ഈസ്റ്റേണ് കേപ്: മുന് ലോക ചാമ്പ്യന് ബോക്സര് സൊലാനി ടെറ്റെ വെടിയേറ്റ് കൊല്ലപ്പെട്ടു. ദക്ഷിണാഫ്രിക്കയിലെ ഈസ്റ്റേണ് കേപ്പിലെ മഡാന്സെയ്നിലായിരുന്നു സംഭവം. 38 വയസായിരുന്നു. ടെറ്റെയ്ക്കൊപ്പം കാറിലുണ്ടായിരുന്ന 27കാരിക്കും വെടിയേറ്റു. ഗുരുതരമായി പരിക്കേറ്റ യുവതിയെ ആശുപത്രിയില് പ്രവേശിപ്പിച്ചു. വീട്ടിലെത്തിയ ടെറ്റെ ഗേറ്റ് തുറക്കുന്നതിനായി കാറില് കാത്തുനില്ക്കുന്നതിനിടെയാണ് ആക്രമണം.
മുഖംമൂടി ധരിച്ചെത്തിയ രണ്ട് ആയുധധാരികള് കാറിനുനേരെ വെടിയുതിര്ക്കുകയായിരുന്നു. ഗുരുതരമായി പരിക്കേറ്റ ടെറ്റെ സംഭവസ്ഥലത്തുതന്നെ മരിച്ചതായി പൊലീസ് അറിയിച്ചു. ആക്രമണത്തിന് ശേഷം പ്രതികള് രക്ഷപ്പെട്ടു. ടെറ്റെയുടെ മരണത്തില് ദക്ഷിണാഫ്രിക്കന് കായിക, കലാ, സാംസ്കാരിക മന്ത്രി ഗെയ്റ്റണ് മക്കെന്സി അനുശോചിച്ചു. രാജ്യത്തിന് ലഭിച്ച ഏറ്റവും മികച്ച പോരാളികളിലൊരാളെയാണ് നഷ്ടമായതെന്ന് അദ്ദേഹം പറഞ്ഞു.
‘ലാസ്റ്റ് ബോണ്’ എന്നറിയപ്പെട്ടിരുന്ന ടെറ്റെ വിവിധ ഭാരവിഭാഗങ്ങളിലായി ശ്രദ്ധേയമായ കരിയറാണ് സ്വന്തമാക്കിയത്. 2007 മുതല് 2008 വരെ ഡബ്ല്യുബിഎഫ് ഫ്ലൈവെയ്റ്റ് ലോക കിരീടം കൈവശംവെച്ച അദ്ദേഹം 2017ലും 2019ലും ഡബ്ല്യുബിഒ ബാന്റംവെയ്റ്റ് ലോക ചാമ്പ്യനായി. 2017ല് സഹതാരം സിബോണിസോ ഗൊന്യയെ വെറും 11 സെക്കന്ഡിനുള്ളില് നോക്കൗട്ട് ചെയ്തതും ടെറ്റെയുടെ കരിയറിലെ ശ്രദ്ധേയ നേട്ടമാണ്. ലോക ചാമ്പ്യന്ഷിപ്പ് പോരാട്ടത്തിലെ ഏറ്റവും വേഗമേറിയ നോക്കൗട്ടുകളിലൊന്നായി ഇത് രേഖപ്പെടുത്തി.
2022 ജൂലൈയില് നടന്ന മത്സരത്തിന് പിന്നാലെ സ്റ്റാനോസോളോള് ഉപയോഗിച്ചതിന് നാല് വര്ഷത്തെ വിലക്കും ടെറ്റെ നേരിട്ടിരുന്നു. 2026 ജൂലൈ 29ന് വിലക്ക് അവസാനിച്ചതിന് പിന്നാലെ വീണ്ടും റിങ്ങിലേക്ക് തിരിച്ചെത്താനുള്ള തയ്യാറെടുപ്പിലായിരുന്നു താരം. സംഭവത്തില് ദക്ഷിണാഫ്രിക്കന് പൊലീസ് അന്വേഷണം ആരംഭിച്ചിട്ടുണ്ട്. ആക്രമണത്തിന്റെ കാരണം വ്യക്തമല്ല.
