കൊച്ചി: ഇന്ത്യയില് നടക്കുന്ന അണ്ടര് 17 ലോകകപ്പിന് മത്സരങ്ങള് നിയന്ത്രിക്കാന് വനിതാ റഫറിമാരും. ഏഴ് വനിതകളെയാണ് ലോകകപ്പ് മത്സരങ്ങള് നിയന്ത്രിക്കാനായി സപ്പോര്ട്ട് റഫറിമാരായി ഫിഫ ചുമതലപ്പെടുത്തിയത്. അതേ സമയം റഫറി സംഘത്തില് ഇന്ത്യയില് നിന്നുള്ള ഒരാള് പോലുമില്ല.
ഇതാദ്യമായാണ് പുരുഷ ലോകകപ്പ് മത്സരങ്ങള്ക്കായി ഫിഫ വനിതാ റഫറിമാരെയും പരിഗണിക്കുന്നത്. ലോകകപ്പിലെ സപ്പോര്ട്ട് റഫറിമാരായി ഏഴ് വനിതകളെയാണ് ഫിഫ ചുമതലപ്പെടുത്തിയിട്ടുള്ളത്.
വനിതാ റഫറിമാരില് ഏഷ്യയില് നിന്ന് ഉത്തര കൊറിയക്ക് മാത്രമാണ് പ്രാതിനിധ്യം ലഭിച്ചിട്ടുള്ളത്. അവസരം ലഭിച്ചിട്ടുള്ളതില് രണ്ട് റഫറിമാര് മാത്രമാണ് നേരത്തെ പുരുഷന്മാരുടെ ഫുട്ബോള് മത്സരങ്ങള് നിയന്ത്രിച്ചിട്ടുള്ളത്. 2017ലെ വനിതകളുടെ യൂറോകപ്പ് മത്സരങ്ങള് നിയന്ത്രിച്ചിട്ടുള്ള സ്വിസ് റഫറി എസ്തര് സ്റ്റോബ്ളിയും പട്ടികയിലുണ്ട്.
അതേ സമയം റഫറിമാരുടെ പട്ടികയില് ഇന്ത്യയില് നിന്നും ആരും ഇല്ലാത്തത് ആരാധകരെ നിരാശരാക്കുന്നു. ഏഷ്യയില് നിന്ന് ഒമ്പത് പേരാണ് റഫറിമാരുടെ പട്ടികയിലുള്ളത്. നിലവിലെ പട്ടികയില് ഇന്ത്യക്കാരാരും ഇല്ലെങ്കിലും ഫിഫ തീരുമാനം പുന: പരിശോധിക്കുമെന്നാണ് പ്രതീക്ഷയെന്ന് ഓള് ഇന്ത്യ ഫുട്ബോള് ഫെഡറേഷന് അറിയിച്ചു.