കേരളത്തിലെയും ദക്ഷിണ ഭാരതത്തിലെയും ആത്മീയപഥങ്ങളിൽ ഇപ്പോൾ കേൾക്കുന്ന ഏറ്റവും ശക്തമായ ഒരു മന്ത്രധ്വനിയുണ്ട്—മഹാവാരാഹി! ആരാണ് വരാഹമുഖിയായ ഈ രഹസ്യമൂർത്തി? എന്തുകൊണ്ടാണ് ഈ ആധുനിക യുഗത്തിലും ലക്ഷക്കണക്കിന് ഭക്തർ ഈ ദേവതയ്ക്ക് മുന്നിലേക്ക് ആകർഷിക്കപ്പെടുന്നത്? ആന്ധ്രയുടെ ഉപമുഖ്യമന്ത്രി പവൻ കല്യാൺ മുതൽ സാധാരണക്കാർ വരെ ഈ ഉപാസനയ്ക്ക് പിന്നാലെ പോകുന്നതിന്റെ രഹസ്യമെന്താണ്?
ഈ ആത്മീയ രഹസ്യങ്ങൾ പൂർണ്ണമായി മനസ്സിലാക്കാൻ തന്ത്രി രാജേഷ് ശർമ്മയുമായുള്ള ദീർഘ സംഭാഷണത്തിന്റെ യൂട്യൂബ് വീഡിയോ കാണുക.
https://youtu.be/a6ye4frmhCg?si=Ks7OuWZqh4oH1grs
ഇത് കേവലമൊരു ആരാധനയല്ല; ഭയവും ഭക്തിയും ഒന്നുചേരുന്ന, അതിശക്തമായൊരു ആത്മീയ യാത്രയാണ്.
ഭയമുണർത്തുന്ന സൈന്യാധിപ
സാധാരണ ദേവീരൂപങ്ങളിൽ നിന്ന് തികച്ചും വ്യത്യസ്തമാണ് വാരാഹി. സാക്ഷാൽ ലളിതാമഹാ ത്രിപുരസുന്ദരിയുടെ യുദ്ധക്കളത്തിലെ സൈന്യാധിപയാണ് (ദണ്ഡനാഥ) ഈ ഭഗവതി. സ്വന്തമായി ഒരു വരാഹ സൈന്യവ്യൂഹം തന്നെയുള്ള പോരാളി!
പക്ഷേ, ഈ യുദ്ധം പുറത്തുള്ള ശത്രുക്കൾക്കെതിരെയല്ല. നമ്മുടെ ചിത്തത്തിൽ ഒളിച്ചിരിക്കുന്ന കാമം, ക്രോധം, അസൂയ തുടങ്ങിയ മലിനമായ വിചാരങ്ങളാകുന്ന അസുരന്മാർക്കെതിരെയാണ് ദേവിയുടെ പടയോട്ടം. മനുഷ്യ മനസ്സിന്റെ ഇരുണ്ട കോണുകളെ അടിച്ചമർത്താൻ ഈ ക്രൂരമെന്നു തോന്നാവുന്ന വരാഹ ഭാവത്തിന് മാത്രമേ സാധിക്കൂ.
കുണ്ഡലിനിയെ കുത്തിയിളക്കുന്ന ശക്തി
നമ്മുടെ ശരീരത്തിലെ ഊർജ്ജകേന്ദ്രങ്ങളായ ചക്രങ്ങളിൽ ഏറ്റവും താഴെയുള്ള ‘അധോ മൂലാധാര’ ചക്രത്തിന്റെ അധിപയാണ് വാരാഹി. നാഗലോകങ്ങളും പൈശാചിക ലോകങ്ങളും ആരംഭിക്കുന്ന ആ ഇരുണ്ട തലത്തിൽ നിന്നാണ് ദേവിയുടെ ഭരണം.
