ന്യൂഡല്ഹി: ഇന്ത്യന് വനിതാ ക്രിക്കറ്റിന് അഭിമാന നിമിഷം സമ്മാനിച്ച് ഇടംകൈ സ്പിന്നര് ശ്രീ ചരാണി. വെറും 21-ാം വയസില് ഐസിസി വനിതാ ടി20 ബൗളര്മാരുടെ ലോക റാങ്കിങ്ങില് ഒന്നാം സ്ഥാനത്തെത്തി ഇന്ത്യന് ക്രിക്കറ്റിന്റെ പുതിയ താരോദയമായി മാറിയിരിക്കുകയാണ് താരം. നിലവില് നടക്കുന്ന വനിതാ ടി20 ലോകകപ്പിലെ തകര്പ്പന് പ്രകടനമാണ് ചരാണിയെ ലോക ക്രിക്കറ്റിന്റെ നെറുകയിലെത്തിച്ചത്.
മൂന്ന് മത്സരങ്ങളില് നിന്ന് 10 വിക്കറ്റുകള് വീഴ്ത്തിയാണ് ശ്രീ ചരാണി ടൂര്ണമെന്റിലെ ഏറ്റവും കൂടുതല് വിക്കറ്റ് നേടിയ ബൗളറായി തിളങ്ങുന്നത്. കൃത്യമായ ലൈന്-ലെങ്ത്തും സമ്മര്ദ്ദ ഘട്ടങ്ങളില് മത്സരത്തിന്റെ ഗതി മാറ്റുന്ന മികവും താരത്തെ എതിരാളികള്ക്ക് പേടിസ്വപ്നമാക്കി.
നെതര്ലന്ഡ്സിനെതിരായ മത്സരത്തില് നാല് വിക്കറ്റും ദക്ഷിണാഫ്രിക്കയ്ക്കെതിരെ മൂന്ന് വിക്കറ്റും വീഴ്ത്തിയ പ്രകടനങ്ങളാണ് റാങ്കിങ്ങില് വന് കുതിപ്പിന് വഴിയൊരുക്കിയത്. ഇതോടെ ഇംഗ്ലണ്ടിന്റെ ലിന്സി സ്മിത്തിനെ പിന്തള്ളി ലോക ഒന്നാം നമ്പര് ബൗളറെന്ന അപൂര്വ നേട്ടം ശ്രീ ചരാണി സ്വന്തമാക്കി.
അന്താരാഷ്ട്ര അരങ്ങേറ്റം നടത്തിയിട്ട് ഒരു വര്ഷം പോലും തികയുന്നതിനുമുമ്പ് ലോക റാങ്കിങ്ങിന്റെ കൊടുമുടിയിലെത്തിയത് ഇന്ത്യന് വനിതാ ക്രിക്കറ്റിന്റെ ഭാവിയെക്കുറിച്ചുള്ള പ്രതീക്ഷകളും ഉയര്ത്തുകയാണ്. ഓരോ മത്സരത്തിലും കൂടുതല് പക്വതയോടെ പന്തെറിയുന്ന യുവതാരം ഇന്ത്യയുടെ ബൗളിങ് ആക്രമണത്തിലെ നിര്ണായക ആയുധമായി ഇതിനകം മാറിക്കഴിഞ്ഞു.
അതേസമയം, ഇംഗ്ലണ്ടിന്റെ ചാര്ലി ഡീന് രണ്ടാം സ്ഥാനത്തേക്ക് ഉയര്ന്നപ്പോള് മുന് നമ്പര് വണ് താരം സോഫി എക്ലസ്റ്റണ് നാലാം സ്ഥാനത്തേക്കാണ് മുന്നേറിയത്. ബാറ്റര്മാരുടെ പട്ടികയില് ഓസ്ട്രേലിയയുടെ ജോര്ജിയ വോള് ഒന്നാം സ്ഥാനം നിലനിര്ത്തി. ഇന്ത്യയുടെ ഷഫാലി വര്മ ആറാം സ്ഥാനത്തേക്കും ക്യാപ്റ്റന് ഹര്മന്പ്രീത് കൗര് ആദ്യ പത്തിലേക്കും മുന്നേറി.
ഓള്റൗണ്ടര്മാരുടെ റാങ്കിങ്ങില് വെസ്റ്റ് ഇന്ഡീസിന്റെ ഹെയ്ലി മാത്യൂസ് ഒന്നാം സ്ഥാനം നിലനിര്ത്തിയപ്പോള് ന്യൂസിലന്ഡിന്റെ മെലി കെര് രണ്ടാമതും ശ്രീലങ്കന് നായിക ചമരി അതപത്ത് മൂന്നാമതുമാണ്.
