ന്യൂഡല്‍ഹി: ഇന്ത്യയുടെ തദ്ദേശീയ യുദ്ധവിമാനമായ തേജസ് Mk1A പദ്ധതിക്ക് കൂടുതല്‍ കരുത്തേകി യുഎസ് എയ്‌റോസ്‌പേസ് കമ്പനിയായ GE Aerospace. തേജസ് Mk1A വിമാനങ്ങള്‍ക്കായി നാല് F404-IN20 എന്‍ജിനുകള്‍ കൂടി ഹിന്ദുസ്ഥാന്‍ എയറോനോട്ടിക്‌സ് ലിമിറ്റഡിന് (HAL) കൈമാറി. സെപ്റ്റംബറില്‍ അയച്ച പുതിയ എന്‍ജിനുകള്‍ കൂടി എത്തിയതോടെ തേജസ് Mk1Aയ്‌ക്കായി HAL-ന് ലഭിച്ച F404 എന്‍ജിനുകളുടെ എണ്ണം 14 ആയി. 2021ല്‍ GE Aerospace-ുമായി ഒപ്പുവെച്ച കരാറിന്റെ ഭാഗമായാണ് എന്‍ജിനുകളുടെ വിതരണം. 99 F404-IN20 എന്‍ജിനുകള്‍ക്കായി 5,375 കോടി രൂപയുടെ കരാറാണ് ഒപ്പുവെച്ചത്. തേജസ് Mk1A വിമാനങ്ങളുടെ എന്‍ജിന്‍ ആവശ്യകത നിറവേറ്റുന്നതിനായാണ് കരാര്‍.
”ഇന്ത്യയുടെ തദ്ദേശീയ യുദ്ധവിമാനമായ തേജസിന് ആവശ്യമായ എന്‍ജിനുകള്‍ എത്തിക്കുന്നതില്‍ ഞങ്ങള്‍ ശ്രദ്ധ കേന്ദ്രീകരിക്കുന്നു,” എന്ന് GE Aerospace വ്യക്തമാക്കി. ഇന്ത്യയുടെ സിംഗിള്‍ എന്‍ജിന്‍ തേജസ് യുദ്ധവിമാനത്തിനായി പ്രത്യേകം രൂപകല്‍പ്പന ചെയ്ത F404 എന്‍ജിന്റെ പതിപ്പാണ് F404-IN20. F404 കുടുംബത്തിലെ ഏറ്റവും ഉയര്‍ന്ന ത്രസ്റ്റ് നല്‍കുന്ന പതിപ്പാണ് ഇന്ത്യന്‍ വേരിയന്റെന്ന് GE Aerospace പറയുന്നു. കൂടുതല്‍ വായുപ്രവാഹം സാധ്യമാക്കുന്ന ഫാന്‍, സിംഗിള്‍-ക്രിസ്റ്റല്‍ ടര്‍ബൈന്‍ ബ്ലേഡുകള്‍ തുടങ്ങിയ സാങ്കേതികവിദ്യകള്‍ എന്‍ജിനില്‍ ഉള്‍പ്പെടുത്തിയിട്ടുണ്ട്.
ഇന്ത്യന്‍ വ്യോമസേനയുടെയും തേജസ് വിമാനത്തിന്റെയും ആവശ്യകതകള്‍ കണക്കിലെടുത്താണ് എന്‍ജിന്‍ രൂപകല്‍പ്പന ചെയ്തിരിക്കുന്നത്. ലോകത്തിന്റെ വിവിധ ഭാഗങ്ങളിലുള്ള ആയിരക്കണക്കിന് യുദ്ധവിമാനങ്ങളില്‍ ഉപയോഗിച്ചുവരുന്ന F404, സൈനിക വ്യോമയാന രംഗത്തെ പ്രധാന എന്‍ജിനുകളിലൊന്നാണെന്നും GE Aerospace വ്യക്തമാക്കി. തേജസ് പദ്ധതിയിലും F404 നിര്‍ണായക പങ്കാണ് വഹിക്കുന്നത്. ഇന്ത്യയുടെ സൈനിക വ്യോമയാന പദ്ധതിയുമായി GE Aerospace-ന് പതിറ്റാണ്ടുകളുടെ ബന്ധമുണ്ട്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
1980കളില്‍ എയറോനോട്ടിക്കല്‍ ഡെവലപ്മെന്റ് ഏജന്‍സിയുമായി (ADA) കമ്പനി സഹകരണം ആരംഭിച്ചതായാണ് GE Aerospace പറയുന്നത്. 2004ലാണ് സിംഗിള്‍ എന്‍ജിന്‍ തേജസിനായി F404-IN20 തിരഞ്ഞെടുക്കുന്നത്. തേജസിന്റെ ആദ്യകാല പരീക്ഷണപ്പറക്കലുകളിലും ഇതേ എന്‍ജിനാണ് ഉപയോഗിച്ചത്. 2008ലെ പരീക്ഷണപ്പറക്കലിനിടെ തേജസ് നിരവധി ഉയരങ്ങള്‍ പിന്നിട്ട് മാക് 1.1 വേഗത കൈവരിച്ചതായും GE Aerospace വ്യക്തമാക്കി.