ന്യൂഡല്‍ഹി: ഇന്ത്യന്‍ ക്രിക്കറ്റില്‍ വന്‍ അഴിച്ചുപണിക്ക് ബിസിസിഐ ഒരുങ്ങുന്നതായി റിപ്പോര്‍ട്ട്. മുന്‍ ഇന്ത്യന്‍ താരം കൂടിയായ നിലവിലെ സെന്റര്‍ ഓഫ് എക്‌സലന്‍സ് തലവന്‍ വി.വി.എസ്. ലക്ഷ്മണിന് കൂടുതല്‍ നിര്‍ണായക ചുമതല നല്‍കാന്‍ നീക്കമെന്നാണ് പുറത്തുവരുന്ന വിവരം. ‘ഡയറക്ടര്‍ ഓഫ് ക്രിക്കറ്റ്’ എന്ന പുതിയ ഉത്തരവാദിത്തം ലക്ഷ്മണിന് നല്‍കുന്ന കാര്യമാണ് ബിസിസിഐ പരിഗണിക്കുന്നതെന്നാണ് റിപ്പോര്‍ട്ടുകള്‍.
സെപ്റ്റംബറില്‍ ബിസിസിഐയിലെ ചില സുപ്രധാന തസ്തികകളില്‍ പുനഃസംഘടനയ്‌ക്ക് സാധ്യതയുള്ള സാഹചര്യത്തിലാണ് ലക്ഷ്മണിന്റെ പേരും സജീവമായി ഉയര്‍ന്നുവരുന്നത്. സീനിയര്‍ സെലക്ഷന്‍ കമ്മിറ്റി ചെയര്‍മാന്‍ അജിത് അഗാര്‍ക്കറുടെ കാലാവധി സെപ്റ്റംബറില്‍ അവസാനിക്കാനിരിക്കെ സെലക്ഷന്‍ സംവിധാനത്തിലും മാറ്റങ്ങള്‍ ഉണ്ടായേക്കുമെന്നാണ് സൂചന. അതേസമയം, അഗാര്‍ക്കറുടെ കാലാവധി 2027 ജൂണ്‍ വരെ നീട്ടിയേക്കുമെന്നും റിപ്പോര്‍ട്ടുകളുണ്ട്.
‘ഡയറക്ടര്‍ ഓഫ് ക്രിക്കറ്റ്’ പദവി നിലവില്‍ വന്നാല്‍ ഇന്ത്യന്‍ ക്രിക്കറ്റിന്റെ വിവിധ വിഭാഗങ്ങള്‍ തമ്മിലുള്ള ഏകോപനത്തില്‍ ലക്ഷ്മണിന് നിര്‍ണായക പങ്കുണ്ടാകും. സീനിയര്‍ ടീം, പരിശീലകര്‍, സെലക്ടര്‍മാര്‍, സെന്റര്‍ ഓഫ് എക്‌സലന്‍സ്, യുവതാരങ്ങളുടെ വികസനം എന്നിവ തമ്മിലുള്ള ഏകോപനം പുതിയ ചുമതലയുടെ ഭാഗമാകാന്‍ സാധ്യതയുണ്ട്.
ബംഗളൂരുവിലെ സെന്റര്‍ ഓഫ് എക്‌സലന്‍സില്‍ താരങ്ങളുടെ വികസനവുമായി ബന്ധപ്പെട്ട് ഇപ്പോള്‍ ലക്ഷ്മണ്‍ നിര്‍വഹിക്കുന്ന ചുമതലകളുടെ സ്വാഭാവികമായ വിപുലീകരണമായിരിക്കും പുതിയ പദവിയെന്നാണ് വിലയിരുത്തല്‍. പ്രതിഭകളെ കണ്ടെത്തുന്നതിലും അവരെ സീനിയര്‍ ടീമിലേക്ക് വളര്‍ത്തിയെടുക്കുന്നതിലും കൂടുതല്‍ ഏകോപിതമായ സംവിധാനമൊരുക്കാനും ഇത് സഹായിച്ചേക്കും. ലക്ഷ്മണിന്റെ പുതിയ ചുമതല സംബന്ധിച്ച ചര്‍ച്ചകള്‍ ഇന്ത്യന്‍ ടീമിന്റെ പരിശീലക സ്ഥാനവുമായും ചേര്‍ത്താണ് ഇപ്പോള്‍ വിലയിരുത്തപ്പെടുന്നത്. നേരത്തെയും വിവിധ ഘട്ടങ്ങളില്‍ സീനിയര്‍ ടീമിന്റെ ഇടക്കാല പരിശീലകനായി ലക്ഷ്മണ്‍ പ്രവര്‍ത്തിച്ചിട്ടുണ്ട്.
