കണ്ണൂര്: ക്രിമിനല് കേസ് പ്രതി അര്ജുന് ആയങ്കിയെ 14 ദിവസത്തേക്ക് റിമാന്ഡ് ചെയ്തു. കൂത്തുപറമ്പ് മജിസ്ട്രേറ്റ് യദുകൃഷ്ണയാണ് അര്ജുനെ റിമാന്ഡ് ചെയ്തത്. ആഭ്യന്തര മന്ത്രി രമേശ് ചെന്നിത്തലയെ ഭീഷണിപ്പെടുത്തിയെന്നാരോപിച്ച് ഡിസിസി പ്രസിഡന്റ് മാര്ട്ടിന് ജോര്ജ് നല്കിയ പരാതിയില് കണ്ണൂര് സൈബര് പൊലീസ് രജിസ്റ്റര് ചെയ്ത കേസിലാണ് നടപടി. റിമാന്ഡ് ചെയ്ത അര്ജുന് ആയങ്കിയെ തലശ്ശേരി സബ് ജയിലിലേക്ക് മാറ്റും.
ദിവസങ്ങളായി കേരള പൊലീസ് നടത്തിയ അന്വേഷണത്തിനൊടുവിലാണ് ഇന്ന് പുലര്ച്ചെ കണ്ണൂരിലെ അഭിഭാഷകയുടെ ഫ്ലാറ്റില് നിന്ന് അര്ജുനെ പിടികൂടിയത്. ഉത്തരമേഖലാ ഡിഐജിയുടെ നേതൃത്വത്തിലുള്ള പൊലീസ് സംഘമാണ് പുലര്ച്ചെ രണ്ടുമണിയോടെ ഫ്ലാറ്റില് എത്തി അര്ജുനെ കസ്റ്റഡിയിലെടുത്തത്. പൊലീസ് എത്തിയപ്പോള് അര്ജുനൊപ്പം സുഹൃത്തായ മറ്റൊരാളും ഫ്ലാറ്റിലുണ്ടായിരുന്നു. രക്ഷപ്പെടാന് ശ്രമിച്ചെങ്കിലും പൊലീസ് പിന്തുടര്ന്ന് പിടികൂടുകയായിരുന്നു.
അര്ജുന് ആയങ്കി ഒളിവില് പോകാന് ഉപയോഗിച്ച കാര് ശനിയാഴ്ച പൊലീസ് കസ്റ്റഡിയിലെടുത്തിരുന്നു. കണ്ണൂര് പനങ്കാവില് ഉപേക്ഷിച്ച നിലയിലാണ് ഭാര്യയുടെ പേരിലുള്ള കാര് കണ്ടെത്തിയത്. ഇതോടെയാണ് അര്ജുന് കണ്ണൂരില് തന്നെ ഒളിവില് കഴിയുന്നുണ്ടെന്ന നിഗമനത്തിലേക്ക് പൊലീസ് എത്തിയത്. തുടര്ന്ന് കണ്ണൂര് കേന്ദ്രീകരിച്ച് പൊലീസ് അന്വേഷണം ശക്തമാക്കി. വിവിധ സംഘങ്ങളായി തിരിഞ്ഞ് നടത്തിയ അന്വേഷണത്തിലാണ് അര്ജുന്റെ ഒളിത്താവളം കണ്ടെത്തിയത്.
കണ്ണൂരിലെ കേസില് അറസ്റ്റ് രേഖപ്പെടുത്തിയതിന് പിന്നാലെ അര്ജുനെ എറണാകുളത്തേക്ക് മാറ്റിയേക്കും. ക്രമസമാധാന ചുമതലയുള്ള എഡിജിപിയുടെ നിര്ദേശപ്രകാരമായിരിക്കും തുടര്നടപടികള്. ദിവസങ്ങളോളം പൊലീസിനെ വെട്ടിച്ച് ഒളിവില് കഴിഞ്ഞിരുന്ന അര്ജുന് ആയങ്കിയുടെ അറസ്റ്റോടെ അന്വേഷണത്തില് നിര്ണായക വഴിത്തിരിവാണ് ഉണ്ടായിരിക്കുന്നത്.