ഫ്‌ലൈദുബായ് വിമാനം തട്ടിയെടുക്കാന്‍ ശ്രമിച്ച സംഭവം; എന്‍ഐഎ കേസെടുത്തു

ന്യൂഡല്‍ഹി: ഇന്ത്യന്‍ ക്യാപ്റ്റനെ കുത്തിപ്പരുക്കേല്‍പ്പിച്ച് ഫ്‌ലൈദുബായ് യാത്രാവിമാനം തട്ടിയെടുക്കാന്‍ ശ്രമിച്ച സംഭവത്തില്‍ ദേശീയ അന്വേഷണ ഏജന്‍സി (എന്‍ഐഎ) എഫ്ഐആര്‍ രജിസ്റ്റര്‍ ചെയ്തു. സംഭവത്തില്‍ അന്വേഷണം നടത്താന്‍ കേന്ദ്രസര്‍ക്കാര്‍ എന്‍ഐഎയ്‌ക്ക് നിര്‍ദേശം നല്‍കിയതിനെത്തുടര്‍ന്നാണ് നടപടി. എന്‍ഐഎ നിയമത്തിലെ ആറാം വകുപ്പിലെ ഉപവകുപ്പുകള്‍ (5), (8), എട്ടാം വകുപ്പ് എന്നിവ പ്രകാരമാണ് കേസ് രജിസ്റ്റര്‍ ചെയ്ത് അന്വേഷണം ആരംഭിക്കാന്‍ കേന്ദ്രം നിര്‍ദേശിച്ചത്. ഇന്ത്യന്‍ പൈലറ്റിന് നേരെയുണ്ടായ ആക്രമണവും വിമാനം തട്ടിയെടുക്കാനുള്ള ശ്രമവും കണക്കിലെടുത്താണ് അന്വേഷണം എന്‍ഐഎയെ ഏല്‍പ്പിച്ചത്.

സെപ്റ്റംബര്‍ 30നാണ് 174 യാത്രക്കാരും ആറു ജീവനക്കാരുമുള്ള ഫ്‌ലൈദുബായ് വിമാനം തട്ടിയെടുക്കാന്‍ സഹപൈലറ്റ് ശ്രമിച്ചത്. ദുബായില്‍നിന്ന് ഇസ്രയേലിലെ ടെല്‍ അവീവിലേക്ക് പോവുകയായിരുന്ന വിമാനത്തിലെ ഒമാന്‍ സ്വദേശിയായ സഹപൈലറ്റ് ഹമാം അല്‍ ഹമാമി (29) ഇന്ത്യന്‍ ക്യാപ്റ്റന്‍ സ്മിത് മച്ഛറിനെ ആക്രമിക്കുകയായിരുന്നു. ക്യാപ്റ്റന്റെ തലയിലും കൈകളിലും ആഴത്തിലുള്ള മുറിവേറ്റു. യാത്രക്കാരും വിമാനത്തിലെ ജീവനക്കാരും ചേര്‍ന്ന് സഹപൈലറ്റിനെ ബലപ്രയോഗത്തിലൂടെ കീഴടക്കി. തുടര്‍ന്ന് വിമാനത്തിലുണ്ടായിരുന്ന മറ്റ് പൈലറ്റുമാര്‍ നിയന്ത്രണം ഏറ്റെടുത്തു.

സൗദി അറേബ്യയിലെ തബൂക്കിലുള്ള പ്രിന്‍സ് സുല്‍ത്താന്‍ ബിന്‍ അബ്ദുല്‍ അസീസ് വിമാനത്താവളത്തില്‍ വിമാനം സുരക്ഷിതമായി ഇറക്കി. ടെല്‍ അവീവ് വിമാനത്താവളത്തിലെ യാത്രക്കാരുടെ ടെര്‍മിനലില്‍ വിമാനം ഇടിച്ചിറക്കാനായിരുന്നു സഹപൈലറ്റിന്റെ പദ്ധതിയെന്നാണ് യുഎഇ പബ്ലിക് പ്രോസിക്യൂഷന്റെ അന്വേഷണ റിപ്പോര്‍ട്ടിലുള്ളത്. വിമാനത്തിലുണ്ടായിരുന്നവരെ കൂട്ടക്കൊല ചെയ്യുക എന്ന ലക്ഷ്യത്തോടെയാണ് ഇയാള്‍ നീങ്ങിയതെന്നും റിപ്പോര്‍ട്ട് ആരോപിക്കുന്നു.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

മുന്‍കൂട്ടി ആസൂത്രണം ചെയ്ത പദ്ധതിയുടെ ഭാഗമായിരുന്നു ആക്രമണമെന്നും 2001ല്‍ അമേരിക്കയിലെ വേള്‍ഡ് ട്രേഡ് സെന്ററിനു നേരെയുണ്ടായ ഭീകരാക്രമണം ഇയാള്‍ക്ക് വലിയ പ്രചോദനമായെന്നും അന്വേഷണ റിപ്പോര്‍ട്ടില്‍ പറയുന്നുണ്ട്. സംഭവത്തിന്റെ ഗൗരവം കണക്കിലെടുത്താണ് കേന്ദ്രസര്‍ക്കാര്‍ അന്വേഷണം എന്‍ഐഎയ്‌ക്ക് കൈമാറിയത്.