കൊളംബോ: വെടിക്കെട്ട് ബാറ്റിംഗുമായി ഇന്ത്യന്‍ ബാറ്റ്‌സ്മാന്‍മാര്‍ മുന്നേറിയപ്പോള്‍ കൊളംബോ ടെസ്റ്റില്‍ ഇന്ത്യ ഒന്നാം ഇന്നിങ്‌സ് 622 റണ്‍സിന് ഡിക്ലയര്‍ ചെയ്തു. ഒമ്പത് വിക്കറ്റ് നഷ്ടത്തിലാണ് ഇന്ത്യ കൂറ്റന്‍ സ്‌കോര്‍ സ്വന്തമാക്കിയത്.
രണ്ടാം ദിനം കളി അവസാനിപ്പിക്കുമ്പോള്‍ രണ്ടിന് 52 റണ്‍സ് എന്ന നിലയിലാണ് ശ്രീലങ്ക. കരുണരത്‌നെ (45 പന്തില്‍ പന്തില്‍ 25), ഉപുല്‍ തരംഗ (0) എന്നിവരാണ് പുറത്തായത്. അശ്വിനാണ് ഇരുവരെയും പുറത്താക്കിയത്. കുശാല്‍ മെന്‍ഡിസ് (16), ദിനേശ് ചണ്ഡിമല്‍ (8) എന്നിവര്‍ ക്രീസിലുണ്ട്.
നേരത്തെ 133 റണ്‍സെടുത്ത ചേതേശ്വര്‍ പുജാരയെയാണ് ഇന്ത്യക്ക് ആദ്യം നഷ്ടമായത്. പിന്നീടെത്തിയ അശ്വിനുമൊത്ത് രഹാനെ 50 റണ്‍ സഖ്യം പടുത്തുയര്‍ത്തി. 132 റണ്‍സെടുത്ത രഹാനെയെ പുറത്താക്കി പുഷ്പകുമാര കന്നി ടെസ്റ്റ് വിക്കറ്റ് നേടി. ഉച്ച ഭക്ഷണത്തിന് പിരിയുമ്പോള്‍ അഞ്ച് വിക്കറ്റ് നഷ്ടത്തില്‍ 442 റണ്‍ എന്ന ശക്തമായ നിലയിലായിരുന്നു ഇന്ത്യ.
ഉച്ചഭക്ഷണം കഴിഞ്ഞ് അധികം വൈകാതെ അര്‍ധശതകം നേടിയ അശ്വിനെ ഹെറാത്ത് ക്ലീന്‍ ബൗള്‍ ചെയ്തു. സിക്‌സറിലൂടെ അമ്ബതിലേക്ക് കടന്ന് തൊട്ടടുത്ത പന്തിലായിരുന്നു അശ്വിന്റെ മടക്കം.
തുടര്‍ന്നെത്തിയ പാണ്ഡ്യ അധികം വൈകാതെ കളം വിട്ടു. 85 പന്തുകളില്‍ നിന്ന് മൂന്ന് സിക്‌സറുകളുടെയും നാല് ബൗണ്ടറികളുടെയും അകമ്പടിയോടെ 70 റണ്‍സുമായി ജഡേജ അജയ്യനായി നിന്നു.
