അബെയ്: സുഡാനും ദക്ഷിണ സുഡാനും തമ്മിൽ തർക്കം നിലനിൽക്കുന്ന അബെയ് മേഖലയിലെ വ്യാപാരകേന്ദ്രത്തിൽ ഡ്രോൺ ആക്രമണം. ഇന്ധന ഡിപ്പോയ്‌ക്കു സമീപം നടന്ന ആക്രമണത്തിൽ കുറഞ്ഞത് 153 പേർ കൊല്ലപ്പെട്ടു. തിങ്കളാഴ്ച നടന്ന ആക്രമണത്തെത്തുടർന്ന് പടർന്ന തീ ചൊവ്വാഴ്ചയും അണയ്‌ക്കാനായിരുന്നില്ലെന്ന് അധികൃതർ അറിയിച്ചു. മരണസംഖ്യ ഇനിയും ഉയരാൻ സാധ്യതയുണ്ടെന്നാണ് റിപ്പോർട്ടുകൾ.
അബെയ് ഭരണകൂടത്തിലെ ഇടക്കാല ഇൻഫർമേഷൻ മന്ത്രി യോഹന്ന അകോൾ എൻഗോറാണ് ആക്രമണവിവരം പുറത്തുവിട്ടത്. അബെയ് നഗരത്തിന് വടക്കുള്ള അമിയറ്റ് മാർക്കറ്റിലാണ് ആക്രമണമുണ്ടായത്. സുഡാൻ സൈന്യമാണ് ആക്രമണം നടത്തിയതെന്ന് അദ്ദേഹം ആരോപിച്ചു.
ഇന്ധന ഡിപ്പോയിൽ വൻ തീപിടിത്തം
ഇന്ധന ഡിപ്പോയ്ക്ക് ഡ്രോൺ ആക്രമണത്തിൽ തീപിടിച്ചതോടെ സ്ഥിതിഗതികൾ വഷളായി. തീ പടർന്നതോടെ മൃതദേഹങ്ങൾ വീണ്ടെടുക്കുന്നതിനും രക്ഷാപ്രവർത്തനങ്ങൾ നടത്തുന്നതിനും ബുദ്ധിമുട്ട് നേരിട്ടതായി അധികൃതർ പറഞ്ഞു. ആക്രമണത്തെത്തുടർന്ന് ഏകദേശം 8,000 പേർ പ്രദേശത്തുനിന്ന് പലായനം ചെയ്തതായും റിപ്പോർട്ടുകളുണ്ട്.
പരിക്കേറ്റ 20-ലേറെ പേരെ സമീപത്തെ അമെത്ത് ബെക്ക് ആശുപത്രിയിൽ പ്രവേശിപ്പിച്ചു. അതി ഗുരുതരാവസ്ഥയിലുള്ളവരും പൊള്ളലേറ്റവരും ചികിത്സയിലുണ്ട്. മെഡിസിൻസ് സാൻസ് ഫ്രോണ്ടിയേഴ്സ് (MSF) സംഘടനയിലെ മെഡിക്കൽ സംഘവും ദക്ഷിണ സുഡാൻ ആരോഗ്യവകുപ്പിലെ ജീവനക്കാരും ചേർന്നാണ് ചികിത്സ നൽകുന്നത്.
സൈനിക നടപടിയെന്ന് സുഡാൻ; സിവിലിയന്മാരെ ലക്ഷ്യമിട്ടിട്ടില്ലെന്ന് വിശദീകരണം
ദക്ഷിണ സുഡാൻ വിദേശകാര്യ മന്ത്രാലയവും ആക്രമണത്തിന് പിന്നിൽ സുഡാൻ സൈന്യമാണെന്ന് ആരോപിച്ചു. പ്രതിഷേധം അറിയിക്കാൻ സുഡാൻ അംബാസഡറെ വിളിച്ചുവരുത്തുകയും ചെയ്തു.
അതേസമയം, ദക്ഷിണ സുഡാനിൽനിന്ന് റാപ്പിഡ് സപ്പോർട്ട് ഫോഴ്‌സിന് (RSF) എത്തിക്കുകയായിരുന്ന ഇന്ധന ടാങ്കറുകളെയാണ് ലക്ഷ്യമിട്ടതെന്ന് സുഡാൻ സൈനിക ഉദ്യോഗസ്ഥൻ അസോസിയേറ്റഡ് പ്രസിനോട് പറഞ്ഞു. കൊല്ലപ്പെട്ടവർ ആർഎസ്എഫ് അംഗങ്ങളോ ഇന്ധനക്കടത്തിൽ ഏർപ്പെട്ടവരോ ആണെന്നും സിവിലിയന്മാരെ ലക്ഷ്യമിട്ടിട്ടില്ലെന്നും അദ്ദേഹം അവകാശപ്പെട്ടു.
എണ്ണസമ്പന്നമായ അബെയ് മേഖലയിൽ തർക്കം
എണ്ണസമ്പന്നമായ അബെയ് മേഖലയുടെ ഭാവി സംബന്ധിച്ച് സുഡാനും ദക്ഷിണ സുഡാനും തമ്മിൽ ദീർഘകാലമായി തർക്കം നിലനിൽക്കുകയാണ്. 2005-ലെ സമാധാന കരാറിലും 2011-ൽ ദക്ഷിണ സുഡാൻ സ്വാതന്ത്ര്യം നേടിയപ്പോഴും ഈ പ്രദേശത്തിന്റെ അന്തിമപദവി പരിഹരിക്കപ്പെട്ടിരുന്നില്ല. മേഖലയിലെ ജനവിഭാഗങ്ങൾക്കിടയിലും ഭൂമിയുടെയും മേച്ചിൽപ്പുറങ്ങളുടെയും പേരിൽ സംഘർഷങ്ങൾ ഉണ്ടായിട്ടുണ്ട്.
2023 ഏപ്രിലിൽ സുഡാൻ സൈന്യവും അർധസൈനിക വിഭാഗമായ റാപ്പിഡ് സപ്പോർട്ട് ഫോഴ്‌സും തമ്മിൽ ആരംഭിച്ച ആഭ്യന്തരയുദ്ധം രാജ്യത്തിന്റെ വിവിധ ഭാഗങ്ങളിൽ വൻ നാശനഷ്ടങ്ങളുണ്ടാക്കിയിട്ടുണ്ട്. സാധാരണ ജനങ്ങളെയും സിവിലിയൻ അടിസ്ഥാനസൗകര്യങ്ങളെയും ആക്രമിക്കുന്നത് അവസാനിപ്പിക്കണമെന്ന് MSF ഉൾപ്പെടെയുള്ള സംഘടനകൾ ആവശ്യപ്പെട്ടു.