ലുധിയാന: പഞ്ചാബിൽ വിനോദയാത്രാ സംഘം സഞ്ചരിച്ച ബസ് അപകടത്തിൽപ്പെട്ട് മലയാളി വിദ്യാർത്ഥിനിക്ക് ദാരുണാന്ത്യം. കോട്ടയം കടുത്തുരുത്തി സ്വദേശിനി ജോസ്‌ന ജോർജാണ് മരിച്ചത്. പഞ്ചാബിലെ ലവ്‌ലി പ്രൊഫഷണൽ സർവകലാശാലയിൽ എംബിഎ വിദ്യാർത്ഥിനിയായിരുന്നു ജോസ്‌ന.
ലുധിയാനയ്‌ക്ക് സമീപം വിനോദയാത്രയ്‌ക്കായി പോകുന്നതിനിടെയാണ് അപകടമുണ്ടായത്. യാത്രയ്‌ക്കിടെ നിയന്ത്രണം നഷ്ടപ്പെട്ട ബസ് റോഡിൽ മറിഞ്ഞാണ് അപകടമുണ്ടായതെന്നാണ് വിവരം. ഡ്രൈവർ ഉറങ്ങിപ്പോയതാകാം അപകടത്തിലേക്ക് നയിച്ചതെന്നാണ് പ്രാഥമിക വിലയിരുത്തൽ.
ബസ് മറിയുന്നതിനിടെ സൈഡ് ഭാഗത്തെ സീറ്റിലിരുന്ന ജോസ്‌ന പുറത്തേക്ക് തെറിച്ചുവീണു. പിന്നാലെ മറിഞ്ഞ ബസിനടിയിൽ തന്നെ ജോസ്‌ന കുടുങ്ങുകയായിരുന്നു. ഏറെ ശ്രമത്തിനൊടുവിൽ ക്രെയിൻ ഉപയോഗിച്ച് ബസ് ഉയർത്തിയാണ് മൃതദേഹം പുറത്തെടുത്തത്.
അപകടത്തിൽ ബസിലുണ്ടായിരുന്ന മറ്റ് ചില മലയാളി വിദ്യാർത്ഥികൾക്കും പരിക്കേറ്റിട്ടുണ്ട്. ഇവർക്ക് ആവശ്യമായ ചികിത്സ നൽകിവരികയാണ്. അപകടത്തെക്കുറിച്ച് അധികൃതർ അന്വേഷണം ആരംഭിച്ചിട്ടുണ്ട്.