കോട്ടയം: കുടുംബവഴക്കിനിടെ അച്ഛനെ തലയ്‌ക്കടിച്ച് കൊലപ്പെടുത്തിയ സംഭവത്തിൽ മകനെ പൊലീസ് അറസ്റ്റ് ചെയ്തു. കോട്ടയം മണിമലയിൽ നടന്ന സംഭവത്തിൽ റാന്നി മക്കപ്പുഴ സ്വദേശി സന്തോഷാണ് മരിച്ചത്. ഇളയമകൻ സച്ചു സന്തോഷിനെയാണ് പൊലീസ് അറസ്റ്റ് ചെയ്തത്.
ശനിയാഴ്ച വൈകുന്നേരമാണ് സംഭവം. സന്തോഷിന്റെ ഭാര്യയും രണ്ട് മക്കളും ഭാര്യയുടെ അമ്മയുമാണ് മണിമലയിലെ വീട്ടിൽ താമസിച്ചിരുന്നത്. വല്ലപ്പോഴും വീട്ടിലെത്തുന്ന സന്തോഷ് മദ്യപിച്ചെത്തി ഭാര്യയുമായും മക്കളുമായും വഴക്കുണ്ടാക്കുന്നത് പതിവായിരുന്നുവെന്ന് നാട്ടുകാർ പറയുന്നു.
സംഭവദിവസവും മദ്യപിച്ചെത്തിയ സന്തോഷ് ഭാര്യയുമായി വഴക്കുണ്ടാക്കി. ഇതുകണ്ട് ഇടപെട്ട ഇളയമകൻ സച്ചു കാപ്പിക്കമ്പ് എടുത്ത് സന്തോഷിന്റെ തലയ്‌ക്ക് അടിക്കുകയായിരുന്നു. അടിയേറ്റ സന്തോഷ് രക്തത്തിൽ കുളിച്ച് വീട്ടിൽ വീണുകിടന്നു.
സംഭവത്തെക്കുറിച്ച് വിവരം ലഭിച്ചതിനെ തുടർന്ന് പൊലീസ് സ്ഥലത്തെത്തി. ഗുരുതരമായി പരിക്കേറ്റ സന്തോഷിനെ പൊലീസ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
സംഭവത്തിന് പിന്നാലെ സച്ചുവിനെ പൊലീസ് അറസ്റ്റ് ചെയ്തു. കുടുംബവഴക്കാണ് കൊലപാതകത്തിലേക്ക് നയിച്ചതെന്നാണ് പ്രാഥമിക വിവരം. സംഭവവുമായി ബന്ധപ്പെട്ട് പൊലീസ് തുടർനടപടികൾ സ്വീകരിച്ചുവരികയാണ്.