ഗാള്: ശ്രീലങ്കയ്ക്കെതിരായ ഒന്നാം ടെസ്റ്റിന്റെ മൂന്നാം ദിനം മഴയെ തുടര്ന്ന് നേരത്തെ അവസാനിപ്പിച്ചെങ്കിലും മത്സരത്തില് ഇന്ത്യ ശക്തമായ നിലയില്. ഇന്ത്യയുടെ ഒന്നാം ഇന്നിങ്സ് സ്കോറായ 462 റണ്സിന് മറുപടിയായി ശ്രീലങ്ക 284 റണ്സിന് പുറത്തായി. ഇതോടെ ഇന്ത്യക്ക് 178 റണ്സിന്റെ നിര്ണായക ഒന്നാം ഇന്നിങ്സ് ലീഡ് ലഭിച്ചു. മാനവ് സുതാര് നാല് വിക്കറ്റും രവീന്ദ്ര ജഡേജ മൂന്ന് വിക്കറ്റും വീഴ്ത്തിയാണ് ശ്രീലങ്കന് ബാറ്റിങ് നിരയെ തകര്ത്തത്. 76 റണ്സ് വഴങ്ങി നാല് വിക്കറ്റാണ് സുതാര് നേടിയത്. ജഡേജ 57 റണ്സ് വഴങ്ങി മൂന്ന് വിക്കറ്റും സ്വന്തമാക്കി.
99 റണ്സിന് അഞ്ച് വിക്കറ്റ് എന്ന നിലയില് തകര്ന്ന ശ്രീലങ്കയെ സോണല് ദിനുഷയും നിരോഷന് ഡിക്ക്വെല്ലയും ചേര്ന്നാണ് കരകയറ്റിയത്. നാലാം ടെസ്റ്റ് മാത്രം കളിക്കുന്ന ദിനുഷ കന്നി ടെസ്റ്റ് സെഞ്ചുറി കുറിച്ചപ്പോള് ഡിക്ക്വെല്ല 80 റണ്സെടുത്തു. ഇരുവരും ചേര്ന്ന് ആറാം വിക്കറ്റില് 146 റണ്സിന്റെ കൂട്ടുകെട്ടുണ്ടാക്കി. 79.4 ഓവറില് ശ്രീലങ്കയുടെ ഇന്നിങ്സ് അവസാനിച്ചതിന് പിന്നാലെ മഴയെത്തുകയായിരുന്നു.
ഗ്രൗണ്ട് സ്റ്റാഫ് പിച്ചും ഔട്ട്ഫീല്ഡും പൂര്ണമായി മൂടിയതോടെ ശേഷിച്ച ഏകദേശം ഒരു മണിക്കൂര് കളി നടത്താനാകാതെ അംപയര്മാര് മൂന്നാം ദിനത്തെ കളി അവസാനിപ്പിച്ചു. നേരത്തെ ദേവ്ദത്ത് പടിക്കലിന്റെ തകര്പ്പന് 167 റണ്സിന്റെ കരുത്തിലാണ് ഇന്ത്യ 462 റണ്സെടുത്തത്. കെ.എല്. രാഹുല് 82 റണ്സും ധ്രുവ് ജുറേല് 51 റണ്സും നേടി ഇന്ത്യയുടെ കൂറ്റന് സ്കോറിന് പിന്തുണ നല്കി. സ്കോര്: ഇന്ത്യ 462, ശ്രീലങ്ക 284 (79.4 ഓവര്) ഇന്ത്യക്ക് 178 റണ്സിന്റെ ഒന്നാം ഇന്നിങ്സ് ലീഡ്.
