കാർവാർ: ഇന്ത്യയുടെ സമുദ്ര പ്രതിരോധശേഷി കൂടുതൽ ശക്തിപ്പെടുത്തുന്ന മറ്റൊരു തദ്ദേശീയ യുദ്ധക്കപ്പലായ ഐഎൻഎസ് മാൽവാൻ ഇന്ന് കർണാടകയിലെ കാർവാർ നാവികതാവളത്തിൽ ഇന്ത്യൻ നാവികസേനയുടെ ഭാഗമാകും. മാഹി ക്ലാസ് ആന്റി-സബ്മറൈൻ വാർഫെയർ ഷാലോ വാട്ടർ ക്രാഫ്റ്റുകളുടെ ശ്രേണിയിലെ രണ്ടാമത്തെ കപ്പലാണിത്.
വ്യോമസേനാ മേധാവി എയർ ചീഫ് മാർഷൽ എ.പി. സിംഗ് ചടങ്ങിൽ അധ്യക്ഷത വഹിക്കും. പശ്ചിമ നാവിക കമാൻഡിന്റെ ഫ്ലാഗ് ഓഫീസർ കമാൻഡിംഗ്-ഇൻ-ചീഫ് വൈസ് അഡ്മിറൽ സഞ്ജയ് വാത്സായൻ, മുതിർന്ന നാവിക ഉദ്യോഗസ്ഥർ, മുൻ സൈനികർ, മറ്റ് വിശിഷ്ടാതിഥികൾ എന്നിവർ ചടങ്ങിൽ പങ്കെടുക്കും.
ആത്മനിർഭർ ഭാരത് ദൗത്യത്തിന്റെ ഭാഗമായി കൊച്ചിൻ ഷിപ്പ്യാർഡ് നിർമിച്ച ഐഎൻഎസ് മാൽവാനിൽ 80 ശതമാനത്തിലധികം തദ്ദേശീയ സാങ്കേതികവിദ്യയും ഉപകരണങ്ങളും ഉപയോഗിച്ചിട്ടുണ്ട്. ആർബിയു-6000 ആന്റി-സബ്മറൈൻ റോക്കറ്റ് ലോഞ്ചറുകൾ, ഡിആർഡിഒ വികസിപ്പിച്ച ടോർപ്പിഡോകൾ, അത്യാധുനിക സോണാർ സംവിധാനങ്ങൾ എന്നിവയാൽ സജ്ജമായ ഈ യുദ്ധക്കപ്പൽ കടലിനടിയിലെ ഭീഷണികളെ നേരിടുന്നതിൽ ഇന്ത്യൻ നാവികസേനയ്ക്ക് നിർണായക കരുത്താകും.
സ്വദേശി യുദ്ധക്കപ്പൽ നിർമാണ രംഗത്ത് ഇന്ത്യ കൈവരിച്ച പുരോഗതിയുടെയും സമുദ്രസുരക്ഷയിലും അന്തർവാഹിനി വിരുദ്ധ യുദ്ധശേഷിയിലും രാജ്യത്തിന്റെ വളർച്ചയുടെയും മറ്റൊരു തെളിവായാണ് ഐഎൻഎസ് മാൽവാന്റെ കമ്മീഷനിംഗ് വിലയിരുത്തപ്പെടുന്നത്.