കൊച്ചി: നെടുമ്പാശ്ശേരിയിൽ മൂന്ന് പേരുടെ മരണത്തിനിടയാക്കിയ മിനി കൂപ്പർ അപകടത്തിൽ പ്രതി സുഹൈൽ സജീവ് അമിതമായി മദ്യപിച്ചിരുന്നതായി രക്തപരിശോധനാ സാമ്പിൾ റിപ്പോർട്ട്. അനുവദനീയമായ അളവിന്റെ അഞ്ചിരട്ടിയിലേറെ മദ്യം സുഹൈലിന്റെ ശരീരത്തിലുണ്ടായിരുന്നുവെന്നാണ് റിപ്പോർട്ടിലെ വിവരം. അപകടവുമായി ബന്ധപ്പെട്ട് അറസ്റ്റിലായ സുഹൈൽ സജീവ്, അമീൻ ഷാ എന്നിവരുടെ ജാമ്യാപേക്ഷ അങ്കമാലി മജിസ്‌ട്രേറ്റ് കോടതി ഇന്ന് പരിഗണിക്കും.
ജാമ്യാപേക്ഷയെ ശക്തമായി എതിർക്കാനാണ് പോലീസിന്റെ നീക്കം. സുഹൈലിന്റെ രക്തപരിശോധനാ റിപ്പോർട്ട് ഉൾപ്പെടെയുള്ള തെളിവുകൾ കോടതിയിൽ സമർപ്പിക്കും. പ്രതികൾ പുറത്തിറങ്ങിയാൽ സാക്ഷികളെ സ്വാധീനിക്കാനും കേസിന്റെ അന്വേഷണത്തെ ബാധിക്കാനും സാധ്യതയുണ്ടെന്ന വാദവും പോലീസ് ഉന്നയിച്ചേക്കും.
വൈറ്റിലയിൽനിന്ന് നെടുമ്പാശ്ശേരിയിലേക്കുള്ള യാത്രയ്‌ക്കിടെ സുഹൈൽ മൂന്ന് ബാറുകളിൽ കയറി മദ്യപിച്ചിരുന്നതായാണ് അന്വേഷണത്തിൽ കണ്ടെത്തിയിട്ടുള്ളത്. പ്രതിയെ കസ്റ്റഡിയിൽ വാങ്ങിയ ശേഷം ഈ ബാറുകളിലെത്തിച്ച് പോലീസ് തെളിവെടുപ്പും നടത്തിയിരുന്നു. അപകടസമയത്ത് വാഹനം മണിക്കൂറിൽ 120 കിലോമീറ്ററിലധികം വേഗത്തിലായിരുന്നുവെന്നും റിപ്പോർട്ടുകളുണ്ട്.
മറ്റ് ലഹരിവസ്തുക്കൾ ഉപയോഗിച്ചിട്ടുണ്ടോയെന്ന് കണ്ടെത്താനുള്ള രാസപരിശോധനാ ഫലം ഇനിയും ലഭിക്കാനുണ്ട്. അതേസമയം, സുഹൈലിന് വേണ്ടി കോൺഗ്രസ് നേതാക്കൾ ഇടപെട്ടെന്ന ആരോപണങ്ങളും ഉയർന്നിരുന്നു. ജാമ്യാപേക്ഷ പരിഗണിക്കുമ്പോൾ അന്വേഷണത്തിന്റെ ഭാഗമായി ശേഖരിച്ച തെളിവുകൾ നിർണായകമാകും.
