തിരുവനന്തപുരം: മുസ്ലിം ലീഗ് നേതാവും മുൻ മന്ത്രിയുമായ ഡോ. എം.കെ. മുനീറിനെ സംസ്ഥാന ഭരണപരിഷ്കാര കമ്മീഷൻ അധ്യക്ഷനായി നിയമിക്കാൻ മന്ത്രിസഭാ യോഗത്തിൽ തീരുമാനം. കാബിനറ്റ് പദവിയോടെയാണ് മുനീറിന്റെ നിയമനം. യു.ഡി.എഫിലെ പദവി വിഭജനവുമായി ബന്ധപ്പെട്ട് നേരത്തെ തന്നെ മുനീറിന്റെ പേര് ഈ സ്ഥാനത്തേക്ക് ഉയർന്നിരുന്നു.
മന്ത്രിസഭാ യോഗത്തിലാണ് നിയമനത്തിന് ഔദ്യോഗിക അംഗീകാരം നൽകിയത്. ഭരണപരിഷ്കാര കമ്മീഷൻ അധ്യക്ഷ സ്ഥാനം മുസ്ലിം ലീഗിന് നൽകുന്നതുമായി ബന്ധപ്പെട്ട് മുന്നണിയിൽ നേരത്തെ ചർച്ചകൾ നടന്നിരുന്നു. കോൺഗ്രസ് നേതൃത്വവും ഈ പദവിയിൽ അവകാശവാദം ഉന്നയിച്ചിരുന്നു. എന്നാൽ ഒടുവിൽ മുസ്ലിം ലീഗിന്റെ സമ്മർദ്ദത്തിന് വഴങ്ങി എം.കെ. മുനീറിനെ അധ്യക്ഷനാക്കാമെന്നു യു.ഡി.എഫ്. നേതൃത്വം സമ്മതിക്കുകയായിരുന്നു.
കാബിനറ്റ് റാങ്ക് ലഭിക്കുന്നതോടെ സർക്കാരിലെ പ്രധാന പദവികളിലൊന്നാണ് മുനീറിന് ലഭിക്കുന്നത്. യു.ഡി.എഫിലെ വിവിധ ഘടകകക്ഷികൾക്ക് ബോർഡ്, കോർപ്പറേഷൻ അധ്യക്ഷ സ്ഥാനങ്ങളും കാബിനറ്റ് റാങ്കോടെയുള്ള പദവികളും വീതംവയ്ക്കുന്നതിന്റെ ഭാഗമായാണ് തീരുമാനം.
ജി. ദേവരാജൻ ഡൽഹിയിൽ കേരളത്തിന്റെ പ്രത്യേക പ്രതിനിധി
ഫോർവേഡ് ബ്ലോക്ക് ദേശീയ ജനറൽ സെക്രട്ടറി ജി. ദേവരാജനെ കേരള സർക്കാരിന്റെ ഡൽഹിയിലെ പ്രത്യേക പ്രതിനിധിയായും നിയമിക്കാൻ തീരുമാനിച്ചിട്ടുണ്ട്.