ന്യൂഡൽഹി: ദുബായിൽ നിന്ന് ടെൽ അവീവിലേക്ക് പറന്ന ഫ്ലൈദുബായ് വിമാനത്തിൽ ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിനെ സഹപൈലറ്റ് ആക്രമിച്ചത് കോക്പിറ്റിൽ സൂക്ഷിച്ചിരുന്ന ക്രാഷ് ആക്സ് ഉപയോഗിച്ചെന്ന് യുഎഇ പ്രോസിക്യൂട്ടർമാർ. സംഭവത്തെ ‘ഭീകരാക്രമണം’ എന്നാണ് യുഎഇ അധികൃതർ വിശേഷിപ്പിച്ചത്. സഹപൈലറ്റ് ഹമാം അൽഹമ്മാമി വിമാനത്തിന്റെ നിയന്ത്രണം ഏറ്റെടുക്കാൻ ശ്രമിച്ചെന്നും അധികൃതർ വ്യക്തമാക്കി.
വിമാനത്തിലെ കോക്പിറ്റിൽ അടിയന്തര സാഹചര്യങ്ങൾ നേരിടുന്നതിനായി നിർബന്ധമായും സൂക്ഷിക്കുന്ന ഉപകരണമാണ് ‘ക്രാഷ് ആക്സ്’. അന്താരാഷ്‌ട്ര വ്യോമയാന ചട്ടങ്ങൾ പ്രകാരം വാണിജ്യ വിമാനങ്ങളിൽ ഇത് നിർബന്ധമാണ്. 9/11 ഭീകരാക്രമണത്തിന് പിന്നാലെയാണ് ഇത്തരം ഉപകരണങ്ങൾ പ്രധാന കാബിനുകളിൽ നിന്ന് കോക്പിറ്റുകളിലേക്ക് മാറ്റിയത്.
സംഭവത്തിൽ അൽഹമ്മാമി ഒറ്റയ്‌ക്കാണോ ആക്രമണം ആസൂത്രണം ചെയ്തതെന്നും ഏതെങ്കിലും തീവ്രവാദ സംഘടനകളുമായി ബന്ധമുണ്ടോയെന്നും കണ്ടെത്താൻ അന്വേഷണം തുടരുകയാണ്.
തീവ്രവാദ ബന്ധവും അന്വേഷണത്തിൽ
ഒമാൻ സ്വദേശിയായ ഹമാം അൽഹമ്മാമിയെക്കുറിച്ചും അന്വേഷണ സംഘം വിശദമായി പരിശോധിക്കുന്നുണ്ട്. തീവ്രവാദ ബന്ധമുണ്ടെന്ന സംശയത്തെെ തുടർന്ന് 2024ൽ എയർ ഒമാൻ പൈലറ്റ് ജോലിയിൽ നിന്നും ഇയാളെ വിലക്കിയിരുന്നതായി റിപ്പോർട്ടുകളുണ്ട്.
തുടർന്ന് ഒമാൻ എയറിൽ അഡ്മിനിസ്ട്രേറ്റീവ് വിഭാഗത്തിഷ തുടർന്ന ഇയാൾ 2025 ഫെബ്രുവരിയിൽ ജോലി രാജിവെച്ചു . പിന്നീട് റോയൽ എയർ മറോക്കിൽ ചേർന്നെങ്കിലും ഈ വർഷം ജനുവരിയിൽ ആ ജോലിയും ഉപേക്ഷിച്ചു. ഇതിന് പിന്നാലെയാണ് ഫ്ലൈദുബായിൽ സഹപൈലറ്റായി ജോലി ലഭിച്ചത്. വിമാനം ഇസ്രായേലിൽ ഇടിച്ചിറക്കുകയായിരുന്നു അൽഹമ്മാമിയുടെ ലക്ഷ്യമെന്ന സൂചനകളും അന്വേഷണവുമായി ബന്ധപ്പെട്ട് പുറത്തുവന്നിട്ടുണ്ട്.
ബുധനാഴ്ചയാണ് വൻ ദുരന്തത്തിന് വഴിവെച്ച സംഭവം നടന്നത്. 170ലേറെ യാത്രക്കാരുമായി സഞ്ചരിച്ചിരുന്ന ബോയിംഗ് 737 വിമാനത്തിന്റെ നിയന്ത്രണം അൽഹമ്മാമി അട്ടിമറിക്കാൻ ശ്രമിച്ചെന്നാണ് അന്വേഷണ സംഘത്തിന്റെ കണ്ടെത്തൽ. വിമാനത്തിൽ 24 കുട്ടികളടക്കം നിരവധി യാത്രക്കാരുണ്ടായിരുന്നു.
ഏകദേശം 34,000 അടി ഉയരത്തിൽ പറക്കുന്നതിനിടെ വിമാനം അതിവേഗം താഴേക്ക് പതിക്കാൻ തുടങ്ങി. ഒരു ഘട്ടത്തിൽ മിനിറ്റിൽ ഏകദേശം 23,000 അടി വേഗത്തിലാണ് വിമാനം താഴേക്ക് പോയത്. വിമാനം ഏകദേശം 15,600 അടി ഉയരത്തിലെത്തിയപ്പോഴാണ് സ്ഥിതിഗതികൾ നിയന്ത്രണവിധേയമായത്.
അക്രമം തടയാൻ ശ്രമിച്ച സ്മിത് മച്ചാറിനെയും സഹപൈലറ്റ് ആക്രമിച്ചു. ഗുരുതരമായി പരിക്കേറ്റിട്ടും പൈലറ്റ് കോക്പിറ്റ് വാതിൽ തുറന്നതോടെ ജീവനക്കാർക്കും യാത്രക്കാർക്കും അകത്തേക്ക് പ്രവേശിക്കാനും അക്രമിയെ കീഴടക്കാനും സാധിച്ചു.
വിമാനത്തിനുള്ളിൽ നിന്നുള്ള ദൃശ്യങ്ങളിൽ രക്തത്തിൽ കുളിച്ച നിലയിൽ സ്മിത് മച്ചാർ കിടക്കുന്നതും സഹപൈലറ്റ് തന്നെ ആക്രമിച്ചെന്ന് പറയുന്നതും കാണാമെന്നാണ് റിപ്പോർട്ടുകൾ. വിമാനത്തിലുണ്ടായിരുന്ന ദന്തഡോക്ടർ പൈലറ്റിന് അടിയന്തര ചികിത്സ നൽകി. തുടർന്ന് രണ്ട് പകരക്കാരായ പൈലറ്റുമാർ വിമാനത്തിന്റെ നിയന്ത്രണം ഏറ്റെടുത്തു. വിമാനം വഴിതിരിച്ചുവിട്ട് സൗദി അറേബ്യയിൽ സുരക്ഷിതമായി ഇറക്കി.