വനിതാ ലോകകപ്പ് ക്രിക്കറ്റിന്റെ കലാശക്കളിയില് പൊരുതിത്തോറ്റ ഇന്ത്യന് ടീമിന്റെ നായിക മിതാലി രാജിനു സമ്മാനമായി ബി എം ഡബ്ല്യു കാര് എത്തുന്നു. ഇന്ത്യന് ജൂനിയര്ക്രിക്കറ്റ് ടീം സിലക്ടറായിരുന്ന വി ചാമുണ്ഡേശ്വര്നാഥാണു മിതാലി രാജിനു കാര് സമ്മാനമായി നല്കുന്നത്.
ഹൈദരബാദില് തിരിച്ചെത്തിയാലുടന് മിതാലി രാജിനു കാര് കൈമാറുമെന്നാണു നാഥിന്റെ വാഗ്ദാനം.
ഇന്ത്യന് ക്രിക്കറ്റില് വന്സ്വാധീനമാണു മിതാലി രാജ് ചെലുത്തുന്നതെന്നും ഏറെ നാളായി വനിതാ ക്രിക്കറ്റ് ടീമിന് ഉജ്വല നേതൃത്വമാണ് മിതാലി രാജ് നല്കുന്നതെന്നും ചാമുണ്ഡേശ്വര്നാഥ് പറഞ്ഞു. ടീം ഫൈനല് വരെയെത്തിയ സാഹചര്യത്തില് ഇന്ത്യയിലെ കൂടുല് പെണ്കുട്ടികള് ക്രിക്കറ്റ് കളത്തിലെത്തുമെന്നും ചാമുണ്ഡേശ്വര്നാഥ് പ്രത്യാശിച്ചു.
ചാമുണ്ഡേശ്വര്നാഥ് മിതാലി രാജിനു കാര് സമ്മാനിക്കുന്നതും ഇതാദ്യമല്ല. വനിതകളുടെ ഏകദിന ക്രിക്കറ്റില് ഏറ്റവുമധികം റണ്സ് നേടി റെക്കോഡ് സൃഷ്ടിച്ചപ്പോള് 2007ല് അദ്ദേഹം രാജിനു ഷെവര്ലെ സമ്മാനിച്ചിരുന്നു.
ഇന്ത്യന് ബാഡ്മിന്റന് ലീഗ് ഫ്രാഞ്ചൈസിയായ മുംബൈ മാസ്റ്റേഴ്സ് സഹ ഉടമയാണ് ചാമുണ്ഡേശ്വര്നാഥ്. റിയോ ഒളിംപിക്സില് മെഡല് നേടിയ ഇന്ത്യന് താരങ്ങള്ക്കും അദ്ദേഹം മുമ്പ് ആഡംബര കാര് സമ്മാനമായി നല്കിയിരുന്നു.
