ന്യൂയോർക്ക്: ആഗോളക്രമം കടുത്ത സമ്മർദ്ദത്തിലൂടെയാണ് കടന്നുപോകുന്നതെന്നും രാജ്യങ്ങൾ തമ്മിലുള്ള സഹകരണം കൂടുതൽ ശക്തിപ്പെടുത്തേണ്ട സമയമാണിതെന്നും വിദേശകാര്യമന്ത്രി എസ്. ജയശങ്കർ. യുഎൻ പൊതുസഭയുടെ 81-ാം സമ്മേളനത്തോടനുബന്ധിച്ച് നടന്ന Partners for Multilateralism Summit-ന്റെ ഉദ്ഘാടനച്ചടങ്ങിൽ സംസാരിക്കുകയായിരുന്നു അദ്ദേഹം.
ഭൗമരാഷ്ട്രീയ മത്സരങ്ങളും സംഘർഷങ്ങളും വർധിക്കുന്ന സാഹചര്യത്തിൽ രാജ്യങ്ങൾ തമ്മിലുള്ള ഭിന്നതകൾ കൂടുതൽ രൂക്ഷമാകാതെ ബഹുമുഖ സഹകരണ സംവിധാനത്തെ ശക്തിപ്പെടുത്തണമെന്ന് ജയശങ്കർ പറഞ്ഞു.
“ആഗോളക്രമം സമ്മർദ്ദത്തിലായിരിക്കുന്ന സമയത്താണ് നാം ഇവിടെ ഒത്തുകൂടുന്നത്. ഏതാനും പതിറ്റാണ്ടുകളായി ലോകത്ത് വലിയൊരു പുനഃസന്തുലനം നടന്നുവരികയാണ്. എന്നാൽ അതിരൂക്ഷമായ മത്സരം, ഭൗമരാഷ്ട്രീയ സംഘർഷങ്ങൾ, യഥാർഥ യുദ്ധങ്ങൾ എന്നിവ ഇതിന് മറ്റൊരു സ്വഭാവം നൽകിയിരിക്കുകയാണ്,” ജയശങ്കർ പറഞ്ഞു.
രാജ്യാന്തര സഹകരണം ദുർബലമാകരുത്
” ഭൗമരാഷ്ട്രീയ മത്സരങ്ങൾ നിയന്ത്രിക്കാതെ വിട്ടാൽ രാജ്യാന്തര സഹകരണത്തിന്റെ ആത്മാവ് തന്നെ ചോദ്യം ചെയ്യപ്പെടും. അതുകൊണ്ടുതന്നെ ഈ ഘട്ടത്തിൽ ബഹുമുഖ സഹകരണം ശക്തമായി മുന്നോട്ടുവരേണ്ടത് അനിവാര്യമാണ്,” അദ്ദേഹം പറഞ്ഞു.
സമാധാനവും സുരക്ഷയും, കാലാവസ്ഥാ പ്രവർത്തനങ്ങൾ, ധനസഹായം, പുതിയ സാങ്കേതികവിദ്യകൾ, ഭീകരവിരുദ്ധ പ്രവർത്തനം, വിതരണശൃംഖലയുടെ പ്രതിരോധശേഷി, ഭാവിയിലെ മഹാമാരികളെ നേരിടാനുള്ള തയ്യാറെടുപ്പ് തുടങ്ങിയ വിഷയങ്ങളിലെല്ലാം രാജ്യങ്ങളുടെ കൂട്ടായ പ്രവർത്തനം അനിവാര്യമാണെന്നും അദ്ദേഹം ചൂണ്ടിക്കാട്ടി.
രാജ്യാന്തര സംവിധാനത്തിലൂടെ കൂട്ടായ പ്രവർത്തനത്തിന്റെ ഭാഗമായി കൈവരിച്ച നേട്ടങ്ങൾ സംരക്ഷിക്കണമെന്നും അതേസമയം കൂടുതൽ പരിഷ്കരണങ്ങൾക്കായി ശ്രമിക്കണമെന്നും ജയശങ്കർ പറഞ്ഞു. യുഎൻ പോലുള്ള ആഗോള സ്ഥാപനങ്ങളിൽ കൂടുതൽ പ്രാതിനിധ്യവും പരിഷ്കരണവും വേണമെന്ന ഇന്ത്യയുടെ നിലപാടും ജയശങ്കറിന്റെ പ്രസംഗത്തിൽ പ്രതിഫലിച്ചു.