അടുത്തിടെ സിംബാബ്വെയ്‌ക്കെതിരായ ടി20 പരമ്പരയില്‍ ഗൗതം ഗംഭീറിനും സപ്പോര്‍ട്ട് സ്റ്റാഫിനും വിശ്രമം അനുവദിച്ചപ്പോള്‍ യുവ ഇന്ത്യന്‍ ടീമിന്റെ പരിശീലക ചുമതല ലക്ഷ്മണായിരുന്നു. പരമ്പരയില്‍ ഇന്ത്യ 3-0ന് ജയിക്കുകയും ചെയ്തു. ഇതോടെ ലക്ഷ്മണിന്റെ പരിശീലക മികവിനെക്കുറിച്ചുള്ള ചര്‍ച്ചകള്‍ക്കും വീണ്ടും ചൂടുപിടിച്ചിരുന്നു. എന്നാല്‍, ലക്ഷ്മണിനെ പുതിയ ഹെഡ് കോച്ചായി നിയമിക്കുമെന്ന തരത്തിലുള്ള സൂചനകളൊന്നും നിലവില്‍ ഇല്ല. 2024ല്‍ രാഹുല്‍ ദ്രാവിഡിന് ശേഷം ഇന്ത്യന്‍ ടീമിന്റെ ഹെഡ് കോച്ചാകാനുള്ള അവസരം ലക്ഷ്മണ്‍ സ്വീകരിച്ചിരുന്നില്ല. പകരം പുനഃസംഘടിപ്പിച്ച സെന്റര്‍ ഓഫ് എക്‌സലന്‍സിന്റെ ചുമതല ഏറ്റെടുക്കുകയായിരുന്നു.
ചീഫ് സെലക്ടര്‍ അജിത് അഗാര്‍ക്കറുടെ കാലാവധി സെപ്റ്റംബറില്‍ അവസാനിക്കാനിരിക്കുകയാണ്. 2027 ഏകദിന ലോകകപ്പിന് മുന്നോടിയായി ഇന്ത്യന്‍ ടീമിന്റെ സെലക്ഷന്‍ ഘടനയ്‌ക്ക് വലിയ പ്രാധാന്യമുള്ള സമയമാണിത്. അതിനാല്‍ സെലക്ഷന്‍ കമ്മിറ്റിയിലും പരിശീലക സംഘത്തിലും മറ്റ് ക്രിക്കറ്റ് ഭരണ ചുമതലകളിലും ബിസിസിഐ മാറ്റങ്ങള്‍ കൊണ്ടുവരുമോയെന്നാണ് ഇനി കാത്തിരുന്ന് കാണേണ്ടത്.
ലക്ഷ്മണിന് ‘ഡയറക്ടര്‍ ഓഫ് ക്രിക്കറ്റ്’ ചുമതല നല്‍കുന്ന കാര്യത്തില്‍ ബിസിസിഐയുടെ അന്തിമ തീരുമാനം പുറത്തുവന്നിട്ടില്ല. പുതിയ പദവിയുടെ കൃത്യമായ ഉത്തരവാദിത്തങ്ങളും ഇതുവരെ വ്യക്തമല്ല. എങ്കിലും തീരുമാനം നടപ്പായാല്‍ ഇന്ത്യന്‍ ക്രിക്കറ്റിന്റെ ഭാവി പദ്ധതികളില്‍ വി.വി.എസ്. ലക്ഷ്മണിന്റെ സ്വാധീനം കൂടുതല്‍ ശക്തമാകുമെന്നുറപ്പ്.