ഒരു കാട്ടുപന്നി മണ്ണ് കുത്തിമറിക്കുന്നത് കണ്ടിട്ടില്ലേ? അതുപോലെ, മനുഷ്യന്റെ മൂലാധാരത്തിൽ ഉറങ്ങിക്കിടക്കുന്ന അതീന്ദ്രിയ ശക്തിയായ ‘കുണ്ഡലിനി’യെ കുത്തിയിളക്കി മുകളിലേക്ക് പായിക്കാൻ വാരാഹിക്ക് കഴിയും. ആത്മീയ സാധനയിൽ ഉയരങ്ങൾ കീഴടക്കാൻ ആഗ്രഹിക്കുന്നവർക്ക് വാരാഹിയെ ഒഴിവാക്കാനാകില്ല. കയ്യിലെ കലപ്പയും മുസലവുമേന്തി (ഉലക്ക), വഴിതെറ്റിപ്പോകുന്ന ഭക്തനെ ഒരു വടികൊണ്ട് തട്ടി നേരെയാക്കുന്ന കർക്കശക്കാരിയായ അമ്മ കൂടിയാണവൾ.
https://www.facebook.com/share/r/17Q5xchDST/
ക്ഷിപ്രപ്രസാദിയും കഠിനശിക്ഷയും
വാരാഹി ക്ഷിപ്രപ്രസാദിയാണ്—വിളിച്ചാൽ വിളിപ്പുറത്തെത്തും. ഭൗതിക നേട്ടങ്ങളും അളവറ്റ ധനലാഭവും നൽകാൻ മൂലാധാരത്തിന്റെ ഈ ദേവതയ്ക്ക് കഴിയും. കാരണം ഭൗതിക സമ്പത്തിന്റെ താക്കോൽ ഇരിക്കുന്നത് ഈ അധോലോകങ്ങളിലാണ്.
എന്നാൽ, ഇതിന് പിന്നിൽ ഒരു കരിനിഴലുണ്ട്! യൂട്യൂബിലും ഓൺലൈനിലും കാണുന്ന ‘വജ്രഘോഷ വാരാഹി’ തുടങ്ങിയ മന്ത്രങ്ങൾ കേട്ട് ആരും ചാടിക്കയറി ജപിക്കാൻ നിൽക്കരുത്. യോഗ്യനായൊരു ഗുരുവിന്റെ ഉപദേശമില്ലാതെ ഈ വാതിൽ തുറന്നാൽ അകത്തുനിന്നുള്ള അദൃശ്യശക്തികൾ നിങ്ങളെ തകർത്തുകളയും. വ്രതനിഷ്ടകളിൽ തെറ്റുവരുത്തിയാൽ ദണ്ഡനാഥയുടെ ശിക്ഷ കഠിനമായിരിക്കും. അപകടം നിറഞ്ഞ ഒരു ഇരുതലവാളാണ് വാരാഹി ഉപാസന.
പാതിരാ പഞ്ചമിയുടെ രഹസ്യങ്ങൾ
ഭൂമിക്കടിയിൽ വളരുന്ന കിഴങ്ങുകളായ കൂർക്കയും, ചേമ്പും, മഞ്ഞളുമൊക്കെയാണ് ഈ അധോലോക നായികയ്ക്ക് പ്രിയപ്പെട്ട നിവേദ്യങ്ങൾ. കുരുമുളകും കല്ലുപ്പും ചേർത്ത് ചുട്ടെടുത്ത ഈ വിഭവങ്ങൾ ദേവിക്ക് സമർപ്പിക്കുമ്പോൾ ആ ചൈതന്യം ഉണരും.
ചന്ദ്രന്റെ സോമകല വാരാഹിയായി മാറുന്ന ‘പഞ്ചമി തിഥി’യാണ് ദേവിയുടെ മഹാരാത്രി. അതിൽ ‘പാതിരാ പഞ്ചമി’ എന്നൊരു അതീവ നിഗൂഢമായ സമയമുണ്ട്. ആ സമയത്തുള്ള ഉപാസനയിലൂടെ കുട്ടികളുടെ മാറാരോഗങ്ങളും, മാരകമായ സർപ്പവിഷബാധകളും, മനസ്സിനെ ബാധിക്കുന്ന പൈശാചിക ഭയങ്ങളും പോലും അടിയറവ് പറയും.
വാരാഹി ഉപാസന എന്നത് വെറുമൊരു വഴിപാടല്ല; അത് ആത്മാവിന്റെ ആഴങ്ങളിലേക്ക്, ഇരുട്ടിലേക്ക് നടത്തുന്ന ഒരു സിരകളിൽ ചോരയോട്ടം കൂട്ടുന്ന തീർത്ഥാടനമാണ്!
