ഇന്ത്യ ഫൈനലില്‍

ഡാര്‍ബി : ഹര്‍മന്‍പ്രീത് കൗര്‍ കളം നിറഞ്ഞപ്പോള്‍ വനിതാ ക്രിക്കറ്റ് ലോകകപ്പില്‍ അനായാസ ജയത്തോടെ ഇന്ത്യ ഫൈനലില്‍. നിലവിലെ ചാമ്പ്യന്മാരായ ഓസ്‌ട്രേലിയയെ 36 റണ്‍സിന് തകര്‍ത്താണ് ഇന്ത്യ ഫൈനലിലേക്ക് കുതിച്ചത്. ഇന്ത്യ ഉയര്‍ത്തിയ 281 റണ്‍സ് വിജയലക്ഷ്യം പിന്തുടര്‍ന്ന ഓസ്‌ട്രേലിയ 40.1 ഓവറില്‍ 245 റണ്‍സിന് എല്ലാവരും പുറത്തായി.

115 പന്തില്‍ 171 റണ്‍സുമായി ലോകകപ്പിലെ ഇന്ത്യാക്കാരിയുടെ ഉയര്‍ന്ന വ്യക്തിഗത സ്‌കോറാണ് കൗര്‍ കുറിച്ചത്. ഏകദിനത്തില്‍ ഇന്ത്യാക്കാരിയുടെ ഉയര്‍ന്ന രണ്ടാമത്തെ വ്യക്തിഗത സ്‌കോറും. ദീപ്തി ശര്‍മ്മയുടെ 188 റണ്‍സാണ് ഒന്നാം സ്ഥാനത്ത്. 20 ഫോറുകളും ഏഴു സിക്‌സുകളും നേടിയ കൗര്‍ ഒരു ഇന്നിങ്‌സില്‍ ഏറ്റവും കൂടുതല്‍ സിക്‌സറുകളെന്ന വനിതാ ലോകറെക്കോര്‍ഡും സ്വന്തമാക്കി.

ടോസ് നേടി ബാറ്റിങിനിറങ്ങിയ ഇന്ത്യയ്‌ക്ക് പത്താം ഓവറായപ്പോഴേക്കും ഓപ്പണര്‍മാരായ സ്മൃതി മന്ദനയും (ആറ്) പൂനം റൗത്തും (14) നഷ്ടപ്പെട്ടു. എന്നാല്‍ ക്യാപ്റ്റന്‍ മിതാലി രാജ് (36) ഹര്‍മന്‍പ്രീതിനു കൂട്ടു നല്‍കിയെങ്കിലും 25-ാം ഓവറില്‍ മിതാലിയും മടങ്ങി. പക്ഷെ തളരാതെ ഹര്‍മന്‍ നിറഞ്ഞാടിയപ്പോള്‍ ഇന്ത്യന്‍ സ്‌കോര്‍ 250 കടന്നു.

ജെസെ ജോനാസണ്‍ ഏഴ് ഓവറില്‍ 63 റണ്‍സ് വഴങ്ങിയപ്പോള്‍ അഷ്ലെയ് ഗാര്‍ഡ്‌നര്‍ എട്ട് ഓവറില്‍ 43ഉം കിര്‍സ്റ്റന്‍ ബീന്‍സ് 49ഉം വഴങ്ങി.

മറുപടി ബാറ്റിങ്ങിനിറങ്ങിയ ഓസ്‌ട്രേലിയ എലിസ് വില്ലാനി ( 71), അലക്‌സ് ബ്ലാക്ക്‌വെല്‍ ( 90) എന്നിവരുടെ ഇന്നിങ്‌സുകളിലൂടെ പൊരുതിയെങ്കിലും 245 ല്‍ വീണു.

ഇന്ത്യയ്‌ക്കു വേണ്ടി ദീപ്തി ശര്‍മ മൂന്നും ജുലന്‍ ഗോസ്വാമി, ശിഖ പാണ്ഡെ എന്നിവര്‍ രണ്ടു വീതം വിക്കറ്റുകളും വീഴ്‌ത്തി.

ഇന്ത്യ-ഇംഗ്ലണ്ട് ഫൈനല്‍ ഞായറാഴ്ച നടക്കും.