കാഠ്മണ്ഡു: നേപ്പാളിൽ നാശം വിതച്ച മിന്നൽപ്രളയത്തിൽ മരിച്ചവരുടെ എണ്ണം 469 ആയി ഉയർന്നു. 977 പേരെ കാണാതായതായും ഏറ്റവും പുതിയ ഔദ്യോഗിക റിപ്പോർട്ടിൽ വ്യക്തമാക്കുന്നു. കാണാതായവരിൽ 517 പേർ വിദേശ പൗരന്മാരാണ്. ദുരന്തബാധിത മേഖലകളിൽ തിരച്ചിലും രക്ഷാപ്രവർത്തനവും ശക്തമായി തുടരുകയാണ്.
നേപ്പാളിലെ ദുരന്ത നിവാരണ, റിസ്ക് റിഡക്ഷൻ ആൻഡ് മാനേജ്മെന്റ് വിഭാഗം പുറത്തുവിട്ട കണക്കുകൾ പ്രകാരം മരിച്ചവരിൽ നേപ്പാൾ പോലീസിലെ 28 ഉദ്യോഗസ്ഥരും നേപ്പാൾ ആർമിയിലെ 45 ഉദ്യോഗസ്ഥരും സായുധ പോലീസിലെ 13 ഉദ്യോഗസ്ഥരും 15 കസ്റ്റംസ് ഉദ്യോഗസ്ഥരും നാല് പൗരത്വ ഓഫീസ് ഉദ്യോഗസ്ഥരും ഉൾപ്പെടുന്നു.
സ്വന്തം നാട്ടിലേക്ക് മടങ്ങുന്നതിനിടെ വെള്ളപ്പൊക്കത്തിൽ കുടുങ്ങിയ വിദേശത്ത് താമസിക്കുന്ന 127 നേപ്പാൾ പൗരന്മാരും ദുരന്തത്തിന്റെ ഭാഗമായിട്ടുണ്ട്. 73 പേർക്ക് പരിക്കേറ്റതായും റിപ്പോർട്ടുണ്ട്.
വ്യാപകമായ ദുരന്തത്തിന്റെ പശ്ചാത്തലത്തിൽ രക്ഷാപ്രവർത്തനത്തിനായി 13,295 സുരക്ഷാ ഉദ്യോഗസ്ഥരെയാണ് വിന്യസിച്ചിരിക്കുന്നത്. ഇതിൽ 7,250 നേപ്പാൾ പോലീസ് ഉദ്യോഗസ്ഥരും 4,200 നേപ്പാൾ ആർമി ഉദ്യോഗസ്ഥരും 1,845 സായുധ പോലീസ് ഉദ്യോഗസ്ഥരും ഉൾപ്പെടുന്നു.
നേപ്പാൾ സൈന്യത്തിന്റെ ആറ് ഹെലികോപ്റ്ററുകൾ ഉൾപ്പെടെ 15 ഹെലികോപ്റ്ററുകളും രക്ഷാപ്രവർത്തനത്തിൽ ഏർപ്പെട്ടിട്ടുണ്ട്. ദുരന്തബാധിത മേഖലകൾ നേപ്പാൾ പ്രധാനമന്ത്രി ബാലേന്ദ്ര ഷാ നേരിട്ട് സന്ദർശിച്ച് സ്ഥിതിഗതികൾ വിലയിരുത്തി.
നേപ്പാളിലെ ദുരന്തത്തിൽ കുടുങ്ങിയ ഇന്ത്യക്കാരുടെ രക്ഷാപ്രവർത്തനവും ശക്തമായി തുടരുകയാണ്. വ്യാഴാഴ്ച രാത്രി എട്ട് മണിയോടെ 21 തമിഴർ ഉൾപ്പെടെ 84 ഇന്ത്യക്കാരെ രക്ഷപ്പെടുത്തിയതായി കേന്ദ്ര വിദേശകാര്യ മന്ത്രാലയം അറിയിച്ചു.
അതേസമയം, നേപ്പാൾ ടൂറിസം ബോർഡിന്റെ കണക്കുകൾ പ്രകാരം വെള്ളപ്പൊക്കത്തിന് പിന്നാലെ 400ലധികം വിനോദസഞ്ചാരികളുമായി ബന്ധപ്പെടാൻ കഴിഞ്ഞിട്ടില്ല. ഇവരിൽ 133 പേർ ഇന്ത്യക്കാരും 37 പേർ വിദേശത്ത് താമസിക്കുന്ന ഇന്ത്യൻ പൗരന്മാരുമാണ്.
