റോം: സൗദി അറേബ്യയിലെ തായിഫ് കിങ് ഫഹദ് വ്യോമതാവളത്തിന് നേരെയുണ്ടായ ആക്രമണത്തില് ഇറ്റലിയുടെ എഫ്-2000 യൂറോഫൈറ്റര് വിമാനത്തിന് കേടുപാടുകള് സംഭവിച്ചതായി ഇറ്റാലിയന് പ്രതിരോധ മന്ത്രി ഗ്വിഡോ ക്രൊസെറ്റോ. വിമാനത്തിലുണ്ടായിരുന്ന ഇറ്റാലിയന് സൈനികര്ക്കാര്ക്കും പരിക്കേറ്റിട്ടില്ല. വ്യോമതാവളത്തിന്റെ ആളൊഴിഞ്ഞ മേഖലയിലായിരുന്ന വിമാനത്തിനാണ് ആക്രമണത്തില് കേടുപാടുകള് സംഭവിച്ചത്. തായിഫ് വ്യോമതാവളത്തിലെ സ്ഥിതിഗതികള് സംബന്ധിച്ച് ചീഫ് ഓഫ് ഡിഫന്സ് സ്റ്റാഫ് ജനറല് ലൂസിയാനോ പോര്ട്ടൊലാനോയുമായി നിരന്തരം ബന്ധപ്പെട്ടിരുന്നുവെന്ന് ക്രൊസെറ്റോ പറഞ്ഞു. ഓപ്പറേഷന് ഇന്ഹറന്റ് റിസോള്വിന്റെ ഭാഗമായി തായിഫില് ഇറ്റാലിയന് സൈനികരും വിമാനങ്ങളും വിന്യസിച്ചിട്ടുണ്ട്.
ആക്രമണത്തില് ഇറ്റാലിയന് എഫ്-2000 വിമാനത്തിന് കേടുപാടുകള് സംഭവിച്ചെങ്കിലും ഇറ്റാലിയന് സൈനികര് ഉപയോഗിക്കുന്ന മറ്റ് വാഹനങ്ങള്ക്കോ അടിസ്ഥാന സൗകര്യങ്ങള്ക്കോ നാശനഷ്ടമുണ്ടായിട്ടില്ലെന്നും ക്രൊസെറ്റോ വ്യക്തമാക്കി. സൈനികരുടെ സുരക്ഷ ഉറപ്പാക്കുന്നതിനുള്ള നടപടികള് നേരത്തെ തന്നെ സ്വീകരിച്ചിരുന്നുവെന്നും അദ്ദേഹം അറിയിച്ചു. തായിഫിലെ ഇറ്റാലിയന് ടാസ്ക് ഫോഴ്സ് എയറില് നാല് എഫ്-2000എ യൂറോഫൈറ്റര് വിമാനങ്ങള്, ഇ-550എ കോണ്ഫോര്മല് എയര്ബോണ് എര്ലി വാണിങ് വിമാനം, സി-130ജെ/കെസി-130ജെ ഗതാഗത വിമാനങ്ങള് എന്നിവ ഉള്പ്പെടുന്നു. യൂറോഫൈറ്ററുകള് പ്രധാനമായും യുദ്ധവിമാന വിഭാഗത്തിലാണ് പ്രവര്ത്തിക്കുന്നത്. ഇ-550എ വിമാനം വ്യോമനിരീക്ഷണം, മുന്നറിയിപ്പ്, കമാന്ഡ് ആന്ഡ് കണ്ട്രോള് തുടങ്ങിയ ചുമതലകള് നിര്വഹിക്കുന്നു.
ഇറ്റാലിയന് യൂറോഫൈറ്ററുകള്ക്ക് നേരെയുണ്ടാകുന്ന സമാനമായ രണ്ടാമത്തെ സംഭവമാണിത്. മാര്ച്ചില് കുവൈത്തിലെ അലി അല് സലേം വ്യോമതാവളത്തിന് നേരെയുണ്ടായ ആക്രമണത്തില് അവിടെ വിന്യസിച്ചിരുന്ന രണ്ട് ഇറ്റാലിയന് എഫ്-2000 വിമാനങ്ങള്ക്കും കേടുപാടുകള് സംഭവിച്ചിരുന്നു. ആക്രമണത്തില് ഇറ്റലിയുടെ എംക്യു-9എ റീപ്പര് ഡ്രോണും തകര്ന്നിരുന്നു. ആക്രമണത്തില് നിന്നുണ്ടായ ഷ്രാപ്നല് പതിച്ചാണ് യൂറോഫൈറ്ററുകള്ക്ക് കേടുപാടുകള് സംഭവിച്ചതെന്നാണ് അന്ന് ഇറ്റാലിയന് മാധ്യമങ്ങള് റിപ്പോര്ട്ട് ചെയ്തത്. കുവൈത്തിലെയും സൗദിയിലെയും ഇറ്റാലിയന് സൈനിക വിന്യാസങ്ങള്ക്ക് വ്യത്യസ്ത ചുമതലകളാണുള്ളത്. കുവൈത്തിലെ സംഘം ഇറാഖ് കേന്ദ്രീകരിച്ചുള്ള ഇന്റലിജന്സ്, നിരീക്ഷണം, രഹസ്യാന്വേഷണ പ്രവര്ത്തനങ്ങള്ക്ക് പിന്തുണ നല്കുമ്പോള്, സൗദിയിലെ വിന്യാസത്തിന് വ്യോമപ്രതിരോധത്തിനും പ്രാദേശിക നിരീക്ഷണത്തിനുമാണ് കൂടുതല് പ്രാധാന്യം.