ന്യൂഡല്‍ഹി: ഇന്ത്യന്‍ പുരുഷ ക്രിക്കറ്റ് ടീമിന്റെ സെലക്ഷന്‍ കമ്മിറ്റി ചെയര്‍മാനായി മുന്‍ ഇന്ത്യന്‍ സ്പിന്നര്‍ പ്രഗ്യാന്‍ ഓജയെ നിയമിച്ച് ബിസിസിഐ. മുന്‍ ഇന്ത്യന്‍ ഓള്‍റൗണ്ടര്‍ രമേഷ് പവാറിനെയും അഞ്ചംഗ സെലക്ഷന്‍ കമ്മിറ്റിയില്‍ അംഗമായി നിയമിച്ചു. അജിത് അഗാര്‍ക്കര്‍ സ്ഥാനമൊഴിഞ്ഞതിനു പിന്നാലെയാണ് പുതിയ നിയമനങ്ങള്‍. ടെസ്റ്റ് മത്സരങ്ങളിലെ പരിചയസമ്പത്തിന്റെ അടിസ്ഥാനത്തിലാണ് പ്രഗ്യാന്‍ ഓജയ്‌ക്ക് സെലക്ഷന്‍ കമ്മിറ്റിയുടെ തലപ്പത്ത് ചുമതല നല്‍കിയിരിക്കുന്നത്. ശിവ് സുന്ദര്‍ ദാസ്, ആര്‍.പി. സിങ്, അജയ് റാത്ര എന്നിവരാണ് കമ്മിറ്റിയിലെ മറ്റ് അംഗങ്ങള്‍.
ബിസിസിഐയുടെ ക്രിക്കറ്റ് അഡൈ്വസറി കമ്മിറ്റി (സിഎസി) നടത്തിയ തിരഞ്ഞെടുപ്പ് നടപടികള്‍ക്ക് ശേഷമാണ് രമേഷ് പവാറിനെ അംഗമായി ശുപാര്‍ശ ചെയ്തത്. അശോക് മല്‍ഹോത്രയും ജതിന്‍ പരാഞ്ജ്പെയും ഉള്‍പ്പെട്ട സമിതി അപേക്ഷകരെ പരിശോധിക്കുകയും ബിസിസിഐ ആസ്ഥാനത്ത് അഭിമുഖം നടത്തുകയും ചെയ്തു. തുടര്‍ന്ന് പവാറിന്റെ നിയമനം ഏകകണ്ഠമായി ശുപാര്‍ശ ചെയ്യുകയായിരുന്നു.
അജിത് അഗാര്‍ക്കര്‍ സ്ഥാനമൊഴിഞ്ഞതോടെ സെലക്ഷന്‍ കമ്മിറ്റി നയിക്കുക ആരെന്ന കാര്യത്തില്‍ ചര്‍ച്ചകള്‍ ഉയര്‍ന്നിരുന്നു. മുന്‍ ഇന്ത്യന്‍ ഓപ്പണര്‍ വസീം ജാഫറും സെലക്ടര്‍ സ്ഥാനത്തേക്ക് അപേക്ഷ നല്‍കിയിരുന്നതായി റിപ്പോര്‍ട്ടുകളുണ്ടായിരുന്നു. ജാഫര്‍ 31 ടെസ്റ്റ് മത്സരങ്ങള്‍ കളിച്ചപ്പോള്‍ ഓജ 24 ടെസ്റ്റുകളിലാണ് ഇന്ത്യയെ പ്രതിനിധീകരിച്ചത്. എന്നാല്‍, സെലക്ഷന്‍ കമ്മിറ്റി ചെയര്‍മാനായി ഓജയെ നിയമിച്ചതായി ബിസിസിഐ ഔദ്യോഗികമായി അറിയിച്ചു.
