കൊച്ചി: സംവിധായകൻ സനൽകുമാർ ശശിധരനെതിരെ നടി മഞ്ജു വാര്യർ മാനനഷ്ടക്കേസ് ഫയൽ ചെയ്തു. എറണാകുളം മുനിസിഫ് കോടതിയിലാണ് മഞ്ജു വാര്യർ ഹർജി നൽകിയത്. തനിക്കെതിരെ സനൽകുമാർ ശശിധരൻ സമൂഹമാധ്യമങ്ങളിൽ പങ്കുവെച്ചിട്ടുള്ള പോസ്റ്റുകൾ നീക്കം ചെയ്യണമെന്നതും ഹർജിയിലെ പ്രധാന ആവശ്യങ്ങളിലൊന്നാണ്.
മഞ്ജു വാര്യരെക്കുറിച്ച് സംവിധായകൻ സനൽകുമാർ ശശിധരൻ നടത്തിയ വിവിധ പരാമർശങ്ങളും സമൂഹമാധ്യമ പോസ്റ്റുകളും ചൂണ്ടിക്കാട്ടിയാണ് നിയമനടപടി സ്വീകരിച്ചിരിക്കുന്നത്. പോസ്റ്റുകൾ വഴി തനിക്കെതിരെ അപകീർത്തികരമായ പരാമർശങ്ങൾ നടത്തിയെന്നാണ് മഞ്ജു വാര്യരുടെ ഹർജിയിലെ ആരോപണം.
അതേസമയം, മഞ്ജു വാര്യർ ഒരു റാക്കറ്റിന്റെ പിടിയിലാണെന്നും അവരെ അതിൽ നിന്ന് മോചിപ്പിക്കണമെന്നും ആവശ്യപ്പെട്ട് സനൽകുമാർ ശശിധരൻ സെക്രട്ടറിയേറ്റിന് മുന്നിൽ സമരം നടത്തിവരികയാണ്. മഞ്ജു വാര്യരുടെ സുരക്ഷയും നിലവിലെ സാഹചര്യങ്ങളും ഉയർത്തിക്കാട്ടി ഇയാൾ മഞ്ജു വാരിയരെ നിരന്തരം ആക്ഷേപിച്ചു വരികയാണ്.
ഈ ആരോപണങ്ങൾക്കും സമൂഹമാധ്യമങ്ങളിലെ പരാമർശങ്ങൾക്കുമെതിരെയാണ് മഞ്ജു വാര്യർ കോടതിയെ സമീപിച്ചിരിക്കുന്നത്. ആരോപണങ്ങളുടെ ഉള്ളടക്കം, അവ പ്രസിദ്ധീകരിച്ച സാഹചര്യം, തനിക്കുണ്ടായെന്നു പറയുന്ന മാനനഷ്ടം എന്നിവ ഹർജിയിൽ ഉന്നയിച്ചിട്ടുണ്ട്