ഗോള് : ഇന്ത്യയ്ക്കെതിരായ ഒന്നാം ക്രിക്കറ്റ് ടെസ്റ്റില് ആതിഥേയരായ ശ്രീലങ്കയ്ക്ക് 550 റണ്സ് വിജയലക്ഷ്യം. മൂന്നിന് 189 റണ്സ് എന്ന നിലയില് നാലാം ദിനം ബാറ്റിങ് ആരംഭിച്ച ഇന്ത്യ, 240 റണ്സില് ഇന്നിങ്സ് ഡിക്ലയര് ചെയ്തു. ക്യാപ്റ്റന് വിരാട് കോഹ്ലി സെഞ്ച്വറി പൂര്ത്തിയാക്കിയതിനു പിന്നാലെയാണ് ഇന്ത്യ ഇന്നിങ്സ് അവസാനിപ്പിച്ചത്.
136 പന്തില് അഞ്ചു ബൗണ്ടറിയും ഒരു സിക്സും ഉള്പ്പെടെ 103 റണ്സെടുത്ത കോഹ്ലിയും 18 പന്തില് രണ്ടു ബൗണ്ടറിയുള്പ്പെടെ 23 റണ്സെടുത്ത ഉപനായകന് അജിങ്ക്യ രഹാനെയും പുറത്താകാതെ നിന്നു. ഇരുവരും ചേര്ന്നുള്ള നാലാം വിക്കറ്റ് കൂട്ടുകെട്ട് 51 റണ്സ് കൂട്ടിച്ചേര്ത്തു.
നേരത്തെ, 309 റണ്സിന്റെ ഒന്നാം ഇന്നിങ്സ് ലീഡ് നേടിയിട്ടും ശ്രീലങ്കയെ ഫോളോഓണ് ചെയ്യിക്കാതെ രണ്ടാം ഇന്നിങ്സ് ആരംഭിച്ച ഇന്ത്യ, മൂന്നാം ദിനം കളി നിര്ത്തുമ്പോള് മൂന്നു വിക്കറ്റ് നഷ്ടത്തില് 189 റണ്സ് എന്ന നിലയിലായിരുന്നു. മൂന്നാം വിക്കറ്റില് 133 റണ്സ് കൂട്ടിച്ചേര്ത്ത അഭിനവ് മുകുന്ദ്വിരാട് കോഹ്ലി സഖ്യമാണ് മൂന്നാം ദിവസത്തെ കളി ഇന്ത്യയ്ക്ക് അനുകൂലമായത്.
116 പന്തില് എട്ടു ബൗണ്ടറികള് ഉള്പ്പെടെ 81 റണ്സെടുത്ത മുകുന്ദിനെ ഗുണതില പുറത്താക്കിയതോടെ മൂന്നാം ദിനത്തിലെ കളി അവസാനിപ്പിച്ചു. ശിഖര് ധവാന് (14 പന്തില് 14), ചേതേശ്വര് പൂജാര (35 പന്തില് 15) എന്നിവരാണ് മൂന്നാം ദിനം പുറത്തായ ഇന്ത്യന് താരങ്ങള്. ദില്റുവാന് പെരേര, ലഹിരു കുമാര എന്നിവര്ക്കാണ് വിക്കറ്റ്.
നേരത്തെ, ഇന്ത്യയുടെ 600 എന്ന കൂറ്റന് സ്കോറിനെ പിന്തുടര്ന്നിറങ്ങിയ ലങ്ക മൂന്നാം ദിനം ഉച്ചഭക്ഷണത്തിനു തൊട്ടുപിന്നാലെ 291 റണ്സിന് ഓള്ഔട്ടായി. ലഞ്ചിനു പിരിയുമ്പോള് 77 ഓവറില് എട്ടിന് 289 എന്ന നിലയിലായിരുന്നു അവര്. ലങ്കന് നിരയില് ഏഴാമനായിറങ്ങിയ വെറ്ററന് താരം ദില്റുവാന് പെരേര, കന്നി ടെസ്റ്റ്ക്ക് സെഞ്ച്വറിക്ക് എട്ടു റണ്സ് മാത്രം അകലെ നില്ക്കെയാണ് ലങ്ക ഓള്ഔട്ടായത്. 132 പന്തില് 10 ബൗണ്ടറിയും നാലു സിക്സും ഉള്പ്പെടെയാണ് പെരേര 92 റണ്സെടുത്തത്.
