അരുണാചലില്‍ സൈനികര്‍ക്ക് നേരെ മിലിറ്റന്റ് ആക്രമണം; ഒരാള്‍ കൊല്ലപ്പെട്ടു, നാല് പേര്‍ക്ക് പരിക്ക്

ഇറ്റാനഗര്‍: അരുണാചല്‍ പ്രദേശിലെ ഇന്ത്യ-മ്യാന്‍മര്‍ അതിര്‍ത്തിയില്‍ അസം റൈഫിള്‍സ് പട്രോളിങ് സംഘത്തിന് നേരെ വെടിവയ്പ്. ചാങ്ലാങ് ജില്ലയില്‍ നടന്ന ആക്രമണത്തില്‍ ഒരു ജവാന്‍ വീരമൃത്യു വരിക്കുകയും നാല് പേര്‍ക്ക് പരിക്കേല്‍ക്കുകയും ചെയ്തു. ചൊവ്വാഴ്ച രാവിലെയാണ് സംഭവം. നാംപോങ് സര്‍ക്കിളിന് കീഴിലെ നാംപോങ് നള്ളയ്‌ക്ക് സമീപം രാവിലെ 6.30ഓടെയാണ് ആക്രമണമുണ്ടായതെന്നാണ് പ്രാഥമിക വിവരം. അതിര്‍ത്തി വേലി നിര്‍മാണം നടക്കുന്ന മേഖലയില്‍ 21 അസം റൈഫിള്‍സിന്റെ സംഘം പട്രോളിങ് നടത്തുന്നതിനിടെയാണ് ആക്രമണമുണ്ടായത്.

പ്രാഥമിക റിപ്പോര്‍ട്ടുകള്‍ പ്രകാരം സംശയിക്കപ്പെടുന്ന മിലിറ്റന്റുകള്‍ പട്രോളിങ് സംഘത്തിന് നേരെ വെടിയുതിര്‍ക്കുകയായിരുന്നു. ആക്രമണത്തില്‍ 42കാരനായ ഹവില്‍ദാര്‍ ജന്‍ഖോഖായ് കുക്കി കൊല്ലപ്പെട്ടു. നാല് സൈനികര്‍ക്ക് പരിക്കേറ്റതായും ഇവരെ ചികിത്സയ്‌ക്കായി മാറ്റിയതായും അധികൃതര്‍ അറിയിച്ചു. പരിക്കേറ്റവരുടെ ആരോഗ്യനില സംബന്ധിച്ച കൂടുതല്‍ വിവരങ്ങള്‍ ലഭ്യമായിട്ടില്ല. സംഭവത്തിന് പിന്നാലെ പ്രദേശത്ത് സുരക്ഷാസേന പരിശോധനയും തിരച്ചിലും ശക്തമാക്കി.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

NSCN (K-YA) വിഭാഗത്തില്‍പ്പെട്ട മിലിറ്റന്റുകള്‍ക്ക് ആക്രമണത്തില്‍ പങ്കുണ്ടാകാമെന്നാണ് പ്രാഥമിക നിഗമനം. എന്നാല്‍ ആക്രമണത്തിന് പിന്നിലുള്ളവരുടെ വ്യക്തമായ വിവരം ഔദ്യോഗികമായി സ്ഥിരീകരിച്ചിട്ടില്ല.
സംഭവത്തില്‍ അസം റൈഫിള്‍സിന്റെ ഔദ്യോഗിക പ്രതികരണം പുറത്തുവന്നിട്ടില്ല.
സംഭവത്തെക്കുറിച്ച് വിവരം ലഭിച്ചതായി ചാങ്ലാങ് എസ്പി കിര്‍ലി പാഡു അറിയിച്ചു. കൂടുതല്‍ വിവരങ്ങള്‍ ശേഖരിക്കാന്‍ ചാങ്ലാങ് പൊലീസ് സ്റ്റേഷനിലെ ഓഫീസര്‍ ഇന്‍ ചാര്‍ജിന് നിര്‍ദേശം നല്‍കിയതായും അദ്ദേഹം വ്യക്തമാക്കി. ഇന്ത്യ-മ്യാന്‍മര്‍ അതിര്‍ത്തിയിലെ ചാങ്ലാങ് മേഖലയില്‍ അതിര്‍ത്തിക്കപ്പുറത്തും ഇപ്പുറത്തും പ്രവര്‍ത്തിക്കുന്ന വിമത സംഘടനകളുടെ സാന്നിധ്യം കാരണം സുരക്ഷാ പ്രാധാന്യമുള്ള മേഖലയാണ്.