പുറത്തൂര് (മലപ്പുറം): പുറത്തൂര് പടിഞ്ഞാറെക്കരയില് യുവതിയുടെ മൃതദേഹം ചാക്കില് കെട്ടിയ നിലയില് പുഴയില് കണ്ടെത്തിയ സംഭവത്തില് ഭര്ത്താവ് അറസ്റ്റില്. അമ്പലപ്പടി അണ്ടിപ്പാട്ടില് ഫൗസിയയുടെ (37) മരണവുമായി ബന്ധപ്പെട്ട് ഭര്ത്താവ് ഹുസൈനെയാണ് പൊലീസ് അറസ്റ്റ് ചെയ്തത്. ശനിയാഴ്ച ഉച്ചയോടെയാണ് ഇയാള് പിടിയിലായത്. സംഭവത്തിന് പിന്നാലെ ഹുസൈന് ഒളിവിലായിരുന്നു.
തിരൂര്-പൊന്നാനി പുഴയില് പടിഞ്ഞാറെക്കര ബോട്ട് ജെട്ടിക്ക് സമീപം വെള്ളിയാഴ്ചയാണ് ഫൗസിയയുടെ മൃതദേഹം കണ്ടെത്തിയത്. ഫൗസിയയെ കഴുത്തുഞെരിച്ച് കൊലപ്പെടുത്തിയതാകാമെന്നാണ് പൊലീസിന്റെ പ്രാഥമിക നിഗമനം. വ്യാഴാഴ്ച പുലര്ച്ചെ ഹുസൈന് ഫൗസിയയെ വീട്ടില്നിന്ന് കൂട്ടിക്കൊണ്ടുപോയെന്നാണ് മക്കള് പൊലീസിന് നല്കിയ മൊഴി. മത്സ്യത്തൊഴിലാളിയായ ഹുസൈന് കടലില് വലയിട്ടപ്പോള് മീന് കുടുങ്ങിയിട്ടുണ്ടെന്നും അത് എടുക്കാന് കൂടെ വരണമെന്നും പറഞ്ഞാണ് മക്കള്ക്കൊപ്പം ഉറങ്ങുകയായിരുന്ന ഫൗസിയയെ വിളിച്ചുണര്ത്തി കൊണ്ടുപോയതെന്നാണ് മൊഴി.
രാവിലെ ഇരുവരെയും വീട്ടില് കാണാതായതോടെ ജോലിക്ക് പോയതാകാമെന്നാണ് മക്കള് കരുതിയത്. എന്നാല് വൈകീട്ടും ഇരുവരും തിരിച്ചെത്താതായതോടെ തിരൂര് പൊലീസില് പരാതി നല്കി. വെള്ളിയാഴ്ച ഉച്ചയോടെ പടിഞ്ഞാറെക്കര ബോട്ട് ജെട്ടിയില് മത്സ്യബന്ധനത്തിനായി ബോട്ട് കടലിലേക്ക് ഇറക്കുന്നതിനിടെ നങ്കൂരം ഉയര്ത്തുമ്പോഴാണ് ചാക്ക് ശ്രദ്ധയില്പ്പെട്ടത്. തുടര്ന്ന് പൊലീസ് നടത്തിയ പരിശോധനയിലാണ് ചാക്കിനുള്ളില് മൃതദേഹം കണ്ടെത്തിയത്.
വീടിന് ഏകദേശം ഒരു കിലോമീറ്റര് അകലെയായിരുന്നു മൃതദേഹം കണ്ടെത്തിയ സ്ഥലം. ഇന്ക്വസ്റ്റിന് ശേഷം മൃതദേഹം മഞ്ചേരി മെഡിക്കല് കോളജ് ആശുപത്രിയിലേക്ക് മാറ്റി. ഹുസൈന്റെ മൊബൈല് ഫോണ് വ്യാഴാഴ്ച പുറത്തൂര് ബസ് സ്റ്റാന്ഡിന് സമീപം ഓണായതായി അന്വേഷണത്തില് കണ്ടെത്തിയിരുന്നു. പിന്നീട് ഫോണ് സ്വിച്ച് ഓഫായി. ബുധനാഴ്ച രാത്രി ഫൗസിയയും ഹുസൈനും തമ്മില് വഴക്കുണ്ടായിരുന്നതായും പ്രദേശവാസികള് പൊലീസിനോട് പറഞ്ഞു. വഴക്കിനിടെ ഫൗസിയയുടെ വസ്ത്രങ്ങള് കീറുകയും തുടര്ന്ന് പ്രാണരക്ഷാര്ഥം അയല്വീട്ടിലേക്ക് ഓടിപ്പോകുകയും ചെയ്തിരുന്നുവെന്നാണ് വിവരം. സംഭവത്തില് പൊലീസ് വിശദമായ അന്വേഷണം തുടരുകയാണ്.
