ധർമ്മശാല: ഓസ്ട്രേലിയക്കെതിരായ ധർമ്മശാല ടെസ്റ്റിൽ ഒന്നാം ഇന്നിംഗ്സ് ലീഡ് ലക്ഷ്യമിട്ട് ഇന്ത്യ പൊരുതുന്നു. രണ്ടാം ദിവസം കളി അവസാനിക്കുമ്പോൾ ഇന്ത്യ ആറ് വിക്കറ്റ് നഷ്ടത്തിൽ 248 റൺസെന്ന നിലയിലാണ്.
16 റൺസുമായി വൃദ്ധിമാൻ സാഹയും 10 റൺസുമായി രവീന്ദ്ര ജഡേജയുമാണ് ക്രീസിൽ. ഇന്ത്യയ്ക്ക് വേണ്ടി ലോകേഷ് രാഹുൽ, ചേതേശ്വർ പൂജാര എന്നിവർ അർദ്ധ സെഞ്ച്വറി നേടി. പരമ്പരയിലെ അഞ്ചാം അർദ്ധ സെഞ്ച്വറിയാണ് ലോകേഷ് രാഹുൽ ധർമ്മശാലയിൽ സ്വന്തമാക്കിയത്.
നായകൻ അജങ്ക്യാ രഹാനെ 46 ഉം മലയാളി താരം കരുൺ നായർ 5 റൺസുമെടുത്ത് പുറത്തായി.
ഓസ്ട്രേലിയയ്ക്ക് വേണ്ടി നഥാൻ ലിയോൺ നാല് വിക്കറ്റ് വീഴ്ത്തി. ഇന്ത്യയ്ക്ക് ഒന്നാം ഇന്നിംഗ്സ് ലീഡ് നേടുന്നതിന് 53 റൺസ് കൂടി നേടണം.
