കൊച്ചി: റിപ്പോർട്ടർ ടിവിയുടെ ലൈസൻസ് രേഖകളും സാമ്പത്തിക വിവരങ്ങളും ഹാജരാക്കാൻ കേന്ദ്ര ബ്രോഡ്കാസ്റ്റിംഗ് മന്ത്രാലയം നിർദേശം നൽകി. 2024 മുതൽ ആരംഭിക്കുന്ന രേഖകളും കരാറുകളും ഈ മാസം 12നകം സമർപ്പിക്കണമെന്നാണ് നിർദേശം. ട്വന്റി20 പാർട്ടി നേതാവ് സാബു എം. ജേക്കബ് നൽകിയ പരാതിയുടെ അടിസ്ഥാനത്തിലാണ് നടപടി.
റിപ്പോർട്ടർ ടിവിയുമായി ബന്ധപ്പെട്ട വിഷയത്തിൽ സാബു എം. ജേക്കബ് ആദ്യം ഹൈക്കോടതിയെ സമീപിച്ചിരുന്നു. തുടർന്ന് പരാതിയിൽ ഉചിതമായ നടപടികൾ സ്വീകരിക്കാൻ ഹൈക്കോടതി കേന്ദ്ര ബ്രോഡ്കാസ്റ്റിംഗ് മന്ത്രാലയത്തോട് നിർദേശിച്ചു. വിഷയത്തിൽ നവംബർ 23നകം അന്തിമ തീരുമാനമെടുക്കണമെന്നും കോടതി നിർദേശിച്ചിരുന്നു.
ഇതിന്റെ തുടർച്ചയായാണ് റിപ്പോർട്ടർ ടിവിയോട് വിവിധ രേഖകളും വിശദാംശങ്ങളും സമർപ്പിക്കാൻ മന്ത്രാലയം ആവശ്യപ്പെട്ടിരിക്കുന്നത്. ലൈസൻസി ആരാണെന്നതിന്റെ വിവരങ്ങൾ, സംപ്രേക്ഷണ ലൈസൻസുമായി ബന്ധപ്പെട്ട രേഖകൾ, വിവിധ കരാറുകൾ, സാമ്പത്തിക ഇടപാടുകളുമായി ബന്ധപ്പെട്ട വിവരങ്ങൾ എന്നിവയാണ് പ്രധാനമായും ഹാജരാക്കേണ്ടത്.
ചീഫ് എഡിറ്റർ മുതൽ താഴെത്തട്ടിലെ ജീവനക്കാർ വരെ വേതനവിവരങ്ങൾ
2024 മുതൽ 2027ൽ അവസാനിക്കുന്ന സാമ്പത്തിക വർഷം വരെയുള്ള കണക്കുകളാണ് മന്ത്രാലയത്തിന് മുന്നിൽ സമർപ്പിക്കേണ്ടത്. സ്ഥാപനത്തിലെ ചീഫ് എഡിറ്റർ, മറ്റ് എഡിറ്റർമാർ എന്നിവരുടേതുൾപ്പെടെ താഴെത്തട്ടിലുള്ള ജീവനക്കാർക്ക് നൽകുന്ന വേതനത്തിന്റെ വിശദാംശങ്ങളും ആവശ്യപ്പെട്ടിട്ടുണ്ട്. ജീവനക്കാരുമായി ബന്ധപ്പെട്ട കരാറുകളും ഇതോടൊപ്പം കൈമാറണം.
സ്ഥാപനത്തിലെ ജീവനക്കാരുടെ വേതനവിവരങ്ങൾക്കു പുറമേ ഇപിഎഫ് സംബന്ധിച്ച രേഖകളും സമർപ്പിക്കേണ്ടതുണ്ട്. സാങ്കേതിക വിഭാഗത്തിൽ ജോലി ചെയ്യുന്ന ജീവനക്കാരുടെ വിവരങ്ങളും മന്ത്രാലയം തേടിയിട്ടുണ്ട്.
ലൈസൻസ് രേഖകൾ, കരാറുകൾ, ജീവനക്കാരുടെ വേതനവിവരങ്ങൾ, ഇപിഎഫ് രേഖകൾ, സാങ്കേതിക ജീവനക്കാരുടെ വിശദാംശങ്ങൾ എന്നിവ ഉൾപ്പെടെ വിവിധ തലങ്ങളിലുള്ള വിവരങ്ങളാണ് റിപ്പോർട്ടർ ടിവി കൈമാറേണ്ടത്. ഹൈക്കോടതി നിർദേശിച്ച സമയപരിധിക്കുള്ളിൽ വിഷയത്തിൽ അന്തിമ തീരുമാനമെടുക്കുന്നതിനായി കേന്ദ്ര മന്ത്രാലയം രേഖകൾ പരിശോധിക്കും.
