ന്യൂഡൽഹി: തലസ്ഥാനത്ത് നടക്കുന്ന സമരങ്ങളും പ്രതിഷേധങ്ങളും റിപ്പോർട്ട് ചെയ്യുന്ന മാധ്യമപ്രവർത്തകർക്ക് പുതിയ മാർഗനിർദേശങ്ങളുമായി ഡൽഹി പോലീസ്. റിപ്പോർട്ടിംഗിനിടെ മാധ്യമപ്രവർത്തകർ സ്ഥാപനത്തിന്റെതോ പ്രസ് ഇൻഫർമേഷൻ ബ്യൂറോ (PIB), ഡൽഹി ഇൻഫർമേഷൻ ആൻഡ് പബ്ലിസിറ്റി വകുപ്പ് (DIP) എന്നിവ നൽകിയതോ ആയ സാധുവായ തിരിച്ചറിയൽ കാർഡ് കൈവശം വെക്കണമെന്ന് പോലീസ് നിർദേശിച്ചു. തിരിച്ചറിയൽ കാർഡ് വ്യക്തമായി കാണുന്ന രീതിയിൽ ധരിക്കണമെന്നും നിർദേശത്തിൽ പറയുന്നു.
പ്രതിഷേധങ്ങൾ റിപ്പോർട്ട് ചെയ്യുന്നതിനിടെ പോലീസിന്റെ ഔദ്യോഗിക നടപടികൾക്കും നീക്കങ്ങൾക്കും തടസ്സമുണ്ടാക്കരുതെന്നും പോലീസ് വ്യക്തമാക്കി. പ്രക്ഷോഭകരിൽ നിന്ന് സുരക്ഷിതമായ അകലം പാലിച്ച് റിപ്പോർട്ടിംഗ് നടത്തണമെന്നും നാല് നിർദേശങ്ങളടങ്ങിയ മാർഗനിർദേശത്തിൽ പറയുന്നു. സമരസ്ഥലങ്ങളിൽ മാധ്യമപ്രവർത്തകരുടെ സുരക്ഷ ഉറപ്പാക്കുന്നതിനും റിപ്പോർട്ടിംഗിനിടെ ഉണ്ടാകാവുന്ന ആശയക്കുഴപ്പങ്ങൾ ഒഴിവാക്കുന്നതിനുമാണ് മാർഗനിർദേശങ്ങൾ.