കോട്ടയം: പാലരുവി എക്സ്പ്രസ് ട്രെയിനിൽ മദ്യപിച്ച് ബഹളം ഉണ്ടാക്കിയെന്ന പരാതിയിൽ 37കാരനെ ആർപിഎഫ് കസ്റ്റഡിയിലെടുത്തു. ജോജി ജോർജ് ആണ് കസ്റ്റഡിയിലായത്.
രാവിലെ മദ്യവുമായി ട്രെയിനിൽ കയറിയ ജോജി ട്രെയിനിൽവച്ച് പരസ്യമായി മദ്യപിക്കുകയും യാത്രക്കാരെ അസഭ്യം പറയുകയും ചെയ്തെന്നാണ് പരാതി. സ്ത്രീകളടക്കമുള്ള യാത്രക്കാരെ അസഭ്യം പറഞ്ഞതായും പരാതിയുണ്ട്. ഇതോടെ യാത്രക്കാർ ആർപിഎഫിനെ വിവരമറിയിക്കുകയായിരുന്നു.
പാലരുവി എക്സ്പ്രസ് കോട്ടയം റെയിൽവേ സ്റ്റേഷനിലെത്തിയതോടെ ആർപിഎഫ് ഉദ്യോഗസ്ഥർ ട്രെയിനിലെത്തി ജോജിയെ കസ്റ്റഡിയിലെടുത്തു. തുടർന്ന് ഇയാളെ റെയിൽവേ പൊലീസിന് കൈമാറി.
പൊലീസ് സ്റ്റേഷനിലും അക്രമാസക്തനെന്ന് പരാതി
കസ്റ്റഡിയിലെടുത്ത് റെയിൽവേ പൊലീസ് സ്റ്റേഷനിലെത്തിച്ചപ്പോഴും ജോജി അക്രമാസക്തമായ പെരുമാറ്റം തുടർന്നതായാണ് വിവരം. പൊലീസുകാരെയും അസഭ്യം പറഞ്ഞതായി അധികൃതർ അറിയിച്ചു.
ട്രെയിനിൽ യാത്രക്കാർക്ക് ബുദ്ധിമുട്ടുണ്ടാക്കിയെന്ന പരാതിയെ തുടർന്നാണ് ആർപിഎഫ് ഇടപെട്ടത്. സംഭവത്തിൽ റെയിൽവേ പൊലീസ് തുടർനടപടികൾ സ്വീകരിച്ചുവരികയാണ്.