ന്യൂയോർക്ക്: ഭീകരവാദവുമായി ബന്ധപ്പെട്ട ചോദ്യവുമായി തന്നെ സമീപിച്ച പാകിസ്താൻ മാധ്യമപ്രവർത്തകന് ശക്തമായ മറുപടിയുമായി വിദേശകാര്യ മന്ത്രി എസ്. ജയശങ്കർ. “ഒരു ഭീകരരാജ്യമാണ് എന്നോട് ഈ ചോദ്യം ചോദിക്കുന്നത്.…” എന്നായിരുന്നു ജയശങ്കറുടെ പ്രതികരണം. ന്യൂയോർക്കിൽ 81-ാമത് യുഎൻ പൊതുസഭാ സമ്മേളനത്തോടനുബന്ധിച്ച് നടന്ന മാധ്യമസംവാദത്തിനിടെയായിരുന്നു സംഭവം.
“പാകിസ്താനിലെ ഭീകരവാദത്തിന് പിന്തുണ നൽകുന്നത് നിങ്ങളുടെ സർക്കാർ എപ്പോൾ അവസാനിപ്പിക്കും?” എന്നായിരുന്നു പാക് മാധ്യമ പ്രവർത്തകന്റെ അതിവിചിത്ര ചോദ്യം. ഇതിന് മറുപടിയായാണ് ജയശങ്കർ ശക്തമായ പ്രതികരണം നടത്തിയത്.
ജയശങ്കറും ലൈബീരിയൻ വിദേശകാര്യ മന്ത്രി സാറ ബെസലോ ന്യാന്റിയും ചേർന്ന് ‘Group of Friends on Safety and Security of Shipping and Seafarers’ എന്ന സംരംഭവുമായി ബന്ധപ്പെട്ട് മാധ്യമങ്ങളെ അഭിസംബോധന ചെയ്തതിന് പിന്നാലെയായിരുന്നു ചോദ്യം. ഇന്ത്യയുടെ യുഎന്നിലെ സ്ഥിരം പ്രതിനിധി ഹരീഷ് പാർവതനേനി പിന്നീട് മാധ്യമപ്രവർത്തകനോട് “താങ്കൾ മറുപടി കേട്ടല്ലോ. വളരെ വ്യക്തമായ മറുപടിയാണ് ലഭിച്ചത്” എന്ന് പറഞ്ഞു.
വാണിജ്യ കപ്പലുകൾക്ക് നേരെയുള്ള ആക്രമണങ്ങളിൽ ആശങ്ക
ഇതിനിടെ, ഗൾഫ്, ചെങ്കടൽ, കരിങ്കടൽ മേഖലകളിൽ വാണിജ്യ കപ്പലുകൾക്കും നാവികർക്കുമെതിരെ ആവർത്തിക്കുന്ന ആക്രമണങ്ങളിൽ ജയശങ്കർ ആശങ്ക രേഖപ്പെടുത്തി. കരിങ്കടലിലെ ആക്രമണങ്ങളും ജയശങ്കർ യുഎന്നിൽ പരാമർശിച്ചു.
വാണിജ്യ കപ്പലുകൾക്ക് നേരെയുള്ള ഇത്തരം ആക്രമണങ്ങൾ ഒറ്റപ്പെട്ട സംഭവങ്ങളല്ലെന്നും അന്താരാഷ്ട്ര സമൂഹം ഒന്നിച്ച് നിന്ന് ഇത്തരം ആക്രമണങ്ങൾ തടയണമെന്നും ജയശങ്കർ ആവശ്യപ്പെട്ടു. വാണിജ്യ ഗതാഗതത്തെ തടസ്സപ്പെടുത്തുകയും നിരപരാധികളുടെ ജീവനെടുക്കുകയും ചെയ്യുന്ന ഇത്തരം ആക്രമണങ്ങൾക്ക് ന്യായീകരണമില്ലെന്നും അദ്ദേഹം വ്യക്തമാക്കി.
