പത്തനംതിട്ട: ശബരിമലയില്‍ നവീകരിച്ച അരവണ പ്ലാന്റില്‍ ഉത്പാദനം ആരംഭിച്ചെങ്കിലും തീര്‍ഥാടന സീസണിന് മുമ്പ് 75 ലക്ഷം ടിന്‍ അരവണ സംഭരിക്കാനാകുമോ എന്ന കാര്യത്തില്‍ ആശങ്ക. ബുധനാഴ്ച മുതലാണ് പ്ലാന്റില്‍ നിര്‍മാണം പുനരാരംഭിച്ചത്. നിലവില്‍ അരവണയുടെ കരുതല്‍ ശേഖരമില്ലെന്നതും ഉത്പാദനത്തിന് ആവശ്യമായ ശര്‍ക്കരയുടെ ലഭ്യതക്കുറവും വെല്ലുവിളിയാണ്. തുലാമാസ പൂജകള്‍ക്കായി ഇന്ന് വൈകിട്ട് അഞ്ചിന് ക്ഷേത്രനട തുറക്കും. മാസപൂജകള്‍ക്കായി ആറ് ലക്ഷം മുതല്‍ ഒന്‍പത് ലക്ഷം ടിന്‍ വരെ അരവണ ആവശ്യമായി വരുമെന്നാണ് ദേവസ്വം ബോര്‍ഡിന്റെ കണക്കുകൂട്ടല്‍. കഴിഞ്ഞ തുലാമാസത്തില്‍ ആറ് ലക്ഷം ടിന്‍ അരവണയാണ് വിറ്റഴിച്ചത്.
പ്ലാന്റ് നവീകരണത്തിനു ശേഷം നിലവില്‍ പ്രതിദിനം ഒന്നര ലക്ഷം ടിന്‍ അരവണയാണ് നിര്‍മിക്കുന്നത്. ഒക്ടോബര്‍ 20നുശേഷം പ്ലാന്റ് പൂര്‍ണ ഉത്പാദനശേഷിയിലെത്തുമെന്നാണ് അധികൃതരുടെ പ്രതീക്ഷ. അങ്ങനെ സംഭവിച്ചാല്‍ പ്രതിദിനം 3.25 ലക്ഷം മുതല്‍ 3.65 ലക്ഷം ടിന്‍ വരെ അരവണ നിര്‍മിക്കാനാകുമെന്നാണ് കണക്കുകൂട്ടല്‍. എന്നാല്‍ ഉത്പാദന ലക്ഷ്യം കൈവരിച്ചാല്‍ പോലും 17 ദിവസത്തിനുള്ളില്‍ 75 ലക്ഷം കണ്ടെയ്നര്‍ അരവണ സംഭരിക്കാനാകുമോ എന്നതാണ് പ്രധാന ആശങ്ക. ഉത്പാദനശേഷി പൂര്‍ണമായി കൈവരിക്കുന്നതും അസംസ്‌കൃത വസ്തുക്കളുടെ ലഭ്യതയും ഇതില്‍ നിര്‍ണായകമാകും.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
അരവണ നിര്‍മാണത്തിന് ആവശ്യമായ ശര്‍ക്കരയുടെ കരുതല്‍ ശേഖരത്തിലും കുറവുണ്ട്. നേരത്തേ ഒരു ലക്ഷം കിലോ ശര്‍ക്കര ശേഖരമുണ്ടായിരുന്നെങ്കിലും നിലവില്‍ അതിന്റെ പകുതിപോലും ലഭ്യമല്ലെന്നാണ് വിവരം. ശര്‍ക്കര എത്തിക്കുന്നതുമായി ബന്ധപ്പെട്ട ചര്‍ച്ചകളും പൂര്‍ത്തിയായിട്ടില്ല. ഇത് അരവണ ഉത്പാദനത്തെ ബാധിക്കാനുള്ള സാധ്യതയുണ്ട്. അതേസമയം, തുലാമാസ പൂജകള്‍ക്കും മണ്ഡല തീര്‍ഥാടന കാലത്തേക്കുമായി പമ്പയില്‍ 15 ടണ്‍ അരി ഉള്‍പ്പെടെയുള്ള സാധനങ്ങള്‍ എത്തിച്ചിട്ടുണ്ട്. അരവണ ഉത്പാദനം വര്‍ധിപ്പിച്ച് ആവശ്യത്തിന് ശേഖരം ഒരുക്കാനാകുമോയെന്നാണ് ഇനി അറിയേണ്ടത്.
