ന്യൂഡല്ഹി: ഇന്ത്യന് അത്ലറ്റിക്സിന്റെ ചരിത്രപുസ്തകത്തില് പുതിയ അധ്യായം കുറിച്ച് കേരളത്തിന്റെ അഭിമാനതാരം അന്സി സോജന്. 21 വര്ഷമായി ആരും തൊടാനാകാതെ നിന്ന അഞ്ജു ബോബി ജോര്ജിന്റെ വനിതകളുടെ ലോങ് ജംപ് ദേശീയ റെക്കോര്ഡ് അന്സി സ്വന്തം പേരിലാക്കി. ദേശീയ ഇന്റര് സ്റ്റേറ്റ് സീനിയര് അത്ലറ്റിക്സ് ചാമ്പ്യന്ഷിപ്പില് അഞ്ചാം ശ്രമത്തില് 6.88 മീറ്റര് ചാടി അന്സി ചരിത്രം തിരുത്തുകയായിരുന്നു.
2004 ഏഥന്സ് ഒളിമ്പിക്സില് അഞ്ജു കുറിച്ച 6.83 മീറ്റര് എന്ന ദേശീയ റെക്കോര്ഡാണ് ഇപ്പോള് പഴങ്കഥയായത്. ഇന്ത്യന് വനിതാ ലോങ് ജംപിന്റെ പ്രതീകമായി രണ്ട് പതിറ്റാണ്ടിലേറെയായി നിലനിന്ന നേട്ടം മറികടന്നതോടെ ഇന്ത്യന് അത്ലറ്റിക്സില് പുതിയ തലമുറയുടെ പ്രഖ്യാപനമായാണ് അന്സിയുടെ പ്രകടനത്തെ വിലയിരുത്തുന്നത്.
ദേശീയ റെക്കോര്ഡ് തകര്ത്തത് മാത്രമല്ല, അന്സിയുടെ 6.88 മീറ്റര് ചാട്ടം ഏഷ്യന് അത്ലറ്റിക്സിലും വലിയ ചര്ച്ചയായി. ഏഷ്യയുടെ എക്കാലത്തെയും മികച്ച എട്ടാമത്തെ പ്രകടനമാണ് ഈ നേട്ടം. കഴിഞ്ഞ ഇരുപത് വര്ഷത്തിനിടെ 6.85 മീറ്ററിന് മുകളില് ചാടുന്ന രണ്ടാമത്തെ ഏഷ്യന് വനിത എന്ന അപൂര്വ നേട്ടവും അന്സി സ്വന്തമാക്കി. അന്താരാഷ്ട്ര നിലവാരത്തില് ഇന്ത്യയുടെ മെഡല് പ്രതീക്ഷകള്ക്ക് കൂടുതല് കരുത്തേകുന്ന പ്രകടനമായാണ് വിദഗ്ധര് ഇതിനെ കാണുന്നത്.
ലോക അത്ലറ്റിക്സ് ചാമ്പ്യന്ഷിപ്പില് ഇന്ത്യയ്ക്ക് ആദ്യ മെഡല് സമ്മാനിച്ച താരമാണ് അഞ്ജു ബോബി ജോര്ജ്. 2003-ല് പാരീസില് വെങ്കലം നേടിയ അഞ്ജു ഇന്ത്യന് ലോങ് ജംപിന്റെ മുഖമായി മാറിയിരുന്നു. അതിനുശേഷം നിരവധി താരങ്ങള് ഉയര്ന്നുവന്നെങ്കിലും ദേശീയ റെക്കോര്ഡിന് അടുത്തെത്താന് പോലും പലര്ക്കും കഴിഞ്ഞിരുന്നില്ല. ആ അസാധ്യമായ നേട്ടമാണ് ഇപ്പോള് മറ്റൊരു മലയാളി താരം സ്വന്തമാക്കിയിരിക്കുന്നത്.
തൃശൂര് സ്വദേശിനിയായ അന്സി സോജന് ഇന്ത്യന് നാവിയില് ചീഫ് പെറ്റി ഓഫീസറായാണ് സേവനമനുഷ്ഠിക്കുന്നത്. കഴിഞ്ഞ കുറച്ച് വര്ഷങ്ങളായി ഇന്ത്യയുടെ ഏറ്റവും സ്ഥിരതയാര്ന്ന ലോങ് ജംപ് താരങ്ങളിലൊരാളായി അന്സി വളര്ന്നു. 2023-ലെ ഏഷ്യന് ഗെയിംസില് വെള്ളി മെഡല്, 2025 ഏഷ്യന് അത്ലറ്റിക്സ് ചാമ്പ്യന്ഷിപ്പില് വെള്ളി, 2026 ഏഷ്യന് ഇന്ഡോര് അത്ലറ്റിക്സ് ചാമ്പ്യന്ഷിപ്പില് വെങ്കലം എന്നിവ നേടി അന്സി ഇതിനകം തന്നെ അന്താരാഷ്ട്ര വേദിയില് തന്റെ മികവ് തെളിയിച്ചിരുന്നു.
ഈ സീസണില് ഫെഡറേഷന് കപ്പില് 6.75 മീറ്റര് ചാടി വ്യക്തിഗത മികച്ച പ്രകടനം കുറിച്ച താരം, ദേശീയ ചാമ്പ്യന്ഷിപ്പില് അതിലും മികച്ച ചാട്ടവുമായി ചരിത്രം തന്നെ മാറ്റിയെഴുതി. ലോക ചാമ്പ്യന്ഷിപ്പിന് മുന്പ് ഇന്ത്യയ്ക്ക് വലിയ പ്രതീക്ഷ വരാനിരിക്കുന്ന ലോക അത്ലറ്റിക്സ് ചാമ്പ്യന്ഷിപ്പിന് മുന്പ് അന്സിയുടെ ഈ പ്രകടനം ഇന്ത്യന് ടീമിന് വലിയ ആത്മവിശ്വാസമാണ് നല്കുന്നത്. ദേശീയ റെക്കോര്ഡ് തകര്ത്തതോടെ ലോക നിലവാരത്തില് മെഡല് നേടാന് ശേഷിയുള്ള താരമെന്ന വിലയിരുത്തലും അന്സിക്ക് ലഭിച്ചു.
കേരളത്തിന്റെ ട്രാക്കുകളില് നിന്ന് ലോക വേദിയിലേക്ക് ഉയര്ന്ന അന്സി സോജന്റെ ഈ ചരിത്രച്ചാട്ടം, ഇന്ത്യന് വനിതാ അത്ലറ്റിക്സിന്റെ പുതിയ യുഗത്തിന്റെ തുടക്കമായാണ് ഇനി വിലയിരുത്തപ്പെടുക.