അനന്തപുർ: കൂട്ടുകുടുംബങ്ങൾ അപ്രത്യക്ഷമാകുന്ന കാലത്ത് വ്യത്യസ്തമായ ജീവിതരീതിയുമായി വാർത്തകളിൽ ഇടംനേടുകയാണ് ആന്ധ്രാപ്രദേശിലെ ഒരു കുടുംബം. അനന്തപുർ ജില്ലയിലെ കുർളപ്പള്ളി ഗ്രാമത്തിലെ നാഗപ്പ കുടുംബത്തിൽ ആറ് തലമുറകളിലായി 83 പേരാണ് ഒരുമിച്ച് കഴിയുന്നത്.
നാല് വീടുകളിലായാണ് കുടുംബാംഗങ്ങൾ താമസിക്കുന്നതെങ്കിലും ജീവിതം ഒരൊറ്റ കുടുംബം പോലെയാണ്. ഒരേ അടുക്കള, ഒരേ ഭക്ഷണം, കൂട്ടായ സാമ്പത്തിക സംവിധാനം, ജോലികളുടെ വിഭജനം, കുടുംബത്തിലെ പ്രധാന തീരുമാനങ്ങൾ എന്നിവയെല്ലാം ഒരുമിച്ചാണ്.
83 പേർക്ക് ഭക്ഷണം; ദിവസവും 50 കിലോ അരി
ഇത്രയും വലിയ കുടുംബത്തിന് ഭക്ഷണം ഒരുക്കുന്നത് ചെറിയ കാര്യമല്ല. ദിവസവും ഏകദേശം 50 കിലോ അരിയാണ് പാകം ചെയ്യുന്നത്. വലിയ അളവിൽ വിറക് ഉപയോഗിച്ചാണ് ഭക്ഷണം പാകം ചെയ്യുന്നത്.
കുടുംബത്തിലെ മരുമക്കൾ ഉൾപ്പെടെയുള്ള സ്ത്രീകൾ ചേർന്നാണ് അടുക്കളയുടെ ചുമതല നിർവഹിക്കുന്നത്. ഒരാൾക്ക് പ്രത്യേകമായി ഒരു ഭക്ഷണമെന്ന രീതിയില്ല. എല്ലാവർക്കും ഒരേ കറിയും ചോറും കഞ്ഞിയുമാണ് തയ്യാറാക്കുന്നതെന്ന് കുടുംബാംഗങ്ങൾ പറയുന്നു.
രാവിലെ തുടങ്ങും കുടുംബയോഗം
ദിവസം തുടങ്ങുന്നത് കുടുംബയോഗത്തോടെയാണ്. മുതിർന്നവർ രാവിലെ കാപ്പിക്കൊപ്പം ഒത്തുകൂടി അന്നത്തെ കാര്യങ്ങൾ തീരുമാനിക്കും. എന്ത് ഭക്ഷണം തയ്യാറാക്കണം, എന്തൊക്കെ സാധനങ്ങൾ വാങ്ങണം, കൃഷിയിടത്തിലെ ജോലികൾ എന്തൊക്കെയാണ്, വീട്ടിലെ മറ്റ് ഉത്തരവാദിത്തങ്ങൾ ആർക്കൊക്കെയാണ് തുടങ്ങിയ കാര്യങ്ങൾ യോഗത്തിൽ തീരുമാനിക്കും.
തുടർന്ന് ഓരോരുത്തർക്കും ചുമതലകൾ വീതിച്ചുനൽകും. ചിലർ കൃഷിയിടങ്ങളിലേക്ക് പോകുമ്പോൾ മറ്റുചിലർ വീട്ടിൽ തുടരുകയും പാചകവും മറ്റ് വീട്ടുജോലികളും നോക്കുകയും ചെയ്യും.
