കാറുകളില് യാത്രക്കാരുടെ സുരക്ഷ ഉറപ്പാക്കാന് സെന്റര് സൈഡ് എയര്ബാഗുകളുമായി ഹ്യൂണ്ടായ്. ഡ്രൈവര് സീറ്റിനും പാസഞ്ചര് സീറ്റിനും ഇടയിലാണ് സെന്റര് സൈഡ് എയര്ബാഗിന്റെ സ്ഥാനം. എണ്പത് ശതമാനം അപകടങ്ങളും എയര് ബാഗ് മൂലം ഒഴിവാക്കാന് സാധിക്കുമെന്നാണ് അധികൃതര് വ്യക്തമാക്കുന്നത്.
വശങ്ങളില് നിന്ന് ഡ്രൈവര്ക്ക് ഏല്ക്കുന്ന ഇടികളില് നിന്നും മുന്നിലെ യാത്രക്കാര് പരസ്പരം ഇടിച്ചുണ്ടാകുന്ന അപകടവും ഒരു പരിധി വരെ ഇത് തടയുമെന്നും ഹ്യൂണ്ടായ് വ്യക്തമാക്കുന്നു. കാറിന്റെ ഭാഗങ്ങള് ഇടിക്കുകയോ, പരസ്പരം കൂട്ടിയിടിക്കുകയോ ചെയ്യുമ്പോള് 45 ശതമാനം അപകടങ്ങള് ഉണ്ടാകുമെന്നാണ് യൂറോപ്യന് ഓട്ടോമൊബൈല് നിര്മ്മാതാക്കളുടെ അസോസിയേഷന് പറയുന്നത്.
എയര് ബാഗുകള് ഉപയോഗിക്കുന്നതിലൂടെ അപകട സാധ്യത വളരെയധികം കുറയുന്നു. ഡ്രൈവര് സീറ്റിനുള്ളിലാണ് സെന്റര് സൈഡ് എയര്ബാഗുണ്ടാവുക. അപകട സമയത്ത് ഡ്രൈവര് സീറ്റിനും പാസഞ്ചര് സീറ്റിനും ഇടയിലേക്ക് എയര്ബാഗ് വിടര്ന്നുവരും. ഫ്രണ്ട്, സൈഡ് എയര് ബാഗുകള്ക്കൊപ്പം ഉയര്ന്ന സുരക്ഷ നല്കാന് ഹ്യുണ്ടായിയുടെ വരാനിരിക്കുന്ന മോഡലുകളില് ഈ എയര്ബാഗ് ഉള്പ്പെടുത്തിയേക്കുമെന്നാണ് സൂചന.
