ന്യൂഡൽഹി: വളർത്തുമകനെ ഇനി സംരക്ഷിക്കാൻ കഴിയില്ലെന്നും സംരക്ഷണ കേന്ദ്രത്തിലേക്ക് മാറ്റണമെന്നും ആവശ്യപ്പെട്ട് ഡൽഹി ഹൈക്കോടതിയെ സമീപിച്ച് നോയിഡ സ്വദേശിനിയായ വിധവ. 14കാരനായ മകനെ എട്ട് വർഷം മുൻപ് അസമിലെ അനാഥാലയത്തിൽ നിന്നാണ് യുവതിയും ഭർത്താവും ചേർന്ന് ദത്തെടുത്തത്. ദത്ത് നിലനിർത്തി കൊണ്ട് തന്നെ സംരക്ഷണ കേന്ദ്രത്തിലേക്ക് മാറ്റണമെന്നാണ് യുവതിയുടെ ആവശ്യം.
2021ൽ ഭർത്താവ് മരിച്ചതോടെ താൻ ഏക മാതാവായി. ഇതിനിടെ മകന്റെ പെരുമാറ്റത്തിലെ മാറ്റങ്ങളും വിവിധ പ്രശ്നങ്ങളും കൈകാര്യം ചെയ്യുന്നത് ബുദ്ധിമുട്ടായതോടെയാണ് കോടതിയെ സമീപിച്ചതെന്നും ഹർജിയിൽ പറയുന്നു. കുട്ടിക്ക് ‘ ബൗദ്ധിക വൈകല്യം’ (mild intellectual disability) കണ്ടെത്തിയിട്ടുണ്ടെന്നും ടെ പെരുമാറ്റ പ്രശ്നങ്ങൾ മൂലം ഒന്നിലധികം സ്കൂളുകളിൽ നിന്ന് പുറത്താക്കിയതായും അമ്മ കോടതിയെ അറിയിച്ചു.
ദത്തെടുത്തതിന് പിന്നാലെ തന്നെ കുട്ടിയുടെ പെരുമാറ്റത്തിൽ മാറ്റം ശ്രദ്ധയിൽപ്പെട്ടതായി ഹർജിയിൽ പറയുന്നു. അസമിൽ നിന്ന് നോയിഡയിലേക്കുള്ള താമസം മാറിയതിന്റെ പ്രതികരണമായിരിക്കാമെന്ന് ആദ്യം കരുതി. എന്നാൽ 2018ൽ സ്കൂളിൽ ചേർത്തതിന് പിന്നാലെ സഹപാഠിയോടുള്ള അനുചിതമായ പെരുമാറ്റത്തെ തുടർന്ന് കുട്ടിയെ പുറത്താക്കി.
2021ൽ ഭർത്താവിന്റെ മരണത്തിന് ശേഷം അലിഗഢിലെ സ്വന്തം അമ്മയ്ക്കൊപ്പം യുവതി താമസം മാറിയിരുന്നു. അവിടെയും മകനെ സ്കൂളിൽ ചേർത്തെങ്കിലും പെൺകുട്ടികളോടുള്ള മോശം പെരുമാറ്റം ചൂണ്ടിക്കാട്ടി സ്കൂളിൽ നിന്ന് പുറത്താക്കി.
മറ്റൊരു സംഭവത്തിൽ കുട്ടിയുടെ പെരുമാറ്റവുമായി ബന്ധപ്പെട്ട് പൊലീസ് സ്റ്റേഷനിൽ പരാതി ലഭിച്ചിരുന്നെങ്കിലും താൻ കാലുപിടിച്ച് അപേക്ഷിച്ചതിനാൽ പരാതിക്കാരൻ തുടർനടപടികളുമായി മുന്നോട്ട് പോയില്ലെന്നും യുവതി പറയുന്നു. വീട്ടിൽ നിന്ന് പണവും വിലപിടിപ്പുള്ള സാധനങ്ങളും മോഷ്ടിച്ച് കുട്ടി പുറത്തേക്ക് പോകുന്നു എന്നും ഹർജിയിൽ ആരോപിച്ചിട്ടുണ്ട്.
വീട്ടിൽ പുരുഷൻമാരില്ലെന്നും താനും പ്രായമായ അമ്മയും മാത്രമാണ് കുട്ടിക്കൊപ്പം താമസിക്കുന്നതെന്നും അമ്മ കോടതിയെ അറിയിച്ചു. ഇരുവർക്കും ആരോഗ്യപരമായ ബുദ്ധിമുട്ടുകൾ ഉണ്ടെന്നും കുട്ടിയുടെ പെരുമാറ്റം നിയന്ത്രിക്കാൻ കഴിയാത്ത സാഹചര്യത്തിലാണ് കോടതിയുടെ സഹായം തേടിയതെന്നും ഹർജിയിൽ പറയുന്നു.
കോടതിയുടെ ഇടപെടൽ
കേസിൽ കേന്ദ്ര വനിതാ-ശിശു വികസന മന്ത്രാലയം, സെൻട്രൽ അഡോപ്ഷൻ റിസോഴ്സ് അതോറിറ്റി (CARA), ചൈൽഡ് വെൽഫെയർ കമ്മിറ്റി എന്നിവരോട് ഒരാഴ്ചയ്ക്കകം മറുപടി നൽകാൻ ഡൽഹി ഹൈക്കോടതി നിർദേശിച്ചു. കേസ് സെപ്റ്റംബർ 30ന് വീണ്ടും പരിഗണിക്കും.
ദത്തെടുത്ത കുട്ടിയെ തിരികെ നൽകാനാകുമോ?
ജുവനൈൽ ജസ്റ്റിസ് (കെയർ ആൻഡ് പ്രൊട്ടക്ഷൻ ഓഫ് ചിൽഡ്രൻ) നിയമപ്രകാരമുള്ള ദത്തെടുക്കൽ ചട്ടങ്ങളിൽ, ചില പ്രത്യേക സാഹചര്യങ്ങളിൽ ദത്തെടുത്ത കുട്ടിയെ സംരക്ഷണ കേന്ദ്രത്തിലേക്ക് തിരികെ മാറ്റുന്നതിനുള്ള വ്യവസ്ഥകളുണ്ട്.
ദത്തെടുക്കൽ നടപടികൾ പൂർണമാകുന്നതിന് മുമ്പ് കുട്ടിക്ക് ദത്തെടുക്കുന്ന മാതാപിതാക്കളുമായി പൊരുത്തപ്പെടാൻ കഴിയാത്ത സാഹചര്യം ‘disruption’ എന്ന വിഭാഗത്തിൽ വരും. ദത്തെടുക്കൽ പൂർത്തിയായതിന് ശേഷം ദത്തെടുക്കൽ രേഖ റദ്ദാക്കുന്നതിനുള്ള നടപടിയാണ് ‘dissolution’. ഇതിന് കോടതി ഉത്തരവ് ആവശ്യമാണ്.
മുൻപ് സമാനമായ കേസുകളിൽ കോടതികൾ ദത്തെടുക്കൽ റദ്ദാക്കാൻ അനുമതി നൽകിയിട്ടുമുണ്ട്. 2020ൽ CARA നൽകിയ വിവരങ്ങൾ പ്രകാരം, 2017നും 2019നും ഇടയിൽ ദത്തെടുത്ത കുട്ടികളിൽ ഏകദേശം നാല് മുതൽ അഞ്ച് ശതമാനം വരെ പിന്നീട് അഡോപ്ഷൻ ഏജൻസികളിലേക്ക് തിരിച്ചെത്തിയിരുന്നു.