സംഘർഷങ്ങൾക്കിടയിലും പ്രായോഗിക പരിഹാരങ്ങൾ
നിലവിലുള്ള സംഘർഷങ്ങൾക്ക് സമഗ്രമായ പരിഹാരം കണ്ടെത്തുന്നതുവരെ കാത്തിരിക്കാതെ അടിയന്തര പ്രശ്നങ്ങളിൽ പ്രത്യേകമായി ഇടപെടണമെന്നും ജയശങ്കർ പറഞ്ഞു. വിശാലമായ സമാധാനശ്രമങ്ങൾ തുടരുന്നതിനൊപ്പം പ്രത്യേക മേഖലകളിലെ പ്രതിസന്ധികൾക്ക് പരിഹാരം കാണാൻ കഴിയണമെന്നും അദ്ദേഹം വ്യക്തമാക്കി. ഇന്ധനം, ഭക്ഷണം, വളം, ധനകാര്യം (Fuel, food, fertiliser and finance) എന്നിവയുമായി ബന്ധപ്പെട്ട ‘Four F crisis’ അടിയന്തരമായി പരിഗണിക്കേണ്ട വിഷയങ്ങളാണെന്നും അദ്ദേഹം പറഞ്ഞു.
പുതിയ സാങ്കേതികവിദ്യകൾക്ക് ആഗോള നിയന്ത്രണച്ചട്ടക്കൂട്
പുതിയ സാങ്കേതികവിദ്യകളും ഉയർന്നുവരുന്ന ശേഷികളും സൃഷ്ടിക്കുന്ന വെല്ലുവിളികൾ നേരിടാൻ ഉചിതമായ അന്താരാഷ്ട്ര ചട്ടക്കൂടുകളും സുരക്ഷാ മാനദണ്ഡങ്ങളും ആവശ്യമാണെന്നും ജയശങ്കർ പറഞ്ഞു.
വിതരണശൃംഖലകളിലെ തടസ്സങ്ങളും ഏതെങ്കിലും ഒരു കേന്ദ്രത്തെ ആശ്രയിക്കേണ്ട സാഹചര്യം സൃഷ്ടിക്കുന്ന ‘choke points’-ഉം ഒഴിവാക്കാൻ വിതരണ സ്രോതസ്സുകളുടെ വൈവിധ്യവൽക്കരണവും അപകടസാധ്യത കുറയ്ക്കുന്ന നടപടികളും പ്രോത്സാഹിപ്പിക്കണമെന്നും അദ്ദേഹം ആവശ്യപ്പെട്ടു.
യുഎൻ പരിഷ്കരണത്തിന് ഊന്നൽ
രാജ്യാന്തര സ്ഥാപനങ്ങളുടെ പ്രവർത്തനരീതിയിലും മാറ്റം വേണമെന്ന് ജയശങ്കർ ആവശ്യപ്പെട്ടു. കൂടുതൽ രാജ്യങ്ങളുടെ പങ്കാളിത്തത്തോടെയുള്ള ചർച്ചകളും തീരുമാനമെടുക്കുന്നതിലെ കൂടുതൽ സുതാര്യതയും അനിവാര്യമാണെന്ന് അദ്ദേഹം പറഞ്ഞു.
“കൂടുതൽ പങ്കാളിത്തത്തോടെയുള്ള ചർച്ചകളും കൂടുതൽ സുതാര്യമായ തീരുമാനമെടുക്കൽ രീതിയും ഏറെക്കാലമായുള്ള ആവശ്യമാണ്. ഇത് യുഎൻ സംവിധാനത്തിന് ആവശ്യമായ പ്രതീക്ഷയും ആത്മവിശ്വാസവും നൽകുകയും രാജ്യങ്ങൾ ഒരുമിച്ച് പ്രവർത്തിക്കാനുള്ള ദൃഢനിശ്ചയം ശക്തിപ്പെടുത്തുകയും ചെയ്യും,” അദ്ദേഹം പറഞ്ഞു.
ആഗോള ഭരണസംവിധാനം നിലവിലെ ലോക യാഥാർഥ്യങ്ങളെ പ്രതിഫലിപ്പിക്കണമെന്നും യുഎൻ സുരക്ഷാ കൗൺസിൽ ഉൾപ്പെടെയുള്ള ആഗോള സ്ഥാപനങ്ങളിൽ കൂടുതൽ പ്രാതിനിധ്യം വേണമെന്നും ഇന്ത്യ നേരത്തെ തന്നെ ആവശ്യപ്പെട്ടിരുന്നു.