തിരുവനന്തപുരം: സ്ത്രീകള്ക്കായുള്ള ‘പ്രിയദര്ശിനി’ സൗജന്യ യാത്രാ പദ്ധതി നടപ്പിലാക്കിയതിന് പിന്നാലെ സംസ്ഥാനത്തെ സ്വകാര്യ ബസ് മേഖല കടുത്ത സാമ്പത്തിക പ്രതിസന്ധിയിലാണെന്ന് ചൂണ്ടിക്കാട്ടി ബസ് ഉടമകള് വാഹന ബന്ദ് മുന്നറിയിപ്പ് നല്കി. പ്രതിസന്ധി പരിഹരിക്കാന് സര്ക്കാര് അടിയന്തര ഇടപെടല് നടത്തിയില്ലെങ്കില് സ്വകാര്യ ബസുകള്ക്ക് പുറമെ ടൂറിസ്റ്റ് ബസുകള്, ടാക്സികള്, ഓട്ടോറിക്ഷകള് എന്നിവയെ കൂടി ഉള്പ്പെടുത്തി സംസ്ഥാനവ്യാപക വാഹന ബന്ദിലേക്ക് നീങ്ങുമെന്ന് സ്വകാര്യ ബസ് ഉടമകള് അറിയിച്ചു.
ഇതു സംബന്ധിച്ച അന്തിമ തീരുമാനം ജൂലൈ 6-ന് ചേരുന്ന യോഗത്തില് കൈക്കൊള്ളുമെന്നും സംഘടനാ പ്രതിനിധികള് വ്യക്തമാക്കി. സൗജന്യ യാത്രാ പദ്ധതി നിലവില് വന്നതിന് ശേഷം യാത്രക്കാരുടെ എണ്ണം ഗണ്യമായി കുറഞ്ഞതോടെ പല റൂട്ടുകളിലും ഒഴിഞ്ഞ ബസുകളുമായി സര്വീസ് നടത്തേണ്ട സാഹചര്യമാണെന്ന് ബസ് ഉടമകളും ജീവനക്കാരും ആരോപിക്കുന്നു. ഡീസല് ചെലവും തൊഴിലാളികളുടെ വേതനവും പോലും കണ്ടെത്താന് കഴിയാത്ത സ്ഥിതിയാണുള്ളതെന്നും നിലവിലെ സാഹചര്യത്തില് സര്വീസ് തുടരുന്നത് സാമ്പത്തികമായി പ്രായോഗികമല്ലെന്നും അവര് പറയുന്നു.
ഇതിനിടെ, സര്വീസുകള് ലാഭകരമല്ലെന്ന് ചൂണ്ടിക്കാട്ടി പ്രൈവറ്റ് ബസ് ഓപ്പറേറ്റേഴ്സ് ഫെഡറേഷന് ജൂലൈ 20 മുതല് സെക്രട്ടേറിയറ്റിന് മുന്നില് അനിശ്ചിതകാല സമരം നടത്തുമെന്നും പ്രഖ്യാപിച്ചിട്ടുണ്ട്. വരുമാനത്തിലുണ്ടായ കനത്ത ഇടിവിനെ തുടര്ന്ന് സംസ്ഥാനത്തിന്റെ വിവിധ ഭാഗങ്ങളില് പ്രതിസന്ധി രൂക്ഷമായിരിക്കുകയാണ്. പാലക്കാട് ഉള്പ്പെടെയുള്ള മേഖലകളില് ബസ് തൊഴിലാളികളുടെ ദിവസവേതനം ഗണ്യമായി കുറച്ചതായും നിലവില് പലര്ക്കും പകുതി വേതനം മാത്രമാണ് ലഭിക്കുന്നതെന്നും റിപ്പോര്ട്ടുണ്ട്.
അതേസമയം, വയനാട്ടില് സ്വകാര്യ ബസുകള് ജൂലൈ 1 മുതല് അനിശ്ചിതകാല പണിമുടക്കിന് പോകുമെന്ന് ബന്ധപ്പെട്ട സംഘടനകളും അറിയിച്ചിട്ടുണ്ട്.
