“വിമാനം താഴേക്ക് കൂപ്പുകുത്തുന്നത് മനസിലായി; കോക്പിറ്റ് തുറക്കാതെ യാത്രക്കാരെ രക്ഷിക്കാനാകില്ലെന്ന് തിരിച്ചറിഞ്ഞു” — സ്മിത് മച്ഛാറിന്റെ നിർണായക മൊഴി
ന്യൂഡൽഹി: ഒരു നിമിഷം കൊണ്ട് വിമാനത്തിന്റെ നിയന്ത്രണം നഷ്ടപ്പെടുന്നു. തലയ്‌ക്ക് പിന്നിൽ തുടർച്ചയായി ശക്തമായ പ്രഹരങ്ങൾ. കാഴ്ച മങ്ങുന്നു. കോക്പിറ്റിന്റെ വാതിൽ അടഞ്ഞുകിടക്കുന്നു. താഴേക്ക് പതിക്കുന്ന വിമാനത്തിനുള്ളിൽ 174 യാത്രക്കാരുടെ ജീവൻ അപകടത്തിലാണെന്ന് തിരിച്ചറിഞ്ഞ നിമിഷം. സെപ്റ്റംബർ 30ന് ഫ്ലൈദുബായ് വിമാനത്തിൽ അരങ്ങേറിയ ഞെട്ടിക്കുന്ന സംഭവങ്ങൾ വിവരിച്ച് ക്യാപ്റ്റൻ സ്മിത് മച്ഛാർ.
ഇസ്രയേൽ പ്രധാനമന്ത്രി ബെന്യാമിൻ നെതന്യാഹുവുമായി ഫോണിൽ സംസാരിക്കവെയാണ് ആക്രമണത്തിന്റെ ഓരോ ഘട്ടവും മച്ഛാർ വിശദീകരിച്ചത്. യാത്രയ്‌ക്കിടെ പ്രാർഥിക്കാനായി എഴുന്നേറ്റ സഹപൈലറ്റ് ഹമാം അൽ ഹമ്മാമി പെട്ടെന്ന് തന്നെ ആക്രമണം ആരംഭിക്കുകയായിരുന്നുവെന്ന് മച്ഛാർ പറഞ്ഞു.
യാത്രയ്‌ക്കിടെ പ്രാർഥനാ സമയം എത്തിയാൽ സഹപൈലറ്റ് പ്രാർഥനയ്‌ക്കായി എഴുന്നേൽക്കുന്നത് പതിവായിരുന്നുവെന്നും അതിൽ അസാധാരണമായി ഒന്നും തോന്നിയിരുന്നില്ലെന്നും മച്ഛാർ പറഞ്ഞു. സഹപൈലറ്റിന്റെ സ്വകാര്യ പ്രാർഥനയെ മാനിച്ച് താൻ പതിവുപോലെ വിമാനത്തിന്റെ മുന്നിലേക്ക് ശ്രദ്ധ കേന്ദ്രീകരിച്ചിരിക്കുകയായിരുന്നു.
പ്രാർഥന തുടങ്ങി ഏതാനും മിനിറ്റുകൾക്ക് ശേഷമാണ് അപ്രതീക്ഷിതമായി തലയുടെ പിൻഭാഗത്ത് ശക്തമായ അടിയേറ്റത്. വിമാനത്തിന് എന്തെങ്കിലും സാങ്കേതിക പ്രശ്നമുണ്ടായതാകാമെന്നാണ് ആദ്യം കരുതിയത്. ആക്രമണം തടയാൻ ശ്രമിച്ചെങ്കിലും പരിക്കിന്റെ ആഘാതത്തിൽ കാഴ്ച പോലും നഷ്ടപ്പെട്ട അവസ്ഥയിലായി. ഇതിനിടെ വിമാനം നിയന്ത്രണം വിട്ട് താഴേക്ക് നീങ്ങുന്നതും മച്ഛാർ തിരിച്ചറിഞ്ഞു. സ്ഥിതിഗതികൾ ഗുരുതരമാണെന്ന് മനസിലാക്കിയതോടെ കോക്പിറ്റിന്റെ വാതിൽ തുറക്കാൻ ശ്രമിച്ചു.
വാതിൽ തുറന്നെങ്കിലും ഹമാം അൽ ഹമ്മാമി അത് വീണ്ടും വലിച്ചടച്ചതായി മച്ഛാർ പറഞ്ഞു. ഇതിനിടെ താൻ നിലത്ത് വീണു. വിമാനത്തിനുള്ളിൽ യാത്രക്കാർ പരിഭ്രാന്തരായി നിലവിളിക്കുന്ന ശബ്ദവും കേൾക്കാമായിരുന്നു.
എന്നാൽ അവിടെവെച്ച് പിന്മാറാൻ മച്ഛാർ തയ്യാറായില്ല. വീണ്ടും മുഴുവൻ ശക്തിയും ഉപയോഗിച്ച് കോക്പിറ്റ് തുറക്കാൻ ശ്രമിച്ചു. വാതിൽ തുറക്കാൻ കഴിയാത്ത പക്ഷം വിമാനത്തിലുള്ള എല്ലാവരുടെയും ജീവൻ അപകടത്തിലാകുമെന്ന് അപ്പോഴേക്കും വ്യക്തമായിരുന്നുവെന്നും അദ്ദേഹം പറഞ്ഞു. ഒടുവിൽ കോക്പിറ്റിന്റെ വാതിൽ തുറന്നതോടെ യാത്രക്കാർ ഉൾപ്പെടെയുള്ളവർ അകത്തേക്ക് പ്രവേശിച്ചു. തുടർന്ന് വിമാനത്തിന്റെ നിയന്ത്രണം വീണ്ടെടുക്കുകയായിരുന്നു. അതിന് ശേഷമുള്ള കാര്യങ്ങൾ എല്ലാവർക്കും അറിയാമെന്നും മച്ഛാർ നെതന്യാഹുവിനോട് പറഞ്ഞു.
മച്ഛാറിന്റെ ധൈര്യത്തെ നെതന്യാഹു അഭിനന്ദിച്ചു. അതീവ അപകടകരമായ സാഹചര്യത്തിലും യാത്രക്കാരുടെ സുരക്ഷ ഉറപ്പാക്കാൻ അദ്ദേഹം നടത്തിയ ഇടപെടൽ അസാധാരണമായ ധീരതയാണെന്ന് ഇസ്രയേൽ പ്രധാനമന്ത്രി പറഞ്ഞു.
തലയ്‌ക്ക് ഗുരുതരമായി പരിക്കേറ്റ ക്യാപ്റ്റൻ മച്ഛാർ രക്തത്തിൽ കുളിച്ച നിലയിലായിരുന്നുവെന്നാണ് പുറത്തുവന്ന ദൃശ്യങ്ങളിൽ നിന്ന് വ്യക്തമായത്. ഓക്സിജൻ മാസ്ക് ധരിച്ച നിലയിലുള്ള അദ്ദേഹത്തിന്റെ ദൃശ്യങ്ങളും സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു.
സംഭവം ഭീകരാക്രമണമാണെന്ന് യുഎഇ അധികൃതർ പിന്നീട് സ്ഥിരീകരിച്ചിരുന്നു. അൽ ഹമ്മാമിയുടെ മുൻകാല പ്രവർത്തനങ്ങളും സോഷ്യൽ മീഡിയയിലെ നിലപാടുകളും അന്വേഷണത്തിന്റെ ഭാഗമായി പരിശോധിക്കുന്നുണ്ട്.