ഓസ്‌ട്രേലിയ, ഇംഗ്ലണ്ട്, മലേഷ്യ, നെതർലാൻഡ്‌സ്, പോർച്ചുഗൽ, ദക്ഷിണാഫ്രിക്ക, ദക്ഷിണ കൊറിയ, അമേരിക്ക തുടങ്ങിയ രാജ്യങ്ങളിൽ നിന്നുള്ളവരും കാണാതായവരുടെ പട്ടികയിലുണ്ട്.
കാഠ്മണ്ഡുവിൽ നിന്ന് ഏകദേശം 150 കിലോമീറ്റർ വടക്കുള്ള റസുവ ജില്ലയിലാണ് ദുരന്തത്തിന്റെ വലിയ ആഘാതമുണ്ടായത്. റസുവഗാഡി മേഖലയിൽ ലെൻഡെ കോല നദിയും സമീപത്തെ ചെറുനദികളും ചേർന്ന് രൂപപ്പെടുന്ന നദി പെട്ടെന്ന് കരകവിഞ്ഞൊഴുകുകയായിരുന്നു.
റസുവയിലും സമീപത്തെ നുവാക്കോട്ട് ജില്ലയിലും വ്യാപക നാശനഷ്ടങ്ങളാണ് റിപ്പോർട്ട് ചെയ്തത്. നദിയുടെ ഇരുകരകളിലുമുള്ള വീടുകളും റോഡുകളും പാലങ്ങളും വെള്ളത്തിൽ ഒലിച്ചുപോയി.
നേപ്പാളിലെ ഇന്ത്യൻ എംബസി ദുരന്തബാധിതരായ ഇന്ത്യൻ പൗരന്മാർക്ക് സഹായവും വിവരങ്ങളും ലഭ്യമാക്കുന്നതിനായി അടിയന്തര നമ്പറുകൾ പ്രഖ്യാപിച്ചിട്ടുണ്ട്. +977 985 131 6807, +977 970 910 7500 എന്നീ നമ്പറുകളിൽ ബന്ധപ്പെടാം.
ദുരന്തത്തിന്റെ പശ്ചാത്തലത്തിൽ നേപ്പാൾ പ്രധാനമന്ത്രി ബാലേന്ദ്ര ഷാ ജനങ്ങളോട് ഐക്യത്തോടെ പ്രവർത്തിക്കണമെന്ന് അഭ്യർഥിച്ചു. രക്ഷാപ്രവർത്തനം, ചികിത്സ, ഭക്ഷണം, താമസം എന്നിവ ഉറപ്പാക്കാൻ സർക്കാർ പൂർണമായി രംഗത്തുണ്ടെന്നും അദ്ദേഹം അറിയിച്ചു.
രക്ഷാപ്രവർത്തനങ്ങൾക്ക് സഹായം നൽകണമെന്ന് നേപ്പാൾ സർക്കാർ ഇന്ത്യയോടും ചൈനയോടും അഭ്യർഥിച്ചിട്ടുണ്ട്.
കഴിഞ്ഞ 14 മാസത്തിനിടെ ലെൻഡെ കോല നദിയിൽ ഇത് രണ്ടാം തവണയാണ് വലിയ വെള്ളപ്പൊക്കമുണ്ടാകുന്നത്. ഇത്തവണ പ്രദേശത്തെ ഒരു ഹിമാനി തകർന്നതിനെ തുടർന്നുണ്ടായ ഹിമപാതമാണ് നദിയിലെ ജലപ്രവാഹം പെട്ടെന്ന് ഉയരാൻ കാരണമായതെന്നാണ് ദുരന്തസാധ്യതാ വിദഗ്ധരുടെ പ്രാഥമിക വിലയിരുത്തൽ.
നേപ്പാളിലെ ദുരന്തത്തിന്റെ വ്യാപ്തി മണിക്കൂറുകൾ പിന്നിടുന്തോറും വർധിക്കുകയാണ്.കാണാതായവർക്കായുള്ള തിരച്ചിലും വിദേശ പൗരന്മാരെ ഉൾപ്പെടെ സുരക്ഷിതരാക്കാനുള്ള രക്ഷാപ്രവർത്തനവും അതീവ നിർണായക ഘട്ടത്തിലാണ്.
