കോഴിക്കോട്: നഗരത്തിലെ ചായക്കടകളിലേക്കും ഹോട്ടലുകളിലേക്കും എണ്ണക്കടികൾ വിതരണം ചെയ്യുന്ന പാളയത്തെ നിർമാണ യൂണിറ്റിനെതിരെ ഭക്ഷ്യസുരക്ഷാ വകുപ്പിന്റെ കർശന നടപടി. പാളയത്ത് പ്രവർത്തിക്കുന്ന അഖിൽ ട്രേഡേഴ്സ് എന്ന സ്ഥാപനത്തിന്റെ പ്രവർത്തനമാണ് ഗുരുതരമായ വീഴ്ചകൾ കണ്ടെത്തിയതിനെത്തുടർന്ന് നിർത്തിവയ്പ്പിച്ചത്. സ്ഥാപനത്തിന് ഒരു ലക്ഷം രൂപ പിഴയും ഭക്ഷ്യസുരക്ഷാ വകുപ്പ് ചുമത്തിയിട്ടുണ്ട്.
പരിശോധനയിൽ ഭക്ഷ്യവസ്തുക്കൾ സൂക്ഷിക്കുന്നതിന് ആവശ്യമായ റാക്കുകൾ സ്ഥാപിച്ചിരുന്നില്ലെന്ന് കണ്ടെത്തി. എണ്ണക്കടികളും മറ്റ് ഭക്ഷ്യവസ്തുക്കളും തറയിൽ വൃത്തിഹീനമായ സാഹചര്യത്തിലാണ് സൂക്ഷിച്ചിരുന്നത്. ജീവനക്കാർ ഭക്ഷ്യസുരക്ഷാ മാനദണ്ഡങ്ങൾ പാലിക്കാതെയാണ് ജോലി ചെയ്തിരുന്നതെന്നും പരിശോധനയിൽ വ്യക്തമായി.
ഭക്ഷ്യവസ്തുക്കളുടെ ശുചിത്വവും സുരക്ഷയും ഉറപ്പാക്കുന്നതിൽ ഗുരുതര വീഴ്ചകൾ കണ്ടെത്തിയതോടെയാണ് വകുപ്പിന്റെ നടപടി.