ഇന്ത്യക്കായി 24 ടെസ്റ്റുകളും 18 ഏകദിനങ്ങളും ആറ് ടി20 മത്സരങ്ങളും കളിച്ചിട്ടുള്ള ഓജ ടെസ്റ്റില്‍ 113 വിക്കറ്റുകള്‍ നേടിയിട്ടുണ്ട്. ഇന്ത്യന്‍ ടെസ്റ്റ് ടീമിലെ സ്ഥിരം സാന്നിധ്യമായിരുന്ന താരം ഇനി ദേശീയ ടീമിന്റെ സെലക്ഷനുമായി ബന്ധപ്പെട്ട പ്രധാന തീരുമാനങ്ങളില്‍ നേതൃത്വം നല്‍കും. ഇന്ത്യക്കായി രണ്ട് ടെസ്റ്റുകളും 31 ഏകദിനങ്ങളും കളിച്ചിട്ടുള്ള രമേഷ് പവാര്‍ പിന്നീട് പരിശീലക രംഗത്തും ശ്രദ്ധേയമായിരുന്നു. ഇന്ത്യന്‍ വനിതാ ടീമിന്റെ പരിശീലകനായി പ്രവര്‍ത്തിച്ച അദ്ദേഹം മുംബൈ, ഗുജറാത്ത് ടീമുകളിലും ചുമതല വഹിച്ചു. ബിസിസിഐ സെന്റര്‍ ഓഫ് എക്‌സലന്‍സില്‍ ബൗളിങ് പരിശീലകനായും പ്രവര്‍ത്തിച്ചിട്ടുണ്ട്.
വനിതാ ടീമിന്റെ മുഖ്യ പരിശീലകനായിരിക്കെ ഏഷ്യാ കപ്പ് കിരീടവും കോമണ്‍വെല്‍ത്ത് ഗെയിംസില്‍ വെള്ളിമെഡലും നേടിയ ടീമിന്റെ ഭാഗമായിരുന്നു പവാറിന്റെ പരിശീലക കാലയളവ്. അന്താരാഷ്‌ട്ര മത്സരങ്ങളിലെയും പരിശീലന രംഗത്തെയും അനുഭവസമ്പത്തുമായാണ് അദ്ദേഹം സെലക്ഷന്‍ കമ്മിറ്റിയിലെത്തുന്നത്. സെലക്ഷന്‍ കമ്മിറ്റി ചെയര്‍മാനെന്ന നിലയില്‍ അജിത് അഗാര്‍ക്കര്‍ നല്‍കിയ സംഭാവനകളെയും ബിസിസിഐ അഭിനന്ദിച്ചു. 2023 ജൂലൈയില്‍ ചുമതലയേറ്റ അഗാര്‍ക്കറിന്റെ കാലയളവില്‍ ഇന്ത്യന്‍ ക്രിക്കറ്റ് ടീം മൂന്ന് ഐസിസി കിരീടങ്ങളും രണ്ട് ഏഷ്യാ കപ്പ് കിരീടങ്ങളും തുടര്‍ച്ചയായ രണ്ട് ഏഷ്യന്‍ ഗെയിംസ് സ്വര്‍ണവും നേടിയതായി ബിസിസിഐയുടെ പ്രസ്താവനയില്‍ പറയുന്നു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
പുതിയ ചെയര്‍മാനായി പ്രഗ്യാന്‍ ഓജയും അംഗമായി രമേഷ് പവാറും എത്തിയതോടെ പുരുഷ ടീമിന്റെ സെലക്ഷന്‍ കമ്മിറ്റിയുടെ ഘടനയ്‌ക്ക് വ്യക്തതയായി. വിവിധ ഫോര്‍മാറ്റുകളിലേക്കുള്ള ഇന്ത്യന്‍ ടീമുകളെ തിരഞ്ഞെടുക്കുന്നതിന്റെ ചുമതല ഇനി ഈ അഞ്ചംഗ സമിതിക്കായിരിക്കും.