ന്യൂഡല്ഹി: കേന്ദ്രമന്ത്രിയും ലോക് ജനശക്തി പാര്ട്ടി (റാം വിലാസ്) അധ്യക്ഷനുമായ ചിരാഗ് പാസ്വാനെതിരെ വധഭീഷണി. ‘കൊടും ഭീകരര് ഉടന് തന്നെ മന്ത്രിയെ കൊല്ലും’ എന്ന് മുന്നറിയിപ്പ് നല്കുന്ന സന്ദേശമാണ് ലഭിച്ചതെന്ന് ചിരാഗ് പാസ്വാന്റെ ഓഫീസ് അറിയിച്ചു. ചിരാഗ് പാസ്വാന്റെ ഇസഡ് കാറ്റഗറി സുരക്ഷാ ചുമതലയുള്ള ഉദ്യോഗസ്ഥനാണ് ഒപ്പില്ലാത്ത രേഖാമൂലമുള്ള സന്ദേശം ലഭിച്ചത്. സംഭവത്തില് കേന്ദ്ര ആഭ്യന്തര മന്ത്രാലയം അടിയന്തര അന്വേഷണം നടത്തണമെന്ന് ചിരാഗ് പാസ്വാന്റെ ഓഫീസ് ആവശ്യപ്പെട്ടു.
ഭീഷണി സന്ദേശത്തിന്റെ ഉറവിടവും ആധികാരികതയും പരിശോധിക്കണമെന്നും മന്ത്രിയുടെ സുരക്ഷാ ക്രമീകരണങ്ങള് പുനഃപരിശോധിക്കണമെന്നും ആവശ്യപ്പെട്ട് കേന്ദ്ര ആഭ്യന്തര സെക്രട്ടറിക്ക് കത്തും നല്കി. കേന്ദ്ര ആഭ്യന്തര സെക്രട്ടറിക്ക് അയച്ച കത്തില് കേന്ദ്രമന്ത്രിയുടെ അഡീഷണല് പ്രൈവറ്റ് സെക്രട്ടറി അലോക് കുമാറാണ് സംഭവത്തിന്റെ ഗൗരവം ചൂണ്ടിക്കാട്ടിയത്. നിലവില് ആഭ്യന്തര മന്ത്രാലയം അനുവദിച്ച ഇസഡ് കാറ്റഗറി സുരക്ഷയാണ് ചിരാഗ് പാസ്വാന് ലഭിക്കുന്നത്.
ചൊവ്വാഴ്ച രണ്ട് മൊബൈല് നമ്പറുകള് ഉള്പ്പെട്ട ഒപ്പില്ലാത്ത ആശയവിനിമയമാണ് മന്ത്രാലയത്തിന് ലഭിച്ചതെന്ന് കത്തില് പറയുന്നു. സന്ദേശം തുറന്നപ്പോഴാണ് കേന്ദ്ര ഭക്ഷ്യസംസ്കരണ വ്യവസായ മന്ത്രിയുടെ ജീവന് നേരിട്ട് ഭീഷണിയുണ്ടെന്ന വിവരം ശ്രദ്ധയില്പ്പെട്ടത്. മൊബൈല് നമ്പറുകള്ക്ക് പുറമെ ഭീഷണി സംബന്ധിച്ച ഭാഗത്ത് ‘കൊടും ഭീകരര് നിങ്ങളെ ഉടന് കൊല്ലും’ എന്നായിരുന്നു രേഖപ്പെടുത്തിയിരുന്നതെന്ന് അലോക് കുമാര് കത്തില് വ്യക്തമാക്കി.
ഭീഷണിയുടെ നേരിട്ടുള്ള സ്വഭാവവും ‘കൊടും ഭീകരര്’ എന്ന പരാമര്ശവും ഗൗരവമായ ആശങ്കയ്ക്ക് ഇടയാക്കുന്നതാണെന്നും കത്തില് ചൂണ്ടിക്കാട്ടുന്നു. സംഭവത്തിന്റെ പശ്ചാത്തലത്തില് ഭീഷണി സന്ദേശത്തിന്റെ ഉറവിടം കണ്ടെത്തുന്നതിനും യാഥാര്ഥ്യം പരിശോധിക്കുന്നതിനും അടിയന്തര അന്വേഷണം വേണമെന്നാണ് ചിരാഗ് പാസ്വാന്റെ ഓഫീസ് ആവശ്യപ്പെട്ടിരിക്കുന്നത്.
