ദുബൈ: 2027ലെ ഏകദിന ക്രിക്കറ്റ് ലോകകപ്പിന് ഗാന്ധിജയന്തി ദിനമായ ഒക്ടോബര് രണ്ടിന് തുടക്കമിടാന് ഐസിസി ആലോചിക്കുന്നതായി റിപ്പോര്ട്ട്. അഹിംസയുടെയും സമാധാനത്തിന്റെയും സന്ദേശം ലോകത്തിന് നല്കിയ മഹാത്മാഗാന്ധിയോടുള്ള ആദരസൂചകമായാണ് ടൂര്ണമെന്റ് ഒക്ടോബര് രണ്ടിന് ആരംഭിക്കാന് പദ്ധതിയിടുന്നതെന്നാണ് വിവരം.
ഗാന്ധിജി ജീവിതത്തിലെ 21 വര്ഷം ചെലവഴിച്ച ദക്ഷിണാഫ്രിക്കയിലാണ് അടുത്ത ഏകദിന ലോകകപ്പിന്റെ പ്രധാന വേദികള്. ദക്ഷിണാഫ്രിക്ക, സിംബാബ്വെ, നമീബിയ എന്നീ രാജ്യങ്ങളിലായാണ് ടൂര്ണമെന്റ് നടക്കുന്നത്. ഗാന്ധിജിക്ക് ദക്ഷിണാഫ്രിക്കയുമായുള്ള ചരിത്രപരമായ ബന്ധവും ലോകം വിവിധ തരത്തില് ധ്രുവീകരിക്കപ്പെടുന്ന സാഹചര്യത്തില് സമാധാനത്തിന്റെ സന്ദേശം നല്കേണ്ടതിന്റെ പ്രാധാന്യവും പരിഗണിച്ചാണ് തീയതി മാറ്റാന് ഐസിസി ആലോചിക്കുന്നതെന്നാണ് റിപ്പോര്ട്ട്.
നേരത്തെ ഒക്ടോബര് എട്ടിന് ലോകകപ്പ് ആരംഭിക്കാനായിരുന്നു ധാരണ. എന്നാല് പിന്നീട് തീയതി മാറ്റാനുള്ള നീക്കമുണ്ടായി. പുതിയ പദ്ധതി പ്രകാരം ഒക്ടോബര് രണ്ടിന് ആരംഭിക്കുന്ന ലോകകപ്പ് നവംബര് 21ന് അവസാനിക്കും. 14 ടീമുകള് പങ്കെടുക്കുന്ന ലോകകപ്പിലെ മത്സരങ്ങള് ദക്ഷിണാഫ്രിക്കയിലെ എട്ട് വേദികളിലും സിംബാബ്വെയിലെ മൂന്ന് വേദികളിലും നമീബിയയിലെ ഒരു വേദിയിലുമായാണ് നടത്തുക.
