓപ്ഷനിലാണ് അലോട്‌മെന്റ് ലഭിച്ചതെങ്കില്‍ സ്ഥിരം പ്രവേശനം നിര്‍ബന്ധമാണ്. മറ്റ് ഓപ്ഷനുകളിലാണ് അലോട്‌മെന്റ് ലഭിച്ചതെങ്കില്‍ താത്കാലിക പ്രവേശനം നേടാന്‍ അവസരമുണ്ട്. ഇതിനിടെ, ഇന്നല വൈകീട്ട് വരെയുള്ള ആദ്യ അലോട്‌മെന്റിന്റെ അടിസ്ഥാനത്തില്‍ സംസ്ഥാനത്തെ വിവിധ സ്‌കൂളുകളിലായി 1,38,071 വിദ്യാര്‍ത്ഥികള്‍ പ്രവേശനം നേടിയിട്ടുണ്ട്. ഇതില്‍ 88,597 പേര്‍ സ്ഥിരം പ്രവേശനം നേടിയവരാണെന്നാണ് കണക്കുകള്‍ വ്യക്തമാക്കുന്നത്.
പ്രവേശനത്തിനുള്ള അവസാന ദിവസം ആയതിനാല്‍ ഇന്ന് സ്‌കൂളുകളില്‍ തിരക്ക് വര്‍ധിക്കാനിടയുണ്ടെന്നും വിദ്യാര്‍ത്ഥികള്‍ വൈകാതെ നടപടികള്‍ പൂര്‍ത്തിയാക്കണമെന്നും വിദ്യാഭ്യാസ വകുപ്പ് അറിയിച്ചു.
