യൂജിന് (യുഎസ്എ): ലോക അണ്ടര്-20 അത്ലറ്റിക്സ് ചാമ്പ്യന്ഷിപ്പില് ചരിത്രനേട്ടവുമായി ഇന്ത്യ. ഹൈജമ്പില് വെള്ളിയും ലോങ്ജമ്പില് വെങ്കലവും സ്വന്തമാക്കി ബസന്ത് കുമാര് മേഗ്വാളും ഷാഹ്നവാസ് ഖാനും രാജ്യത്തിന്റെ അഭിമാനമായി. ഹൈജമ്പില് വെള്ളി നേടുന്ന ആദ്യ ഇന്ത്യന് താരമെന്ന ചരിത്രനേട്ടമാണ് ബസന്ത് സ്വന്തമാക്കിയത്. ലോങ്ജമ്പില് മെഡല് നേടുന്ന ആദ്യ ഇന്ത്യന് പുരുഷ താരമെന്ന റെക്കോര്ഡും ഷാഹ്നവാസ് കുറിച്ചു.
രാജസ്ഥാനില് നിന്നുള്ള 19-കാരനായ ബസന്ത് 2.21 മീറ്റര് ഉയരം മറികടന്നാണ് വെള്ളി മെഡല് നേടിയത്. രണ്ടാം ശ്രമത്തിലാണ് താരം ഈ ഉയരം കീഴടക്കിയത്. ഇതോടെ ബസന്തിന്റെ കരിയറിലെ ഏറ്റവും മികച്ച വ്യക്തിഗത പ്രകടനവും പിറന്നു. ആദ്യ ശ്രമത്തില് തന്നെ 2.21 മീറ്റര് മറികടന്ന അള്ജീരിയയുടെ യൂനസ് അയാച്ചി സ്വര്ണം നേടി. മൂന്നാം ശ്രമത്തിലാണ് ബ്രിട്ടന്റെ ഒറ്റിസ് പൂലെ 2.21 മീറ്റര് മറികടന്നത്. ഇതോടെ പൂലെ വെങ്കലവും സ്വന്തമാക്കി.
ലോങ്ജമ്പില് 7.84 മീറ്റര് ദൂരം കണ്ടെത്തിയാണ് 20-കാരനായ ഷാഹ്നവാസ് ഖാന് വെങ്കല മെഡല് നേടിയത്. ലോക അണ്ടര്-20 ചാമ്പ്യന്ഷിപ്പില് ലോങ്ജമ്പില് മെഡല് നേടുന്ന ആദ്യ ഇന്ത്യന് പുരുഷ അത്ലറ്റെന്ന നേട്ടമാണ് താരത്തിന്. 7.73 മീറ്റര് ചാടിയാണ് ഷാഹ്നവാസ് ഫൈനലിലേക്ക് യോഗ്യത നേടിയത്. ഫൈനലില് പ്രകടനം മെച്ചപ്പെടുത്തി 7.84 മീറ്ററിലെത്തിയ താരം മൂന്നാം സ്ഥാനവും മെഡലും ഉറപ്പിച്ചു. എന്നാല് തന്റെ വ്യക്തിഗത മികച്ച പ്രകടനമായ 8.30 മീറ്റര് മറികടക്കാന് ഷാഹ്നവാസിന് കഴിഞ്ഞില്ല.
ഇറ്റലിയുടെ ഡാനിയല് ഇന്സോലി 7.97 മീറ്റര് ചാടി സ്വര്ണവും ഓസ്ട്രേലിയയുടെ മാസണ് മഗ്രോഡര് 7.96 മീറ്റര് കണ്ടെത്തി വെള്ളിയും നേടി. ഇന്ത്യയുടെ മറ്റൊരു താരം ജിതിന് അര്ജുന് 7.55 മീറ്റര് ചാടി എട്ടാം സ്ഥാനത്താണ് ഫിനിഷ് ചെയ്തത്. ബസന്തിന്റെയും ഷാഹ്നവാസിന്റെയും മെഡലുകളോടെ ലോക അണ്ടര്-20 അത്ലറ്റിക്സ് ചാമ്പ്യന്ഷിപ്പില് ഇന്ത്യയുടെ മെഡല് നേട്ടം മൂന്നായി. ജാവലിന് ത്രോയില് നേരത്തെ ആശിഷ് യാദവ് വെള്ളി മെഡല് നേടിയിരുന്നു.