ന്യൂഡല്‍ഹി: ആറുമാസം വരെ പ്രായമുള്ള കുഞ്ഞുങ്ങള്‍ക്കുള്ള ഭക്ഷ്യ ഉല്‍പ്പന്നങ്ങളില്‍ സുക്രോസും ഫ്രക്ടോസും ചേര്‍ക്കുന്നത് നിരോധിക്കാന്‍ നീക്കവുമായി ഫുഡ് സേഫ്റ്റി ആന്‍ഡ് സ്റ്റാന്‍ഡേര്‍ഡ്സ് അതോറിറ്റി ഓഫ് ഇന്ത്യ (എഫ്എസ്എസ്എഐ). ഇതിന്റെ ഭാഗമായി 2020ലെ ശിശുപോഷണ ഭക്ഷ്യ ഉല്‍പ്പന്നങ്ങളുമായി ബന്ധപ്പെട്ട ചട്ടങ്ങളില്‍ ഭേദഗതി നിര്‍ദേശിച്ച് കരട് വിജ്ഞാപനം പുറത്തിറക്കി. കുഞ്ഞുങ്ങളുടെ വളര്‍ച്ചയിലും വികാസത്തിലും ആദ്യ ആറുമാസം നിര്‍ണായകമായതിനാല്‍ ഈ കാലയളവില്‍ ആവശ്യമായ പോഷകങ്ങള്‍ ഉറപ്പാക്കുകയാണ് നിര്‍ദേശത്തിന്റെ ലക്ഷ്യം.
ശിശുക്കള്‍ക്കുള്ള ഭക്ഷണത്തില്‍ അനാവശ്യമായി സുക്രോസും ഫ്രക്ടോസും ചേര്‍ക്കുന്നത് ഒഴിവാക്കുന്നതിലൂടെ പ്രായത്തിനനുസരിച്ചുള്ള പോഷകാഹാരം ഉറപ്പാക്കാനാകുമെന്നാണ് വിലയിരുത്തല്‍. ചേര്‍ത്ത പഞ്ചസാരയുടെ ആദ്യകാല ഉപയോഗവുമായി ബന്ധപ്പെട്ട ആരോഗ്യപ്രശ്‌നങ്ങള്‍ കുറയ്‌ക്കുന്നതിനുള്ള പൊതുജനാരോഗ്യ നടപടികളുടെ ഭാഗമായാണ് നിര്‍ദേശത്തെ കാണുന്നത്. കുട്ടികളിലെ അമിതവണ്ണത്തിനും അനുബന്ധ ആരോഗ്യപ്രശ്‌നങ്ങള്‍ക്കും കാരണമാകാവുന്ന ഭക്ഷണശീലങ്ങളുമായി ബന്ധപ്പെട്ട ആശങ്കകളും ഇതിന് പിന്നിലുണ്ട്. കേന്ദ്ര ആരോഗ്യ-കുടുംബക്ഷേമ മന്ത്രാലയത്തിന്റെ അറിയിപ്പുപ്രകാരം കരട് വിജ്ഞാപനം പൊതുജനാഭിപ്രായത്തിനായി പ്രസിദ്ധീകരിച്ചിട്ടുണ്ട്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ബന്ധപ്പെട്ട സ്ഥാപനങ്ങള്‍ക്കും മറ്റ് താല്‍പര്യമുള്ളവര്‍ക്കും നിര്‍ദേശങ്ങളും എതിര്‍പ്പുകളും സമര്‍പ്പിക്കാന്‍ 60 ദിവസത്തെ സമയമാണ് അനുവദിച്ചിരിക്കുന്നത്. നിശ്ചിത സമയപരിധിക്കുള്ളില്‍ ലഭിക്കുന്ന അഭിപ്രായങ്ങളും നിര്‍ദേശങ്ങളും പരിശോധിച്ചശേഷം എഫ്എസ്എസ്എഐ ഭേദഗതി അന്തിമമാക്കും. നിലവില്‍ ഇത് കരട് നിര്‍ദേശം മാത്രമാണ്; അന്തിമ ചട്ടങ്ങള്‍ പ്രസിദ്ധീകരിച്ചശേഷമായിരിക്കും ഭേദഗതി പ്രാബല്യത്തില്‍ വരിക.