120 ഏക്കർ കൃഷി; നാല് ബസുകളും
കൃഷിയാണ് കുടുംബത്തിന്റെ പ്രധാന വരുമാന മാർഗങ്ങളിലൊന്ന്. നാഗപ്പ കുടുംബത്തിന് ഏകദേശം 120 ഏക്കർ കൃഷിഭൂമിയുണ്ട്. ഇതിന് പുറമെ കുടുംബം ബസ് സർവീസ് ബിസിനസും നടത്തുന്നുണ്ട്.
കുടുംബത്തിന്റെ ഉടമസ്ഥതയിലുള്ള നാല് ബസുകൾ കല്യാണദുർഗം മുതൽ കർണാടകയിലെ വിവിധ പ്രദേശങ്ങളിലേക്കാണ് സർവീസ് നടത്തുന്നത്. കൃഷിയിൽനിന്നും ബസ് സർവീസിൽനിന്നും ലഭിക്കുന്ന വരുമാനം കുടുംബത്തിന്റെ പൊതുവായ സാമ്പത്തിക സംവിധാനത്തിലേക്കാണ് എത്തുന്നത്.
ദാരിദ്ര്യത്തിൽ നിന്ന് വളർച്ചയിലേക്ക്
കുടുംബത്തിലെ മുതിർന്നവർ പറയുന്നത് ഒരുമിച്ചുനിന്നതാണ് തങ്ങളുടെ ജീവിതം മാറ്റിമറിച്ചതെന്നാണ്. ഒരുകാലത്ത് അതീവ ദാരിദ്ര്യത്തിലായിരുന്നു കുടുംബമെന്നും ദിവസത്തിൽ ഒരു നേരത്തെ ഭക്ഷണം മാത്രമായിരുന്നു ലഭിച്ചിരുന്നതെന്നും മുതിർന്ന അംഗമായ മുത്ത്യാലപ്പ പറയുന്നു. കുടുംബാംഗങ്ങൾ വേർപിരിഞ്ഞ് കഴിഞ്ഞിരുന്നെങ്കിൽ ഇന്നത്തെ നിലയിലേക്ക് എത്താൻ കഴിയുമായിരുന്നില്ലെന്നും ഒരുമിച്ചുള്ള അധ്വാനമാണ് കുടുംബത്തിന്റെ വളർച്ചയ്ക്ക് കാരണമെന്നും അദ്ദേഹം പറയുന്നു.
ആറ് തലമുറകൾ ഒരുമിച്ച്
മുത്ത്യാലപ്പ, ഹനുമന്ത റായുഡു തുടങ്ങിയ മുതിർന്നവരുടെ നേതൃത്വത്തിലാണ് കുടുംബത്തിന്റെ പ്രവർത്തനങ്ങൾ ഏകോപിപ്പിക്കുന്നത്. അമ്മായിയമ്മമാർ, മരുമക്കൾ, കുട്ടികൾ, മുത്തശ്ശന്മാർ, മുത്തശ്ശിമാർ തുടങ്ങി വിവിധ തലമുറകളിലുള്ളവർ കുടുംബത്തിന്റെ ഭാഗമാണ്.
നാല് വീടുകൾ, പക്ഷേ ഒരു കുടുംബം
83 പേർ ഒരേ കെട്ടിടത്തിലാണ് താമസിക്കുന്നതെന്ന് കരുതേണ്ട. പരസ്പരം ചേർന്നുള്ള നാല് വീടുകളിലാണ് കുടുംബാംഗങ്ങൾ കഴിയുന്നത്. എന്നാൽ വീടുകൾ വേറെയാണെങ്കിലും അടുക്കളയും സാമ്പത്തിക കാര്യങ്ങളും ഭക്ഷണവും കുടുംബ ഉത്തരവാദിത്തങ്ങളും ഒന്നിച്ചാണ്.
കൂട്ടുകുടുംബങ്ങൾ അപൂർവമാകുന്ന കാലത്ത്, 83 പേരെ ഒരുമിച്ച് നിർത്തുന്നത് ഭക്ഷണമോ വീടോ അല്ല, പരസ്പര സഹകരണമാണെന്നാണ് നാഗപ്പ കുടുംബത്തിന്റെ ജീവിതം പറയുന്നത്